Dira Gore Tšwelopele ya Gago e Bonagale

“Hlôkômêla tšôna-tšeo, O ineêlê tšôna, xore dilong tšohle xo bônalê xe O tšwêlêla pele.”​—1 TIMOTHEO 4:15.

1. O ka tseba bjang ge seenywa se butšwitše gomme se loketše go ka lewa?

AKANYA ka seenywa seo o se ratago kudu​—perekisi, piere, manko goba selo se sengwe. Na o a tseba ge se butšwitše gomme se loketše go ka lewa? Ruri go bjalo. Monkgo wa sona, mmala le go se phopholetša ka moka di go botša gore tatso e rothišago mare e go letetše. Gatee-tee ge o kgemile seripana sa yona, o ka ikwa o kgotsofetše. A boleta bjo bo kaakang! A bose bjo bo kaakang! Se go nea lethabo le legolo le boipshino.

2. Go gola go bonagala bjang, gomme go kgoma bjang ditswalano tša motho ka noši?

² Tatso ye e bonolo eupša e kgahlišago e na le go swana mo go itšego dikarolong tše dingwe tša bophelo. Ka mohlala, bjalo ka ge e le therešo ka go butšwa ga seenywa, kgolo ya moya mothong le yona e bonagala ka ditsela tše di fapa-fapanego. Re lemoga go gola mothong ge re bona temogo, kwešišo, bohlale le tše dingwe. (Jobo 32:​7-9) E tloga e le mo go thabišago go gwerana le go šoma le batho bao ba bontšhago dika tše bjalo mekgweng ya bona le ditirong.​—Diema 13:20.

3. Ke eng seo tlhaloso ya Jesu e ilego ya se utolla ka batho ba mehleng ya gagwe mabapi le go gola?

³ Ka lehlakoreng le lengwe, motho e ka ba yo a gotšego mmeleng, eupša mokgwa wa go bolela le ditiro tša gagwe di ka utolla gore ga se a gola maikwelong le moyeng. Ka mohlala, ge a bolela ka setšhaba seo se tšwilego tseleng sa mehleng ya gagwe, Jesu Kriste o itše: “Johane ó tlile a ikôna xo jeng le xo nweng, ’me ba re: O n’e môya o mobe. Xwa tla Morwa-motho, a ja, a nwa; ba re: Bônang, motho wa sejatô wa monwi.” Gaešita le ge batho bao ba be ba godile mmeleng, Jesu o itše ba ile ba itshwara bjalo ka “bana”​—ba be ba se ba gola. Ka gona, o okeditše ka gore: “Xomme bohlale bo bônala ka bana ba byôna.”​—Mateo 11:​16-19.

4. Ke ka ditsela dife tšwelopele le go gola di bontšhwago?

⁴ Go tšwa mantšung a Jesu, re ka bona gore ge e ba motho a e-na le bohlale bja therešo​—leswao le le hlaolago la go gola​—go bontšhwa ka mediro yeo a e dirago le mafelelo a yona. Mabapi le se, ela hloko keletšo ya moapostola Paulo go Timotheo. Ka morago ga go lokeletša dilo tšeo Timotheo a swanetšego go di phegelela, Paulo o itše: “Hlôkômêla tšôna-tšeo, O ineêlê tšôna, xore dilong tšohle xo bônalê xe O tšwêlêla pele.” (1 Timotheo 4:​15) Ee, tšwelopele ya Mokriste ya go gola e a ‘bonagala,’ goba ke yeo e lemogegago gabotse. Go gola ga Mokriste, bjalo ka seetša se se phadimago, ga se seka sa ka gare goba seo se utegilego. (Mateo 5:​14-16) Ka gona, re tla ela hloko ditsela tše pedi tše dikgolo tšeo ka tšona tšwelopele le go gola di ka bontšhwago: (1) ka tsebo, kwešišo le bohlale; (2) go bontšha dienywa tša moya.

Botee Tumelong le Tsebong

5. Go gola go ka hlaloswa bjang?

⁵ Dipukuntšu tše dintši di hlalosa go gola e le boemo bja go gola ka mo go feletšego, bja go gola ka botlalo le go fihlelela boemo bja mafelelo goba boemo bjo bo kganyogwago. Bjalo ka ge go boletšwe pejana, seenywa se butšwitše ge e ba se phethile modikologo wa sona wa go gola wa tlhago gomme ponagalo ya sona, mmala, monkgo le tatso di fihleletše seo se lebelelwago e le seo se kganyogegago. Ka gona, go gola ke lehlalosetša-gotee la bogolo, go felela gaešita le phethagalo.​—Jesaya 18:5; Mateo 5:​45-48; Jakobo 1:4.

6, 7. (a) Ke eng seo se bontšhago gore Jehofa o kgahlegela ka mo go tseneletšego gore barapedi ba gagwe ka moka ba tšwele pele go gola moyeng? (b) Go gola moyeng go tswalanywa kgaufsi le eng?

⁶ Jehofa Modimo o na le kgahlego e tseneletšego ya gore barapedi ba gagwe ka moka ba tšwele pele go gola moyeng. Bakeng sa go fihlelela seo, o dirile ditokišetšo tše di kgahlišago ka gare ga phuthego ya Bokriste. Moapostola Paulo o ngwaletše Bakriste ba kua Efeso gore: “Gomme o neile ba bangwe go ba baapostola, ba bangwe gore e be baporofeta, ba bangwe baebangedi, ba bangwe ya ba badiši le barutiši ka pono ya go lokiša bakgethwa bakeng sa modiro wa bodiredi, bakeng sa go aga mmele wa Kriste, go fihlela bohle re fihlelela botee tumelong le tsebong e nepagetšego ya go tseba Morwa wa Modimo, go ba monna yo a gotšego ka botlalo, ka tekanyo ya bogolo bja botlalo bja Kriste. Re se ke ra hlwa re le bana, batho ba go gapa-gapiwa le go tšewa-tšewa ke phefo e nngwe le e nngwe ya thuto ka go fora-foretšwa ke batho, re gokwa ke maano a go re aroša.”​—Ba-Efeso 4:​11-14, NW.

⁷ Ditemaneng tše, Paulo o hlalositše gore gare ga mabaka ao ka ona Modimo a dirilego ditokišetšo tše bjalo tše dintši tša moya ka phuthegong ke gore bohle ba swanetše go ‘fihlelela botee tumelong le tsebong e nepagetšego,’ go ba ‘monna yo a gotšego ka botlalo’ le go ba le “tekanyo ya bogolo bja botlalo bja Kriste.” Ke feela moo re tla šireletšegago go gapa-​gapšeng bjalo ka bana ba moya ke dikgopolo le dithuto tša maaka. Ka gona re bona tswalano ya kgaufsi magareng ga go tšwela pele kgolong ya Bokriste le go ba le “botee tumelong le tsebong e nepagetšego ya go tseba Morwa wa Modimo.” Go na le dintlha tše mmalwa keletšong ya Paulo tšeo re dirago gabotse go di ela hloko.

8. Go boloka “botee” tumelong le tsebong e nepagetšego go nyaka eng?

⁸ Sa pele, bjalo ka ge “botee” bo swanetše go bolokwa, Mokriste yo a gotšego o swanetše go ba boteeng le go dumelelana ka mo go tletšego le badumedi-gotee mabapi le tumelo le tsebo. Ga a bolelele goba go gapeletša dikgopolo tša motho ka noši goba a boloka dikgopolo tša sephiri mabapi le kwešišo ya Beibele. Go e-na le moo, o na le kholofelo e feletšego therešong bjalo ka ge e utollwa ke Jehofa Modimo ka Morwa wa gagwe, Jesu Kriste le “molaki e a bôtêxaxo yo bohlale.” Ka go ja dijo tša moya tše di newago ka mehla “ka lebaka la xôna”​—ka dipuku tša Bokriste, diboka, dikopano tše nyenyane le tše kgolo​—re ka kgonthišega gore re boloka “botee” le Bakriste-gotee le rena tumelong le tsebong.​—Mateo 24:45.

9. Hlalosa seo se bolelwago ke polelwana “tumelong” bjalo ka ge e dirišitšwe ke Paulo lengwalong la gagwe leo le yago go Ba-Efeso.

⁹ Sa bobedi, polelwana “tumelong” ga e šupe go kgodišego yeo Mokriste yo mongwe le yo mongwe a ipolelago ka yona eupša go seo re se dumelago ka kakaretšo, ‘bophara, botelele, go iša le go phagama’ ga sona. (Ba-Efeso 3:​18; 4:5; Ba-Kolose 1:​23; 2:7) Ge e le gabotse, ke bjang Mokriste a ka bago boteeng le badumedi-gotee le yena ge e ba a dumela goba a amogela feela karolo e itšego ya ‘tumelo’? Se se bolela gore ga se ra swanela go fo kgotsofalela go tseba feela dithuto tša motheo tša Beibele goba go fo ba feela le therešo e sa kwagalego goba tsebo e sa felelago ya therešo. Go e na le moo, re swanetše go kgahlegela go holwa ke ditokišetšo ka moka tša Jehofa ka mokgatlo wa gagwe ka go epa ka mo go tseneletšego ka Lentšung la gagwe. Re swanetše go katanela go hwetša kwešišo e nepagetšego le e tletšego ya thato le morero wa Modimo ka mo go kgonegago. Se se akaretša go fetša nako re bala le go ithuta Beibele le dipuku tša Beibele, go rapela Modimo bakeng sa thušo ya gagwe le tlhahlo, go ba gona dibokeng tša Bokriste ka mehla le go ba le karolo e tletšego modirong wa go bolela ka Mmušo le wa go dira barutiwa.​—Diema 2:​1-5.

10. Ke eng seo se bolelwago ke mantšu “go fihlela bohle re fihlelela” bjalo ka ge a dirišitšwe go Ba-Efeso 4:​13, NW?

¹⁰ Sa boraro, Paulo o ile a etiša pele tlhaloso ya pakane e lego gararo ka mantšu a rego “go fihlela bohle re fihlelela.” Mabapi le polelwana “bohle,” puku e nngwe ya Beibele ya tlhago e e hlalosa e le “e sego ka moka, ka o tee ka o tee, ka go arogana eupša re le gotee.” Ka mantšu a mangwe, yo mongwe le yo mongwe wa rena o swanetše go dira boiteko bjo bo kwagalago bja go tšwetša pele pakane ya go ba Mokriste yo a gotšego gotee le borwarre ka moka. The Interpreter’s Bible e re: “Go felela ga go fihlelela dilo tša moya go ka se ke gwa hwetšwa ke batho bao ba lego lekatana, go no swana le ge karolo e tee ya mmele e ka se ke ya fihlelela go gola ka mo go feletšego ka ntle le ge mmele ka moka o tšwela pele go gola gabotse.” Paulo o ile a gopotša Bakriste ba Efeso gore e be e le ka “bakxêthwa bohle” moo ba swanetšego go katanela go lemoga tekanyo e tletšego ya tumelo.​—Ba-Efeso 3:​18b.

11. (a) Ke eng seo se sa bolelwego ke go dira tšwelopele ya moya? (b) Re swanetše go dira eng bakeng sa go dira tšwelopele?

¹¹ Ke mo go kwagalago go tšwa mantšung a Paulo gore go dira tšwelopele ya moya ga go bolele go fo tlatša monagano wa rena ka tsebo le go ithuta kudu. Mokriste yo a gotšego ga se yo a kgahlišago ba bangwe ka bohlale bja gagwe. Go e na le moo, Beibele e re: “Xe e le mmila wa baloki ó étša bo-ka mahuba xe a hlatloxa, ’tšatši la bá la hlaba.” (Diema 4:​18) Ee, ke “mmila” e sego motho yo a itšego wo o ‘etšago bo-ka mahuba.’ Ge re dira maiteko a tšwelago pele go sepedišana le kwešišo e etšago kudu ya Lentšu la Modimo leo Jehofa a le neago batho ba gagwe, re tla be re dira tšwelopele ya moya. Tabeng ye, go tšwela pele go bolela go gatela pele, gomme seo ke selo seo ka moka ga rena re ka se dirago.​—Psalme 97:​11; 119:​105.

Bontšha “Dienywa tša Môya”

12. Ke ka baka la’ng go bontšha seenywa sa moya e le ga bohlokwa go tsomeng ga rena tšwelopele ya moya?

¹² Ge go fihlelela “botee tumelong le tsebong e nepagetšego” e le ga bohlokwa, ke ga bohlokwa ka mo go swanago go rena go bontšha dienywa tša moya wa Modimo karolong e nngwe le e nngwe ya bophelo bja rena. Ka baka la’ng? Se ke ka gobane go gola, bjalo ka ge re bone ga go ka gare goba mo go utegilego, eupša go bontšhwa gabotse ke dika tšeo di ka holago le go aga ba bangwe. Ke therešo gore go tsoma ga rena tšwelopele ya moya ga se feela boiteko bja go bonagala re e-na le mekgwa e itšego e hlagoletšwego goba ya maitirelo. Go e-na le moo, ge re dutše re gola moyeng, re latela tlhahlo ya moya wa Modimo, go tla ba le phetogo e kgahlišago boemong bja rena bja kgopolo le ditirong. Moapostola Paulo o itše: “Swarang tsela Lè išwa ke Môya, ké mo Le tl’o xo lesa xo phêtha ditumô tša nama.”​—Ba-Galatia 5:16.

13. Ke phetogo efe e lego leswao le le bonagalago gabotse la tšwelopele?

¹³ Paulo o tšwetše pele go lokeletša “medirô ya nama,” yeo e lego e mentši le yeo e lego “pepeneneng.” Pele ga ge motho a ka kwešiša mohola wa ditekanyetšo tša Modimo, bophelo bja gagwe bo laolwa ke ditsela tša lefase gomme bo ka tlala ka tše dingwe tša dilo tše Paulo a di boletšego: “thlalô, le bootswa, le dithšila, le bohlôtlôlô. Ké xo hlankêla medimo, le boloi, le thlôyanô, le dintwa, le pefêlô, le boxale, le dithsêlê, le boxarexare. Ké moná, le polaô, le botaxwa, le bohori, le tše di swanaxo le tšeo.” (Ba-Galatia 5:​19-21) Eupša ge motho a dira tšwelopele ya moya, ganyenyane-ganyenyane o kgona go fenya “medirô [ye] ya nama” e sa rategego gomme ya tšeelwa sebaka ke “dienywa tša môya.” Phetogo ye e bonagalago ka ntle ke leswao la kgonthe la gore motho o tšwela pele kgolong ya Bokriste.​—Ba-Galatia 5:22.

14. Hlalosa dipolelwana tše pedi e lego “medirô ya nama” le “dienywa tša môya.”

¹⁴ Re swanetše go ela hloko dipolelwana tše pedi “medirô ya nama” le “dienywa tša môya.” “Medirô” ke mafelelo a seo motho a se dirago. Ka mantšu a mangwe, dilo tšeo Paulo a di lokeleditšego bjalo ka mediro ya nama e ka ba mafelelo a kgetho ya motho ya ka boomo goba a tutuetšo ya ditiro tša nama ya sebe. (Ba-Roma 1:​24, 28; 7:​21-25) Ka lehlakoreng le lengwe, polelwana “dienywa tša môya” e bontšha gore dika tšeo di lokeleditšwego ga se mafelelo a maiteko a seo se bitšwago go aga semelo goba go kgabiša semelo, eupša mafelelo a go šoma ga moya wa Modimo mothong. Bjalo ka ge sehlare se tla enywa dienywa ge se thenetšwe gabotse, le motho o tla bontšha dienywa tša moya ge moya o mokgethwa o šoma ka bolokologi bophelong bja gagwe.​—Psalme 1:​1-3.

15. Ke ka baka la’ng go le bohlokwa go ela hloko dibopego ka moka tša “dienywa tša môya”?

¹⁵ Ntlha e nngwe yeo re swanetšego go e ela hloko ke go diriša ga Paulo lentšu “dienywa” bakeng sa go akaretša dika ka moka tšeo di kgahlišago tšeo a di boletšego.a Moya ga o tšweletše dienywa tše di fapa-fapanego bakeng sa gore re ikgethele seo re se ratago. Dika ka moka tšeo di lokeleditšwego ke Paulo​—lerato, lethabo, khutšo, go se fele pelo, botho, go loka, tumelo, bonolo le boitshwaro​—ke tša bohlokwa ka mo go lekanago, gomme di le gotee di dira gore semelo se sefsa sa Bokriste se kgonege. (Ba-Efeso 4:​24; Ba-Kolose 3:​10) Ka gona, le ge re ka hwetša gore tše dingwe tša dika tše ke tšeo di bonagalago kudu maphelong a rena ka baka la semelo sa rena le ditshekamelo, ke gabohlokwa gore re ele hloko dikarolo ka moka tše di boletšwego ke Paulo. Ka go dira bjalo, re ka bontšha semelo se se swanago le sa Kriste maphelong a rena.​—1 Petro 2:​12, 21.

16. Boikemišetšo bja rena ke bofe go phegeleleng kgolo ya Bokriste, gomme e ka fihlelelwa bjang?

¹⁶ Thuto e bohlokwa yeo re ka ithutago yona tabeng ya Paulo ke gore ka go phegelela kgolo ya Bokriste, morero wa rena ke go ba le tsebo e ntši le go ithuta goba go hlagolela dika tša semelo seo se hlwekišitšwego. Ke go hwetša moya wa Modimo ka ntle le tšhitišo bophelong bja rena. Go fihla bokgoleng bja gore go nagana ga rena le ditiro di arabela mo di išwago ke moya wa Modimo, go fihla bokgoleng bjoo re ba bao ba gotšego moyeng. Re ka fihlelela bjang morero wo? Re swanetše go bula dipelo tša rena le menagano gore di tutuetšwe ke moya wa Modimo. Se se akaretša go ba gona ka mehla le go tšea karolo dibokeng tša Bokriste. Gape re swanetše go ithuta ka mehla le go naganišiša ka Lentšu la Modimo, re dumelele melao ya motheo ya lona go hlahla ditirišano tša rena le ba bangwe le dikgetho le diphetho tšeo re di dirago. Ka gona, ka ntle le pelaelo tšwelopele ya rena e tla bonagala gabotse.

Dira Tšwelopele Bakeng sa go Tumiša Modimo

17. Ke bjang go dira tšwelopele go tswalanywago le go tumiša Tatago rena wa legodimong?

¹⁷ Mafelelong, go dira gore tšwelopele ya rena e bonagale go tliša tumišo le ditheto, e sego go rena eupša go Tatago rena wa legodimong Jehofa yo a dirago gore go kgonege gore re gole moyeng. Bošegong bja pele ga ge a ka bolawa, Jesu o boditše barutiwa ba gagwe gore: “Se Tate a tl’o xo rêtwa ka sôna, ké xe Le enya dienywa tše ntši, Lè e-ba barutiwa ba-ka.” (Johane 15:8) Bobedi ka dienywa tša moya le ka dienywa tša bodiredi bja bona bja Mmušo, barutiwa ba ile ba tliša tumišo go Jehofa.​—Ditiro 11:​4, 18; 13:48.

18. (a) Ke puno efe e thabišago yeo e diregago lehono? (b) Puno ye e tšweletša tlhohlo efe?

¹⁸ Lehono, ditšhegofatšo tša Jehofa di bathong ba gagwe ge ba dutše ba tšea karolo punong ya moya ya lefase ka bophara. Ka nywaga e mentši, batho ba ba sa tšwago go thoma go kopanela ba ka bago 300 000 ngwaga o mongwe le o mongwe ba ineetše go Jehofa le go bontšha boineelo bja bona ka go kolobetšwa ka meetseng. Se se a re thabiša gomme ka ntle le pelaelo se thabiša pelo ya Jehofa. (Diema 27:​11) Lega go le bjalo, bakeng sa gore se e be mothopo wa lethabo o tšwelago pele le tumišo go Jehofa, ka moka bao ba sa tšwago go thoma go kopanela ba swanetše go ‘swara tsela e le ba [Kriste], e be ba ba tsemilego medu, ba ba agilwego godimo ga gagwe, ba ba tiilego tumelong.’ (Ba-Kolose 2:​6, 7) Se se tšweletša tlhohlo e lego gabedi go batho ba Modimo. Ka lehlakoreng le lengwe, ge e ba o sa tšwa go kolobetšwa, na o tla amogela tlhohlo ya go ineela e le gore “xo bônalê xe O tšwêlêla pele”? Ka lehlakoreng le lengwe, ge e ba o be o dutše o le therešong ka lebaka le letelele, na o tla amogela tlhohlo ya go rwala boikarabelo bja go hlokomela go phela gabotse moyeng ga bao ba sa tšwago go thoma go kopanela? Ka mahlakoreng ka bobedi, go nyakega ga go tšwela pele o gola ke mo go kwagalago.​—Ba-Filipi 3:​16; Ba-Hebere 6:1.

19. Ke tokelo le ditšhegofatšo dife tšeo e ka bago tša gago ge e ba o dira gore tšwelopele ya gago e bonagale?

¹⁹ Ditšhegofatšo tše di kgahlišago di letetše bohle bao ba šomago ka thata bakeng sa go dira gore tšwelopele ya bona e bonagale. Gopola mantšu a Paulo a kgothatšago ka morago ga ge a kgothaleditše Timotheo go tšwela pele: “Itôtê O lôtê le thutô. Xe O dira byalo O tlo iphološa, wa phološa le bao ba Xo kwaxo.” (1 Timotheo 4:​16) Ka go katanela go dira gore tšwelopele ya gago e bonagale, le wena o ka ba le karolo tokelong ya go tumiša leina la Modimo le go thabela ditšhegofatšo tša gagwe.

[Mengwalo ya ka tlase]

Na o a Gopola?

• Go gola moyeng go ka bonagatšwa ka ditsela dife?

• Ke mohuta ofe wa tsebo le kwešišo tše di bontšhago go gola?

• Ke bjang go bontšha “dienywa tša môya” go bontšhago tšwelopele ya moya?

• Ke tlhohlo efe yeo re swanetšego go e amogela ge re tšwela pele re gola?

[Seswantšho go letlakala 13]

Go butšwa goba go gola ke mo go bonagalago gabotse

[Seswantšho go letlakala 15]

Re dira tšwelopele ya moya ka go sepedišana le therešo e utolotšwego

[Seswantšho go letlakala 17]

Thapelo e re thuša go tšweletša “dienywa tša môya”