Na Beibele e ka Kwešišwa?

“Lapa lešo le be le bala Beibele Sontaga se sengwe le se sengwe. Seo ke be ke sa se thabele gakaalo. Ke be ke dumela gore Beibele ke Lentšu la Modimo, eupša ke be ke thatafalelwa ke go kwešiša bontši bja seo ke bego ke se bala.”—Steven, Brithania.

“Ge ke be ke e-na le nywaga e 17, ke ile ka leka go bala Beibele. Ke ile ka thatafalelwa ke go e kwešiša, ka gona ka kgaotša go e bala.”—Valvanera, Sepania.

“Ke ile ka bala Beibele gatee ka gobane ke be ke nagana gore bjalo ka Mokatholika, ke swanetše go e bala. Go ntšere nywaga e meraro go e fetša! Eupša ke ile ka thatafalelwa ke go e kwešiša.” —Jo-Anne, Australia.

BEIBELE e sa dutše e le puku e tsebjago kudu lefaseng. E tšwela pele e rekwa go feta dipuku tše dingwe ka moka, e hwetšagala go batho ba bantši, ka maleme a mantši le ka dibopego tše dintši go feta le ge e le neng pele. Lega go le bjalo, ba bantši bao ba nago le Beibele ba thatafalelwa ke go e kwešiša. Na le wena o ikwa ka tsela yeo?

Na Mongwadi o Nyaka Gore re Kwešiše Lentšu la Gagwe?

Beibele e re: “Lengwalo ka moka le buduletšwe ke Modimo.” (2 Timotheo 3:16) Ee, Jehofa Modimo ke Mongwadi wa Beibele. Na o nyaka gore re kwešiše Lentšu la gagwe? Goba na ka boomo o dirile gore Beibele e se ke ya kwešišwa ke batho ka moka eupša e kwešišwe feela ke batho ba itšego ba kgethilwego, ba bjalo ka baruti goba diithuti tša Beibele?

Ela hloko ditemana tše di latelago tša Beibele:

“Taêlô yé ke Xo laêlaxo yôna lehono xa e Xo šite, xa e kxolê le wêna.”—Doiteronomio 30:11.

“Lentšu la xaxo xe le bulwa le a bônêxêla, le hlalefiša ba hlôkaxo tsebô.”—Psalme 119:130.

“Ka yona nako yeo, [Jesu] a thaba kudu ka moya o mokgethwa gomme a re: ‘Ke go tumiša phatlalatša, wena Tate, Morena wa legodimo le lefase, gobane o utetše ba bohlale le ba tlhaologanyo dilo tše ka kelohloko gomme wa di utollela bana.’”—Luka 10:21.

Ee, Mongwadi wa Beibele o nyaka gore o kwešiše Lentšu la gagwe! Lega go le bjalo, taba ke gore batho ba bantši ba botegago ba thatafalelwa ke go kwešiša puku ye. Ke’ng seo se ka thušago? Dihlogo tše di latelago di bolela ka ditšhišinyo tše tharo tšeo di ka go thušago go kwešiša Beibele.