Na o Fela o E-ba le Lehufa? Bana Babo Josefa ba be ba mo Hufegela

ANKE re boleleng ka seo se bolelwago ke go ba le lehufa. Na o kile wa hwetša go le thata go rata motho yo mongwe ka gobane ba bangwe ba itše o lokile, o botse goba o bohlale?a— Se ke seo se ka diregago ge o hufegela motho yo mongwe.

Lehufa le ka ba gona ka lapeng ge e ba batswadi ba rata ngwana yo a itšego go feta yo mongwe. Beibele e re botša ka lapa leo go lona lehufa le ilego la baka bothata bjo bogolo. Anke re hlahlobeng bothata bjo bo bakilwego ke lehufa le seo re ka ithutago sona go seo se diregilego.

Josefa e be e le morwa wa bo-11 wa Jakobo gomme barwarragwe ba be ba mo hufegela. Na o tseba lebaka?— E be e le ka gobane tatago bona, Jakobo, o be a rata Josefa. Ka mohlala, Jakobo o ile a direla Josefa seaparo se sebotse sa mebala. Jakobo o be a rata Josefa ka mo go kgethegilego “ka xobane ó belexwe tat’axwe à šetše a tšofetše” le gona e be e le leitšibulo la mosadi wa gagwe yo a ratwago e lego Ragele.

Beibele e re ge ‘barwarre ba Josefa ba bona tatago bona a mo rata kudu, ba ile ba hloya Josefa.’ Ke moka ka letšatši le lengwe, Josefa o ile a botša ba lapa labo gore o lorile ka moka ba mo khunamela, go akaretša le tatagwe. Beibele e re ‘barwarragwe ba ile ba mo hufegela’ gomme tatagwe le yena o ile a mo omanyetša go ba botša toro e bjalo.—Genesi 37:1-11.

Nakwana ka morago, ge Josefa a be a e-na le nywaga e 17, barwarragwe ba be ba le kgole ba dišitše dinku le dipudi tša bo bona. Ka gona, Jakobo o ile a romela Josefa go yo bona ge e ba dilo di sepelela barwarragwe gabotse. Na o tseba seo bontši bja bona ba bego ba nyaka go se dira ge ba mmona a e-tla?— Ba be ba nyaka go mmolaya! Eupša ba babedi, e lego Rubeni le Juda, ba be ba sa nyake go mmolaya.

Ge bagwebi ba itšego ba feta ba e-ya Egipita, Juda o ile a re: “A re mo rekišeng.” Ba ile ba dira bjalo. Ke moka, ba ile ba bolaya pudi gomme ba tsenya seaparo sa Josefa ka mading a yona. Ka morago, ge ba bontšha tatago bona seaparo seo o ile a lla ka gore: “Ó llwe ke sebata; ruri Josefa ó llwe.”—Genesi 37:12-36.

Ge nako e dutše e-ya, Farao e lego mmuši wa Egipita, o ile a thoma go rata Josefa. Go bile bjalo ka gobane ka thušo ya Modimo, Josefa o ile a kgona go hlalosetša Farao seo se bolelwago ke ditoro tša gagwe tše pedi. Toro ya pele e be e le mabapi le dikgomo tše šupa tšeo di nonnego tšeo di latelwago ke tše šupa tšeo di babjago. Ya bobedi e be e le mabapi le diako tše šupa tšeo di nago le dithoro gotee le tše šupa tše omeletšego tšeo di se nago selo. Josefa o itše ditoro tše ka bobedi di be di bolela gore go tla ba le nywaga e šupa ya puno e botse yeo e tlago go latelwa ke nywaga e šupa ya tlala. Farao o ile a laela gore Josefa a newe boikarabelo bja go boloka dijo nywageng ya puno e botse e le go itokišetša nywaga ya tlala.

Ge tlala e fihla, lapa labo Josefa leo le bego le dula kgole, le be le nyaka dijo. Jakobo o ile a romela barwarre ba Josefa ba lesome Egipita go yo nyaka dijo. Ba ile ba tla pele ga Josefa eupša ba be ba sa mo tsebe. Ka ntle le go ba botša gore ke yena mang, Josefa o ile a leka barwarragwe gomme o ile a lemoga kamoo ba itsholago ka gona ka baka la go mo swara gampe. Ke moka, Josefa o ile a ba botša gore ke yena mang. Ruri ba ile ba thabela go bonana gape gomme ba gokarelana!—Genesi, dikgaolo 40 go ya go 45.

O ka ithuta’ng ka lehufa pegong ye ya Beibele?— Lehufa le ka baka mathata a magolo gaešita le go dira gore motho a nyake go gobatša ngwanabo! Anke re bale Ditiro 5:17, 18 le Ditiro 7:54-59 gomme re bone seo batho ba ilego ba se dira go barutiwa ba Jesu ka baka la lehufa.— Ka morago ga go bala mangwalo a, na o bona lebaka leo ka lona re swanetšego go ba šedi gore re se be le lehufa?—

Josefa o phetše go fihlela a e-ba le nywaga e 110. O ile a godiša bana bao ba ilego ba mmelegela ditlogolo, ke moka le tšona tša mmelegela ditlogo-tlogolwana. Re ka kgodišega gore gantši Josefa o be a ba ruta gore ba ratane le go phema go ba le lehufa.—Genesi 50:22, 23, 26.