Batamela Kgaufsi le Modimo
Bohlatse bjo Bogolo Kudu bja Lerato la Modimo
ABORAHAMA o be a rata Modimo. Mopatriareka yoo, yo a botegago o be a bile a rata Isaka, morwa wa botšofading bja gagwe. Eupša ge Isaka a be a e-na le nywaga e ka bago e 25, Aborahama o ile a lebeletšana le teko yeo e bego e thulana le maikwelo ao ka tlhago tate a bago le ona—Modimo o ile a mmotša gore a dire sehlabelo ka morwa wa gagwe. Lega go le bjalo, taba ye ga se ya feleletša ka lehu la Isaka. Pele Aborahama a ka dira sehlabelo ka morwa wa gagwe, Modimo o ile a tsena ditaba gare ka go romela morongwa wa gagwe. Pego ye ya Beibele, yeo e ngwadilwego go Genesi 22:1-18, e re nea tlhasenyana ya boporofeta ya go bona tsela yeo Modimo a re ratago ka yona.
Temana ya pele e re: ‘Modimo o ile a leka Aborahama.’ Aborahama o be a e-na le tumelo, eupša ga bjale tumelo ya gagwe e be e tla lekwa go feta le ge e le neng pele. Modimo o itše: “Tšea morwa wa xaxo e lexo o tee, yo O mo rataxo, yêna Isaka . . . O mo dirê sehlabêlô thabeng ya xôna, ye ke tl’o xo Xo laetša yôna.” (Temana 2) Gopola, Modimo ga a dumelele gore bahlanka ba gagwe ba lekwe go feta kamoo ba ka kgonago go kgotlelela. Ka gona, teko ye e be e bontšha kgodišego yeo Modimo a nago le yona go Aborahama.—1 Bakorinthe 10:13.
Aborahama o ile a kwa Modimo ka ntle le tika-tiko. Re bala gore: “Ka la ka moswana Aborahama a tsoxa, a tlêma pôkôlô ya xaxwe, a hlaola ba babedi ba bahlanka ba xaxwe, le yêna Isaka; a phapha dikxong tša sehlabêlô, ’me a sepela.” (Temana 3) Go molaleng gore Aborahama o be a se a botša motho ka teko yeo.
Go ile gwa latela leeto la matšatši a mararo, leo le ilego la mo nea sebaka sa go nagana ka mo go tseneletšego. Eupša seo ga se sa fokodiša maikemišetšo a Aborahama. Tumelo ya gagwe e ile ya bontšhwa ke mantšu ao a a boletšego. Ge a bona thaba yeo Modimo a bego a e kgethile e le kua kgojana, o ile a botša bahlanka ba gagwe gore: “Šalang mó . . . , nna le lesoxana lé re sa ya kwa pele; re tla re xe re rapetše ra boêla xo lena.” Ge Isaka a botšiša gore nku ya sehlabelo e kae, Aborahama o ile a mmotša gore: “Modimo ó tlo inyakêla nku.” (Ditemana 5, 8) Aborahama o be a letetše go boa le morwa wa gagwe. Ka baka la’ng? Ka gobane o be “a tšea gore Modimo o be a tla kgona go mo tsoša [Isaka] gaešita le bahung.”—Baheberu 11:19.
Ge ba le godimo ga thaba, ge Aborahama a tšere “thipa, xore a hlabê morwa wa xaxwe,” morongwa o ile a thiba letsogo la gagwe. Ke moka, Modimo o ile a mo nea kgapana yeo e bego e tantšwe ka dinaka sethokgweng, e le gore Aborahama a ka e neela e le sehlabelo “bakeng sa morwa wa xaxwe.” (Ditemana 10-13) Mahlong a Modimo go be go le bjalo ka ge eka Isaka o be a dirilwe sehlabelo e le ka kgonthe. (Baheberu 11:17) Seithuti se sengwe se hlalosa gore: “Mahlong a Modimo, go ikemišetša go dira sehlabelo moo, go be go swana le go se dira e le ka kgonthe.”
Go ba le kgodišego ga Jehofa go Aborahama go ile gwa hlatselwa e le mo go nepagetšego. Le gona, go bota Jehofa ga Aborahama go ile gwa putswa, ka gobane Modimo o ile a boeletša gaešita le go katološa kgwerano ya gagwe le Aborahama, e lego kgwerano yeo e bego e holofetša batho ba ditšhaba tšohle ditšhegofatšo.—Ditemana 15-18.
Mafelelong, Modimo o ile a efoša Aborahama go dira sehlabelo seo Yena ka morago a bego a ka se efoge go se dira. Go ikemišetša ga Aborahama go gafa Isaka go ile gwa swantšhetša e sa le pele go gafa ga Modimo Morwa wa gagwe yo a tswetšwego a nnoši, Jesu, bakeng sa dibe tša rena. (Johane 3:16) Sehlabelo sa Kriste ke bohlatse bjo bogolo kudu bja lerato la Jehofa go rena. Ka ge Modimo a gafile mo gokaalo bakeng sa rena, re dira gabotse go ipotšiša gore, ‘Ke boikgafo bofe bjoo ke ikemišeditšego go bo dira e le gore ke thabiše Modimo?’