Go Tšeela Ditokelo tša Tirelo e Kgethwa Godimo Kudu

DIKABELO tša tirelo e kgethwa ga se tša swanela go tšewa gabohwefo. Ge baperisita ba Juda ya bogologolo ba be ba bontšha boemo bja kgopolo bja go se kgomege ka ditokelo tša bona mabapi le tempele ya Jehofa, o ile a ba kgalemela ka matla. (Maleaki 1:6-14) Le gona ge ba bangwe Isiraeleng ba be ba kgothaletša Banasari go swara boikarabelo gabohwefo bjo ba bego ba bo amogetše mabapi le tirelo ya bona e kgethwa, Jehofa o ile a sola ba-Isiraele bao ba babe. (Amosi 2:11-16) Bakriste ba therešo le bona ba tšea karolo tirelong e kgethwa gomme ba e tšeela godimo. (Ba-Roma 12:1) Tirelo ye e kgethwa e na le dibopego tše dintši, ka moka ga tšona di bohlokwa.

Ge Jesu a be a sa le lefaseng le balatedi ba gagwe, o ile a ba tlwaetša gore e be bagoeledi ba Mmušo wa Modimo. Ge nako e dutše e e-ya, molaetša wa bona o be o tla fihla mafelelong a lefaseng. (Mateo 28:19, 20; Ditiro 1:8) Boboledi bjo e bile ke bjo bo akgofilego kudu matšatšing a mafelelo a tshepedišo ya gona bjale ya dilo.

Dihlatse tša Jehofa ka moka di tšea karolo modirong wo. Ba makgolo a dikete ba hwetša lethabo ka go ba ba kgonago go dira bjalo e le babulamadibogo. E le gore ba phethe dinyakwa tša bohlokwa modirong wa lefase ka bophara, ba dikete ba itirile ba hwetšagalago bakeng sa tirelo e kgethegilego ya nako e tletšego Bethele, modirong wa bosepedi e le balebeledi ba tikologo le ba selete goba tirelong ya boromiwa. Se se ka akaretša’ng karolong ya bao ba nyakago go tšwela pele tirelong e bjalo e kgethegilego?

Ge go E-na le Dinyakwa tše di Gateletšago tša Lapa

Pele a tsenela tirelo ya nako e tletšego, gantši motho o swanetše go dira dipeakanyo tše itšego maemong a gagwe. Ga se bohle ba ka dirago se. Boikarabelo bja Mangwalo bjo motho a šetšego a na le bjona bo ka dira gore go se ke gwa kgonega. Lega go le bjalo, go direga’ng ge dinyakwa tša lapa tše di nyakago tlhokomelo e akgofilego mohlomongwe tše di akaretšago batswadi ba tšofetšego di lebana le bao ba šetšego ba le tirelong e kgethegilego? Melao ya motheo ya Beibele le dikeletšo tše bjalo ka tše di latelago di nea tlhahlo e nyakegago.

Bophelo bja rena ka moka bo swanetše go agwa tswalanong ya rena le Jehofa. (Mmoledi 12:13; Mareka 12:28-30) Dilo tše kgethwa tšeo re di gafetšwego gore re di hlokomele di swanetše go tšeelwa godimo kudu. (Luka 1:74, 75; Ba-Hebere 12:16) Tiragalong e nngwe, monna yo a bego a nyaka go fetoša dilo tša gagwe tše di tlago pele o ile a botšwa ke Jesu gore o swanetše go swarega ka botlalo go boleleng Mmušo wa Modimo. Go bonala gore monna o be a ikemišeditše go šuthiša modiro o bjalo go fihla ka morago ga ge tatagwe a hwile. (Luka 9:59, 60) Ka lehlakoreng le lengwe, Jesu o ile a pepentšha kgopolo e fošagetšego ya motho le ge e le ofe yo a bego a ipolela gore o neetše selo se sengwe le se sengwe go Modimo gomme ke moka a se ‘thuše tatagwe le mmagwe.’ (Mareka 7:9-13) Moapostola Paulo le yena o bontšhitše boikarabelo bjo bogolo bja go fepa ‘bao e lego ba gabo motho,’ go akaretša batswadi le bo-rakgolo le bo-makgolo.—1 Timotheo 5:3-8.

Na se se bolela gore ge dinyakwa tše di akgofilego di rotoga, bao ba lego tirelong e kgethegilego ba swanelwa ke go tlogela dikabelo tša bona e le gore e be bahlokomedi? Karabo e ithekgile ka mabaka a mantši. Phetho ke ya motho ka noši. (Ba-Galatia 6:5) Ba bantši ba ile ba nagana gore e be e tla ba gabohlale go ba le batswadi ba bona gore ba ba nee thušo e nyakegago gaešita le ge ba be ba rata kabelo ya bona. Ka baka la’ng? Go nyakega ga thušo go ka ba go be go le bohlokwa kudu, go ka ba go be go se na setho se sengwe sa lapa seo se bego se ka kgona go thuša goba phuthego ya lefelong leo e ka ba e be e sa kgone go dira seo se bego se nyakega. Ba bangwe ba ile ba kgona go bula madibogo ba dutše ba nea thušo e bjalo. Ba bangwe gape ba ile ba kgona go tsenela tirelo e kgethegilego ya nako e tletšego ka morago ga ge boemo bja lapa bo lokišitšwe. Lega go le bjalo, maemong a mantši go ile gwa kgonega go swaragana le boemo ka ditsela tše dingwe.

Go Rwala Boikarabelo bja Bona

Ge dinyakwa tše di gateletšago di rotogile, ba bangwe bao ba lego tirelong e kgethegilego ya nako e tletšego ba ile ba kgona go hlokomela dinyakwa tšeo ka ntle le go tlogela dikabelo tša bona. Ela hloko mehlala e sego kae feela go tšwa go e mentši.

Banyalani ba bangwe bao ba hlankelago ntlong-kgolo ya lefase ya Dihlatse tša Jehofa ba ile ba tsenela tirelo ya Bethele ka 1978, ka morago ga ge ba bile le karolo modirong wa tikologo le wa selete. Kabelo ya ngwanabo rena e akaretša morwalo o boima wa boikarabelo mokgatlong wa pušo ya Modimo. Eupša batswadi ba gagwe le bona ba be ba nyaka thušo. Banyalani ba ba Bethele ba be ba etela gararo goba gane ngwaga o mongwe le o mongwe—dikhilomithara tše ka bago tše 3500 go ya le go boa—bakeng sa go yo hlokomela batswadi. Ba ile ba aga ntlo ka bobona gore ba kgotsofatše dinyakwa tša batswadi. Go ile gwa ba le maeto a go yo hlokomela maemo a tša tšhoganetšo a tša kalafo. Ba ile ba diriša mo e nyakilego go ba nako ya bona ka moka ya maikhutšo ka nywaga e ka bago e 20 bakeng sa go hlokomela boikarabelo bjo. Ba rata le go godiša batswadi, eupša ba be ba bile ba tšeela godimo ditokelo tša bona tša tirelo e kgethwa.

Ngwanabo rena yo mongwe o be a bile modirong wa bosepedi ka nywaga e 36 ge a be a lebana le seo a se hlalosago e le bjo bongwe bja maemo a hlohlago kudu bophelong bja gagwe. Mmatswal’agwe wa nywaga e 85, e lego mohlanka yo a botegago wa Jehofa, o be a nyaka go dula le motho yo a bego a ka mo thuša. Ka nako yeo, bontši bja bana ba gagwe ba ile ba nagana gore go be go ka se be bonolo gore a dule le bona. Yo mongwe wa ba leloko o ile a botša molebeledi wa mosepedi gore yena le mosadi wa gagwe ba be ba swanetše go tlogela tirelo yeo gomme ba hlokomele mmago bona legatong la lapa. Eupša banyalani ga se ba ka ba tlogela tirelo ya bona e bohlokwa, goba go nyatša dinyakwa tša mmago bona. Nywageng e senyane e latetšego, o bile le bona nako e ntši. Mathomong ba be ba dula ka kharabaneng, ka morago ba dula nywakong e fapa-fapanego yeo e bego e newa ke ditikologo. Ka nako e oketšegilego, ngwanabo rena yo ka nako yeo e bego e le molebeledi wa selete, o ile a tšwela pele a tšea leeto la go hlokomela dikabelo tša gagwe mola mosadi wa gagwe a šetše le mmagwe bakeng sa go nea tlhokomelo e lerato ya nako e tletšego. Beke e nngwe le e nngwe ka morago ga diboka ka Sontaga, monna o be a tšea maeto a matelele a boela morago go ya go ba thuša. Ba bantši bao ba bego ba tseba ka boemo ba ile ba bontšha tebogo e tseneletšego ya seo banyalani ba ba bego ba se dira. Ge nako e dutše e e-ya, ditho tše dingwe tša lapa le tšona di ile tša ikwa di tutueletšega go gata mogato wa go nea thušo e itšego. Dikete-kete tša batho ba Jehofa di tšwela pele di holwa ke tirelo ya banyalani bao ba ikgafago ka gobane ba ile ba kgomarela tokelong ya bona ya tirelo e kgethegilego ya nako e tletšego.

Ka Tirišano ya Lapa

Ge ditho tše di fapa-fapanego tša lapa di lemoga bohlokwa bja tirelo e kgethegilego ya nako e tletšego, di ka dirišana e le gore bonyenyane ba bangwe ba bona ba ka tšea karolo go yona.

Moya o bjalo wa tirišano ya lapa e bile o thušago go banyalani ba Canada bao ba hlankelago e le baromiwa Afrika Bodikela. Ga se ba ka ba leta go fihlela boemo bja tšhoganetšo bo rotoga, ba holofela feela gore go be go ka se direge selo. Pele ba e-ya Sekolong sa Beibele sa Watchtower sa Gilead e le gore ba itokišeletše tirelo ya dinageng dišele, monna o ile a boledišana le moratho wa gagwe ka tlhokomelo ya mmago bona ge go be go ka direga gore a babje goba e be segole. Ka go bontšha lerato la go rata mmago bona gotee le bohlokwa bja modiro wa boromiwa, moratho o ile a re: “Mo nakong ye ke na le lapa le bana. Nka se kgone go ya kgole kudu gomme ka dira dilo tšeo o ka di kgonago. Ka gona ge e ba mma a ka diragalelwa ke selo le ge e le sefe, ke tla mo hlokomela.”

Banyalani bao ba hlankelago Amerika Borwa ba ile ba hwetša tirišano e kgolo go tšwa lapeng labo mosadi mabapi le go hlokomela mmagwe yo a tšofalago. Yo mongwe wa bo-mogolwago mosadi le monna wa gagwe ba ile ba hlokomela mmagwe go fihlela ge yoo mogolw’agwe a be a hlaselwa ke bolwetši bjo kotsi. Ke moka gwa direga’ng? Go ba imolla go tshwenyegeng le ge e le gofe, molamo wa gagwe o ile a ngwala gore: “Ge feela nna le bana re sa phela, le ka mohla o ka se ke wa swanelwa ke go tlogela tirelo ya gago ya boromiwa.” Thušo e tšwetšego pele ya lapa e ile ya tla ge moratho wa gagwe yo mongwe le monna wa gagwe ba ile ba tlogela legae la bona gomme ba hudugela moo mmago bona a dulago e le gore ba mo hlokomele gomme ba ile ba dira bjalo go fihlela lehung la gagwe. A moya o mobotse gakaakang wa tirišano! Ka moka ga bona ba be ba thuša bakeng sa go thekga tirelo ya boromiwa.

Batswadi Bao ba Neago Jehofa ka Bolokologi

Tebogo e kgethegilego ya go leboga tirelo e kgethwa gantši e bontšhwa ke batswadi. Gare ga matlotlo a bona a bohlokwa kudu ao ka ona ba ka godišago Jehofa ke bana ba bona ka noši. (Diema 3:9) Batswadi ba bantši ba Bakriste ba kgothaletša bana ba bona go tsenela tirelo ya nako e tletšego. Ba bangwe ba bona ba ikwa bjalo ka Hanna yo a ilego a neela morwa wa gagwe Samuele go Jehofa bakeng sa tirelo ya gagwe ya “ka mehla le mehla,” ke gore ka “mehla yohle ya xo phela xa xaxwe.”—1 Samuele 1:22, 28.

Motswadi yo mongwe yo bjalo o ile a ngwalela morwedi wa gagwe yo a lego Afrika gore: “Re leboga Jehofa ka baka la tokelo e kgahlišago yeo o nago le yona. Ga go na se se kaone-kaone seo re bego re ka se holofela ka ntle le seo.” Lebakeng le lengwe o ile a bolela gore: “Ke therešo gore re swanetše go dira boikgafo bja go arogana, eupša ke lethabo le lekaakang go bona kamoo Jehofa a go hlokomelago ka gona!”

Ka morago ga go hlahloba maemo a fapa-fapanego ao a bego a rotogile go neeng tlhokomelo e nyakegago go batswadi ba gagwe ba tšofetšego, moromiwa kua Ecuador o ile a ngwala gore: “Ke nagana gore thušo e kgolo yeo nna le mosadi wa-ka re ka bago re e hweditše e be e le dithapelo tša tate. Ka morago ga lehu la gagwe mma o ile a re botša gore: ‘Go be go se na letšatši le le fetago tatago lena a se a rapela Jehofa gore a le dumelele bobedi bja lena gore le dule kabelong ya lena.’”

Banyalani ba tšofetšego ba California, U.S.A., ba be ba kgahlišwa ke ge yo mongwe wa barwa ba bona a le tirelong ya nako e tletšego. Morwa yoo le mosadi wa gagwe ba be ba le Sepania ge mmagwe a hlokofala. Ditho tše dingwe tša lapa di ile tša nagana gore go swanetše go dirwa dithulaganyo tša go hlokomela tatago bona. Ka ge ba be ba swaregile ka modiro wa tša boiphedišo le go godiša bana ba bona, ba be ba sa nagane gore ba be ba ka kgona go tšea boikarabelo bjoo. Go e na le moo, ba ile ba kgothaletša ka matla banyalani bao ba bego ba le tirelong e kgethegilego ya nako e tletšego gore ba boele gae gomme ba hlokomele tatago bona. Lega go le bjalo, tatago bona gaešita le ge a be a e-na le nywaga e 79, o be a sa dutše a phela gabotse mmeleng gomme o be a bile a e-na le pono e botse ka dilo tša moya. Sebokeng sa lapa ka morago ga ge yo mongwe le yo mongwe a ntšhitše sa mafahleng a gagwe, tatago bona o ile a emelela gomme a bolela ka go tia gore: “Ke nyaka ba boela Sepania gomme ba tšwele pele go šoma.” Ba ile ba boela, eupša le bona ba ile ba mo thuša ka ditsela tša dilo tše di bonagalago. Kabelo ya bona ya gona bjale ke modirong wa tikologo Sepania. Ga e sa le go tloga ka morago ga seboka seo sa lapa, ditho tše dingwe tša lapa di bontšhitše tebogo ya go leboga seo banyalani bao ba lego tirelong ya dinageng dišele ba se dirago. Ka morago ga nywaga e mmalwa, yo mongwe wa barwa ba bangwe o ile a tliša tatagwe ga gagwe gore a mo hlokomele go fihlela a hlokofala.

Kua Pennsylvania, U.S.A., ngwanabo rena yo a tloditšwego yo a butšego madibogo ka nywaga e ka bago 40 o be a e-na le nywaga ya ka godimo ga e 90 ge mosadi wa gagwe a be a babja o šoro gomme a hlokofala. O be a e-na le morwa le barwedi ba bararo, ka ntle le bana ba bantši ba moya. Yo mongwe wa barwedi ba gagwe o be a bile tirelong ya nako e tletšego ka nywaga ya ka godimo ga e 40 a hlanketše le monna wa gagwe e le moromiwa, modirong wa bosepedi le Bethele. O ile a thuša go dira dithulaganyo e le gore tatagwe a tle a newe tlhokomelo e swanelago. Banababo rena ba lefelong leo le bona ba ile ba thuša ka go mo iša dibokeng Holong ya Mmušo. Ka morago ga moo ge monna wa gagwe a hlokofetše, o ile a botšiša tatagwe ge e ba a be a nyaka gore a tloge Bethele gomme a tle a mo hlokomele. O tšeela dilo tše kgethwa godimo kudu, gomme o ile a nagana gore dinyakwa tša gagwe di be di ka hlokomelwa ka ditsela tše dingwe. Ka gona o ile a araba ka gore: “Seo e tla ba selo se sebe le go feta se o ka se dirago, e bile e tla ba mo gobe le go feta ge nka go dumelela gore o se dire.”

Diphuthego tše di Thekgago

Diphuthego tše dingwe e bile tše thušago kudu go hlokomeleng batswadi ba tšofalago ba bao ba lego tirelong e kgethegilego ya nako e tletšego. Ba leboga kudu-kudu bao ba dirišitšego nywaga e mentši tirelong e bjalo. Le ge di ka se ba imolle boikarabelo bja bona bja Mangwalo, diphuthego tše di dira mo gontši go dira gore morwalo e be o bohwefo ka mo go lekanego e le gore go se ke gwa nyakega gore bana ba tlogele dikabelo tša bona tše di kgethegilego.

Banyalani ba ba tšwago Jeremane ba be ba le kabelong ya bona ya dinageng dišele ka nywaga e ka bago 17, bontši bja nako yeo ba le modirong wa bosepedi ge dinyakwa tša mmago monna yo a tšofetšego di be di ata. Ngwaga o mongwe le o mongwe ba be ba diriša maikhutšo a bona bakeng sa go mo thuša. Baagišani bao e lego Dihlatse le bona ba ile ba nea thušo e lerato. Ke moka ge banyalani ba ba lego tirelong ya nako e tletšego ba be ba na le mmago bona nakong e thata kudu, bagolo ba phuthego ya lefelong leo ba ile ba rulaganyetša go kopana le bona. Ba be ba tseba gabotse seo banyalani ba bego ba se direla mmago bona ka mehla. Ba be ba bile ba lemoga bohlokwa bja tirelo e kgethegilego yeo banyalani bao ba bego ba tšea karolo go yona. Ka gona bagolo ba ile ba rulaganya lenaneo le le šišintšwego la go hlokomela mmago banyalani, ke moka ba re: “Ga le kgone go mo hlokomela go feta seo le se dirago; re tla le thuša e le gore le kgone go dula kabelong ya lena kua Sepania.” Bagolo ba ba ile ba tšwela pele ba dira bjalo ka nywaga e šupago e fetilego.

Ka mo go swanago, ngwanabo rena yo a bego a dutše a hlankela Senegal ga e sa le go tloga ka 1967 o ile a hwetša thekgo e lerato kudu go tšwa phuthegong yeo tatagwe a bego a le go yona. Ge mathata a rotoga, ka tirišano ya go ithapa ya mosadi wa gagwe yo lerato, monna o ile a sepela a nnoši go ya United States go ya go thuša batswadi ba gagwe. O ile a hwetša go nyakega gore a dule moo dikgwedi tše mmalwa. Boemo bo be bo le thata, eupša ge a be a dirile seo a bego a ka se kgona, phuthego e ile ya tsenya letsogo gomme ya thuša e le gore a tle a kgone go tšwetša pele tirelo ya gagwe ya boromiwa. Lebakeng la ka godimo ga nywaga e ka bago 18, phuthego e ile ya nea thušo e lerato ka ditsela tše dintši, mathomong bakeng sa tatagwe (gaešita le ge a be a se sa hlwa a tseba bontši bja bona) gomme ka morago bakeng sa mmagwe. Na seo se ile sa lokolla morwa gore a se sa ba le boikarabelo? Aowa; gantši o be a sepela go tloga Senegal gomme a diriše maikhutšo a gagwe bakeng sa go nea thušo ka moka yeo a bego a ka kgona go e nea. Eupša ba bantši phuthegong yeo ba bile le lethabo la go tseba gore ba be ba tšea karolo go thušeng banyalani ba šomago ka thata gore ba dule ba le tirelong e kgethegilego ya nako e tletšego Senegal.

Jesu o boletše gore bao ba tlogetšego tšohle ka baka la ditaba tše di lokilego ba be ba tla ba le banababo bona, dikgaetšedi, bo-mma le bana ge ba balwa ga lekgolo. (Mareka 10:29, 30) Seo e tloga e le sa therešo gare ga bahlanka ba Jehofa. Banyalani bao mo nakong ye ba hlankelago Benin, Afrika Bodikela ba bone se ka tsela e kgethegilego ge Dihlatse tše pedi tše di lego phuthegong ya gabo batswadi ba bona di be di ba botša gore ba se ke ba tshwenyega ka batswadi. Di ile tša oketša ka gore: “Batswadi ba lena le rena ke batswadi ba rena.”

Ee, go na le ditsela tše dintši tšeo re ka bontšhago gore re tšeela ditokelo tša tirelo e kgethwa godimo kudu. Na go na le ditsela tšeo ka tšona o ka dirago se ka mo go tletšego kudu?

[Seswantšho go letlakala 26]

Ba itirile ba hwetšagalago bakeng sa tirelo e kgethegilego ya nako e tletšego