Beibele e Fetoša Maphelo

Ke’ng seo se tutueditšego mosadi yo a bego a rekiša ditaamane ka tsela e sego molaong e bile a utswetša mothwadi wa gagwe gore e be mošomi yo a botegago? Ke’ng seo se thušitšego mosadi yo a lekilego go ipolaya ka makga a mabedi gore a hwetše morero wa bophelo? Ke bjang motho yo a nwago bjala le go diriša dihlare-tagi gampe a ilego a hwetša matla a go tlogela mekgwa e gobatšago yeo a bego a e lemaletše? Ela hloko seo ba se bolelago.

PEGO YA BOPHELO BJA GAGWE

LEINA: MARGARET DEBRUYN

NYWAGA: 45

NAGA: BOTSWANA

BOPHELO BJA PELE E E-BA MOKRISTE: MOGWEBI WA DITAAMANE KA TSELA E SEGO MOLAONG LE LEHODU

BOPHELO BJA-KA BJA NAKONG E FETILEGO: Tate o be a e-tšwa Jeremane, eupša o ile a ba modudi wa South-West Africa (yeo ga bjale e bitšwago Namibia). Mma o be a e-tšwa Botswana, molokong wa Mangologa. Nna ke belegetšwe toropong ya Gobabis kua Namibia.

Nywageng ya bo-1970, mmušo wa Afrika-Borwa o ile wa thoma go buša Namibia gomme wa thoma go diriša melao ya kgethollo ditoropong le metsaneng ka mo go feletšego. Ka gobane batswadi ba-ka e be e le motho yo mošweu le motho-moso, ba ile ba gapeletšwa gore ba arogane. Ka gona, mma o ile a boela Ghansi kua Botswana a e-na le nna gotee le bana bešo le dikgaetšedi.

Ka 1979 ke ile ka hudugela Lobatse kua Botswana gomme ka dula le batswadi ba-ka ba bagodiši ge ke sa dutše ke feleletša sekolo. Ka morago, ke ile ka hwetša mošomo wa go šoma ka ofising lefelong la go lokiša dikoloi. Ge ke gola ke be ke dumela gore Modimo ga a direle batho selo, gore o swanetše go dira seo o ka se kgonago—go sa šetšwe gore ke se se nepagetšego goba se se fošagetšego—gore o itlhokomele le go hlokomela lapa la gago.

Ka ge ke be ke neilwe boikarabelo bjo bogolo mošomong, ke ile ka diriša sebaka seo go utswetša mothwadi wa-ka dikarolo tša dikoloi (spare parts). Nako le nako ge setimela se be se feta toropong bošego, nna le batho bao ke utswago le bona re be re se namela gomme re utswa selo le ge e le sefe seo re ka se hwetšago. Le gona, ke ile ka thoma go gweba ka ditaamane, gauta le bronze ka tsela e sego molaong. Ke ile ka thoma go diriša dihlare-tagi gampe, ka ba bogale kudu gomme ka ratana le masogana a mantši.

Ke moka ka 1993, ke ile ka hwetšwa ke utswa gomme ka lahlegelwa ke mošomo. Batho bao ke bego ke nagana gore ke bagwera ba-ka ba ile ba ntahla, ba boifa gore le bona ba tla swarwa. Seo ba se dirilego se ile sa nkweša bohloko gomme ke ile ka phetha ka go se sa bota motho le ge e le ofe.

KAMOO BEIBELE E FETOTŠEGO BOPHELO BJA-KA: Ka 1994, ke ile ka kopana le Tim le Virginia, e lego Dihlatse tše pedi tša Jehofa tšeo e bego e le baromiwa. Ba be ba nketela lefelong leo ga bjale ke bego ke šoma go lona gomme ba nthuša go ithuta Beibele ka nako ya matena. Ka morago, ge ke be ke bona gore nka ba bota, ke ile ka ba dumelela go tla legaeng la-ka go ithuta le nna.

Go se go ye kae ke ile ka lemoga gore e le gore ke kgahliše Modimo, ke swanetše go dira diphetogo tše itšego tseleng ya-ka ya bophelo. Ka mohlala, ke ithutile go 1 Bakorinthe 6:9, 10 gore “ge e le diotswa, . . . goba mahodu, goba batho ba megabaru, goba matagwa, goba ba maroga, goba bahlakodi ba ka se je bohwa bja mmušo wa Modimo.” Ganyenyane-ganyenyane ke ile ka lahla mekgwa ya-ka e mebe. Ke ile ka kgaotša go utswa. Ke ile ka kgaogana le disenyi tšeo ke gotšego le tšona. Ke moka, ka matla a Jehofa, ke ile ka kgaogana le masogana ao ke bego ke ratana le ona.

KAMOO KE HOLEGILEGO KA GONA: Ka maiteko a oketšegilego, ke ile ka ithuta go laola kgalefo ya-ka le go se kgadimole bana ba-ka ge ba dirile phošo. (Baefeso 4:31) Ke leka go rarolla mathata ka khutšo. Mokgwa wo wa poledišano o dira gore go be le mafelelo a mabotse gomme o dira gore re be le tswalano e tiilego bjalo ka lapa.

Bagwera ba-ka ba nakong e fetilego go akaretša le baagišani ba-ka, ba ithutile gore ba ka mpota. Ke fetogile mošomi yo a botegago yo a kgonago go hlokomela thoto le tšhelete gabotse. Ka go rialo, ke kgona go iphediša mola ka nako e swanago ke fetša nako e ntši ke thuša ba bangwe go ithuta Beibele. Ke dumelelana ka pelo ka moka le mantšu a Diema 10:22 a rego: “Khumišô ké dithšexofatšô tša Morêna; xa e tlale ka xo itapiša.”

PEGO YA BOPHELO BJA GAGWE

LEINA: GLORIA ELIZARRARÁS DE CHOPERENA

NYWAGA: 37

NAGA: MEXICO

BOPHELO BJA PELE E E-BA MOKRISTE: O ILE A LEKA GO IPOLAYA

BOPHELO BJA-KA BJA NAKONG E FETILEGO: Ke goletše Naucalpan kua Mexico State, e lego karolo yeo go yona go dulago batho ba humilego. Ke be ke le lerabele gomme ke rata go ya meletlong go tloga ke sa le yo monyenyane. Ke thomile go kgoga ke e-na le nywaga e 12, ka thoma go nwa ke e-na le nywaga e 14 gomme ka thoma go diriša dihlare-tagi ke e-na le nywaga e 16. Nywaga e sego kae ka morago, ke ile ka tloga gae. Bontši bja bagwera ba-ka ba be ba e-tšwa malapeng ao a se nago lerato gomme ba be ba bethwa goba ba hlabja ka mantšu. Go nna bophelo bo be bo bonala bo se na morero gomme ke ile ka leka go ipolaya ka makga a mabedi.

Ge ke be ke e-na le nywaga e 19 ke ile ka thoma go šoma ke le motlelara. Ka baka leo, ke ile ka gwerana le bo-radipolitiki le batho ba tša boithabišo. Mafelelong ke ile ka nyalwa gomme ka ba le bana, eupša ke nna ke bego ke dira diphetho ka moka ka lapeng la-ka. Le gona, ke ile ka tšwela pele go kgoga le go nwa gomme ka tšwela pele ka bophelo bja-ka bja go dula ke e-ya meletlong. Ke be ke rata maroga le go dira meswaso e gobogilego. Ke be ke akgofela go galefa.

Bontši bja batho bao ke bego ke kgetha go gwerana le bona ba be ba phela bophelo bjo swanago le bja-ka. Go bona go be go bonala e-ka ke na le dilo ka moka. Eupša ke ile ka tšwela pele go ikwa ke se na morero bophelong.

KAMOO BEIBELE E FETOTŠEGO BOPHELO BJA-KA: Ke ile ka thoma go ithuta Beibele le Dihlatse tša Jehofa ka 1998. Beibele e ile ya nthuta gore bophelo bo na le morero. Ke ile ka ithuta gore Jehofa Modimo o ikemišeditše go tsošološa lefase gore e be Paradeise, gore o tla tsoša bahu le gore nka ba karolo ya bokamoso bjoo.

Ke ile ka ithuta gape gore tsela ya go bontšha gore ke rata Modimo ke ka go mo kwa. (1 Johane 5:3) Mathomong go be go se bonolo go dira bjalo ka gobane le ka mohla ke be ke se ka ka ka amogela tlhahlo go motho le ge e le ofe. Lega go le bjalo, mafelelong ke ile ka dumela gore nka se kgone go tšwela pele ke itaola. (Jeremia 10:23) Ke ile ka rapela Jehofa gore a ntlhahle. Ke ile ka rapela gore a nthuše go dumelelanya bophelo bja-ka le ditekanyetšo tša gagwe le gore ke rute bana ba-ka go phela ka tsela e fapanego le yeo ke bego ke phela ka yona pele.

Go be go le thata gore ke dire diphetogo tšeo di bego di nyakega, eupša ke ile ka thoma go diriša keletšo yeo e hwetšago go Baefeso 4:22-24 e rego: “Le lahle motho wa kgale yo a dumelelanago le tsela ya lena ya pele ya boitshwaro . . . le apare motho yo mofsa yo a bopilwego go ya ka thato ya Modimo tokong ya therešo le potegong.” Go nna, go apara motho yo mofsa go be go bolela go lahla mekgwa e šilafatšago e swanago le go kgoga gomme ke ile ka swanelwa ke go ithuta polelo e mpsha e se nago maroga. Go ntšere mo e nyakilego go ba nywaga e meraro gore ke dire diphetogo tše nyakegago e le gore nka kolobetšwa bjalo ka yo mongwe wa Dihlatse tša Jehofa.

Go oketša moo, ke ile ka thoma go tšeela godimo boikarabelo bja-ka bjalo ka mosadi le mma. Ke ile ka thoma go diriša keletšo yeo e lego go 1 Petro 3:1, 2 e rego: “Lena basadi ikokobeletšeng banna ba lena, e le gore, ge e ba go e-na le bao ba sa kwego lentšu, ba tle ba ruiwe ka ntle le lentšu ka boitshwaro bja basadi ba bona, ka baka la ge ba bile dihlatse tše di bonego ka mahlo tša boitshwaro bja lena bjo bo sekilego gotee le tlhompho e tseneletšego.”

KAMOO KE HOLEGILEGO KA GONA: Ke leboga Jehofa ka gobane ga bjale ke a tseba gore bophelo bo na le morero. Ke a ikwa gore ke motho yo mokaone gomme ke kgona go godiša bana ba-ka ka tsela e botse. Nako le nako pelo ya-ka e a nkahlola ka baka la boitshwaro bja-ka bja nakong e fetilego, eupša Jehofa o tseba pelo ya-ka. (1 Johane 3:19, 20) Ka ntle le pelaelo, go phela ka ditekanyetšo tša Beibele go ntšhireleditše kotsing gomme go nneile khutšo ya monagano.

PEGO YA BOPHELO BJA GAGWE

LEINA: JAILSON CORREA DE OLIVEIRA

NYWAGA: 33

NAGA: BRAZIL

BOPHELO BJA PELE E E-BA MOKRISTE: MODIRIŠI WA DINO-TAGI LE DIHLARE-TAGI GAMPE

BOPHELO BJA-KA BJA NAKONG E FETILEGO: Ke belegetšwe Bagé, e lego motse wa kua Brazil o nago le badudi ba ka bago 100 000 kgaufsi le mollwane wa Brazil le Uruguay. Batho ba motseng wo ba be ba iphediša ka go lema le go rua dikgomo. Ke goletše seleteng seo se bego se diila, moo dihlopha tša disenyi di bego di tladitše bošoro le moo go bego go tlwaelegile gore bafsa ba diriše dino-tagi le dihlare-tagi gampe.

Ka morago ga go tlogela sekolo, ke ile ka thoma go nwa, go kgoga patše le go theetša mmino wo o nago le moretheto wa godimo. Ke be ke sa dumele go Modimo. Ke be ke dumela gore tlaišego le tlhaka-tlhakano yeo e lego gona mo lefaseng ke bohlatse bja gore Modimo ga a gona.

Ke be ke bapala katara e bile ke ngwala dikoša gomme gantši go bala ga-ka puku ya Beibele ya Kutollo go be go ntutueletša go ngwala dikoša. Sehlopha sa-ka sa mmino ga se sa ka sa atlega kamoo ke bego ke letetše, ka gona ke ile ka thoma go lemalela dihlare-tagi tše kotsi kudu. Ke be ke se na taba le ge e ba nka hwa ka baka la go diriša dihlare-tagi ka mo go feteletšego. Bontši bja diopedi tšeo ke bego ke di tšeela godimo di be di bolailwe ke go diriša dihlare-tagi ka mo go feteletšego.

Ke be ke kgona go reka dihlare-tagi ka go adima tšhelete go makgolo wa-ka yo a nkgodišitšego. Ke be ke mmotša maaka ge a be a mpotšiša gore ke dira eng ka tšhelete yeo. Se sebe le go feta, ke be ke dirišana le meoya. Ke be ke kgahlwa kudu ke maleatlana, ke nagana gore a tla nthuša go kaonafatša mmino wa-ka.

KAMOO BEIBELE E FETOTŠEGO BOPHELO BJA-KA: Ka morago ga go thoma go ithuta Beibele le go ya dibokeng tša Dihlatse tša Jehofa, boemo bja-ka bja kgopolo bo ile bja thoma go fetoga. Ganyenyane-ganyenyane ke ile ka thoma go rata go phela le go thaba. Ke tutueditšwe ke tsela ya-ka e mpsha ya go nagana, ke ile ka dira phetho ya go fokotša moriri wa-ka o motelele. Ke be ke o tlogetše gore o gole e le pontšho ya go se kgotsofale ga-ka le borabele. Ke moka ke ile ka lemoga gore ge e ba ke nyaka go amogelwa ke Modimo, ke swanetše go kgaotša go diriša dino-tagi le dihlare-tagi gampe gomme ke kgaotše go kgoga. Le gona, ke ile ka bona bohlokwa bja gore ke fetoše mmino o ke o theetšago.

Lekga la pele ge ke be ke e-ya dibokeng tša Dihlatse tša Jehofa, ke ile ka bona Lengwalo leo le bego le pharilwe go le lengwe la maboto. E be e le Lengwalo la Diema 3:5, 6 gomme le be le balega ka gore: “Bôʹta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” Go nagana ka lengwalo leo go ile gwa nkgodiša gore Jehofa o tla nthuša go fetoša bophelo bja-ka ge e ba ke mo dumelela.

Lega go le bjalo, go fetoša tsela ya-ka ya bophelo yeo e bego e le kgale ke e latela le go tlogela dilo tšeo ke bego ke di lemaletše go be go le thata kudu go swana le go kgaola seatla sa-ka. (Mateo 18:8, 9) Ke be ke nka se kgone go dira diphetogo tše ganyenyane-ganyenyane. Ke be ke tseba gore go ka se kgonege gore ke dire bjalo. Ka gona, ke ile ka tlogela mekgwa yeo ka moka ka nako e tee. Le gona, ke ile ka phema mafelo le batho bao ba ka dirago gore ke boele mekgweng ya-ka ya kgale e kotsi.

Ke ile ka ithuta go thabela dilo tšeo ke di fihlelelago letšatši le letšatši go ena le go naganišiša ka dinako tše kwešago bohloko. Ke be ke ikwa gore ke tla ba le boemo bjo bobotse pele ga Jehofa ge e ba nka hlweka mmeleng, boitshwarong le borapeding. Ke ile ka rapela gore Jehofa a nthuše gore ke se lebelele morago bophelong bja-ka bja nakong e fetilego, eupša ke lebelele pele bophelong bja nakong e tlago gomme o ile a nthuša. Ka dinako tše dingwe ke be ke boela mekgweng ya-ka ya pele. Eupša, ke ile ka phegelela thutong ya-ka ya Beibele le morutiši wa-ka gaešita le ge ka dinako tše dingwe ke be ke swerwe ke papalase.

Go ithuta therešo ka Modimo go tšwa Beibeleng—gore o na le taba le rena re le motho ka o tee ka o tee, gore o tla fediša bodumedi bja maaka le gore ga bjale o thekga modiro wa lefase ka bophara wa go bolela le batho ka Beibele—go be go kwagala go nna. (Mateo 7:21-23; 24:14; 1 Petro 5:6, 7) Ditaba tše ka moka di be di e-na le tlhaologanyo. Mafelelong, ke ile ka phetha ka go neela bophelo bja-ka go Modimo. Ke be ke nyaka go mmontšha tebogo bakeng sa tšohle tšeo a ntiretšego tšona.

KAMOO KE HOLEGILEGO KA GONA: Ga bjale ke ikwa ke e-na le morero bophelong. (Mmoledi 12:13) Le gona, go e na le go hula lapa la-ka, ke kgona go le thuša. Ke ile ka botša makgolo dilo tše dibotse tšeo ke ithutilego tšona Beibeleng gomme ga bjale o neetše bophelo bja gagwe go Jehofa. Ditho tše mmalwa tša lapa lešo gotee le yo mongwe yo e bego e le setho sa sehlopha sa-ka sa mmino ba dirile se swanago.

Ga bjale ke nyetše gomme nna le mosadi wa-ka re fetša nako e ntši re thuša ba bangwe go ithuta Beibele. Ke ikwa ke šegofaditšwe kudu ka gobane ke ithutile go ‘bota Jehofa ka pelo ya-ka ka moka.’

[Ntlhakgolo go letlakala 29]

“Ganyenyane-ganyenyane ke ile ka thoma go rata go phela le go thaba”