Tumelo ya Gagwe e Kgothatša ba Bangwe

GE Silvia a be a belegwa ka December 1992, o bonagetše e le ngwanenyana yo a tlogago a phetše gabotse. Eupša ge a e-na le nywaga e mebedi, go ile gwa lemogwa gore Silvia o na le cystic fibrosis, e lego bolwetši bjo bo sa alafegego bjo bo bakago koketšego ya go palelwa ke go hema le mathata a go šilwa ga dijo. Gore a lebeletšane le bolwetši bja gagwe, Silvia o nwa diphilisi tše 36 ka letšatši, o diriša dilo tša go thuša go hema e bile o alafša mmeleng. Ka ge maswafo a gagwe a kgona feela go phetha 25 lekgolong ya mošomo wa wona, o swanetše go dula a diriša tanka ya oksitšene, gaešita le ge a e-tšwa ka gae.

Mmagwe, e lego Teresa, o re: “Lega go le bjalo, go a makatša kamoo Silvia a lebeletšanago le bolwetši bjo. Ka baka la tsebo yeo a nago le yona ya Mangwalo, o na le tumelo e tiilego. Tumelo ye e mo thuša go lebeletšana le go nyama ga gagwe gotee le go fokola ga gagwe. O dula a gopola kholofetšo ya Jehofa ya lefase le lefsa, leo go lona go tlago go fodišwa bohle bao ba babjago.” (Kutollo 21:4) Ka dinako tše dingwe ge ba gabo ba nyamile, go myemyela ga Silvia ka go ikholofela go a ba kgothatša. O botša batswadi ba gagwe le kgaetšedi ya gagwe gore: “Bophelo lefaseng le lefsa bo tla tšeela tlaišego ya rena ka moka legato.”

Silvia o botša batho ba bangwe ka ditaba tše dibotse tša Lentšu la Modimo ka mehla gomme bao a bolelago le bona ba lemoga gore sefahlego sa gagwe se bontšha lethabo. Ditho tša phuthego ya Bokriste yeo a kopanelago go yona ya kua Dihlakahlakeng tša Canary le tšona di tloga di thabela go theetša dikarabo tša gagwe le go bona ge a tšea karolo dibokeng. Le gona ka morago ga seboka se sengwe le se sengwe, Silvia o rata go fetša nako a bolela le bana babo le dikgaetšedi tša gagwe tša Bakriste. Botho bja gagwe bjo bo ipiletšago le bja lethabo bo dirile gore batho ka moka ka phuthegong ba mo rate.

Tatagwe, e lego Antonio, o re: “Silvia o re ruta thuto e bohlokwa kudu. Go sa šetšwe mathata ao re nago le ona, bophelo ke mpho e tšwago go Modimo gomme re swanetše go bo tšeela godimo.” Go swana le Silvia, bahlanka ba Modimo ka moka—ba bagolo le ba banyenyane—ba letetše ka phagahlo nako ya ge “xo ka se bê le e a rexo: Ke a babya!”—Jesaya 33:24.

[Seswantšho go letlakala 31]

Silvia o bala temana ya Beibele ge mmagwe a swere tanka ya oksitšene