Go Tswalwa Lefsa​—Go Bohlokwa Gakaaka’ng?

POLEDIŠANONG ya gagwe ka moka le Nikodemo, Jesu o gateletše gore go tswalwa lefsa, goba go tswalwa gape, go bohlokwa kudu. O hlalositše seo bjang?

Ela hloko kamoo Jesu a ilego a gatelela bohlokwa bja go tswalwa lefsa ge a be a boledišana le Nikodemo. O boletše gore: “Ka ntle le gore motho a tswalwe gape, a ka se ke a bona mmušo wa Modimo.” (Johane 3:3) Dipolelwana tše rego “ka ntle le gore” le “a ka se ke a” di gatelela go nyakega ga go tswalwa lefsa. Ka mohlala: Ge e ba motho a re, “Ka ntle le gore letšatši le hlabe, go ka se be le mosegare,” o ra gore go nyakega gore letšatši le hlabe e le gore go be le mosegare. Ka tsela e swanago, Jesu o boletše gore go tswalwa gape go tloga go nyakega e le gore go ‘bonwe Mmušo wa Modimo.’

Sa mafelelo, ge a dira eka o tloša pelaelo le ge e le efe ka taba ye, Jesu o boletše gore: “Le swanetše go tswalwa gape.” (Johane 3:7) Go molaleng gore go ya ka Jesu, go tswalwa gape go bohlokwa—ke senyakwa—gore motho a ‘tsene mmušong wa Modimo.’—Johane 3:5.

Ka gobane Jesu o be a lebelela go tswalwa lefsa e le taba e bohlokwa kudu, Bakriste ba swanetše go kgonthišetša gore ba kwešiša taba ye ka mo go nepagetšego. Ka mohlala, na o nagana gore Mokriste a ka kgetha go tswalwa gape?

[Ntlhakgolo go letlakala 5]

“Ka ntle le gore letšatši le hlabe, go ka se be le mosegare”