Batamela Kgaufsi le Modimo
O Kwešiša Bohloko bja Rena
“KWELOBOHLOKO ke bohloko bja gago ka pelong ya-ka.” Ye ke tsela yeo moromiwa yo mongwe yo a tšofetšego yo e lego yo mongwe wa Dihlatse tša Jehofa a kilego a hlalosa seka se sa bohlokwa ka yona. Jehofa Modimo ke mohlala o mogolo wa kwelobohloko. O kwa bohloko bjo bo tlaišago batho ba gagwe. Re ka kgonthišega bjang ka se? Kwelobohloko ya Jehofa e bonagetše gabotse mantšung le medirong ya Jesu nakong ya ge a be a le lefaseng. (Johane 5:19) Ka mohlala, ela hloko tiragalo yeo e hlalositšwego go Johane 11:33-35.
Ge mogwera wa Jesu e lego Latsaro a e-hwa go sa letelwa, Jesu o ile a leba motsaneng wa gabo. Ke mo go kwagalago gore dikgaetšedi tša Latsaro e lego Maria le Mareta di be di nyamile kudu. Jesu o be a tloga a rata lapa le. (Johane 11:5) Ka gona, o be a tla arabela bjang? Pego e re: “Ge Jesu a bona [Maria] a lla le Bajuda bao ba tlilego le yena ba lla, a tsetsela moyeng gomme a huduega; a re: ‘Le mo laditše kae?’ Ba re go yena: ‘Morena tlaa o bone.’ Jesu a ntšha megokgo.” (Johane 11:33-35) Ke ka baka la’ng Jesu a ile a lla? Therešo ke gore mogwera wa gagwe yo a rategago Latsaro o be a hwile, eupša Jesu o be a le kgaufsi le go fetoša boemo bjoo Latsaro a bego a le go bjona ka go mo tsoša bahung. (Johane 11:41-44) Na go be go e-na le selo se sengwe gape seo se ilego sa kgoma maikwelo a Jesu?
Lebelela mantšu a tsopotšwego ka mo godimo gape. Ela hloko gore ge Jesu a bona Maria le bao ba bego ba e-na le yena ba lla, o ile a “tsetsela moyeng” gomme “a huduega.” Mantšu a polelo ya mathomo ao a dirišitšwego mo, a bontšha maikwelo a tseneletšego.a Jesu o be a kgomilwe kudu ke seo a se bonego. Maikwelo a tseneletšego ao a bego a e-na le ona a be a bonala ka ge mahlo a gagwe a be a tletše megokgo. Ka ntle le pelaelo, pelo ya Jesu e be e kgomilwe ke bohloko bjo bo bego bo kwewa ke ba bangwe. Na o kile wa lla ka baka la gore motho yo o mo ratago a lla?—Baroma 12:15.
Kwelobohloko ya Jesu e re thuša go kwešiša dika le ditsela tša Tatagwe, Jehofa. Gopola gore Jesu o ile a bontšha dika tša Tatagwe ka mo go phethagetšego mo a bego a ka re: “Yo a bonego nna o bone le Tate.” (Johane 14:9) Ka gona ge re bala gore “Jesu o ile a lla” re ka kgodišega gore Jehofa o kwa bohloko bjoo barapedi ba gagwe ba bo kwago. Ka kgonthe, bangwadi ba bangwe ba dipuku tša Beibele ba kgonthišetša taba ye. (Jesaya 63:9; Sakaria 2:8) Ruri Jehofa ke Modimo yo botho!
Botho bo a gogela. Ge re nyamile goba re gateletšegile, re batamela motho yo a ka kwešišago boemo bja rena gomme a re bontšha kwelobohloko. Re batamela Jehofa le go feta, Modimo yo a nago le kwelobohloko le yo a kwago bohloko bjo re bo kwago e bile a kwešiša lebaka leo re llago ka lona!—Psalme 56:8.
[Mongwalo wa tlase]
a Lentšu la Segerika leo le fetoletšwego e le “o ile a lla” gantši le bolela “go lla ka setu,” mola lentšu leo le dirišitšwego go hlalosa go lla ga Maria le ba bangwe le ka bolela go “llela godimo, go golola.”