Moya o Mokgethwa ke Eng?

JESU o kile a botšiša barutiwa ba gagwe gore: “Ke tate ofe mo gare ga lena yo e ka rego ge morwa wa gagwe a kgopela hlapi, yena a mo nea noga go e na le hlapi? Goba ge e ba a bile a kgopela lee, a ka mo neago phepheng?” (Luka 11:11, 12) Bana ba Galilea ba be ba thabela go ja mae le dihlapi; ba be ba tseba seo ba bego ba se nyaka.

Jesu o boletše gore re swanetše go tšwela pele re kgopela moya o mokgethwa re sa kgaotše, go swana le ngwana yo a swerwego ke tlala ge a kgopela dijo. (Luka 11:9, 13) Go kwešiša seo moya o mokgethwa o lego sona go tla re kgontšha go kwešiša tema e bohlokwa yeo o ka e kgathago maphelong a rena. Ka gona, a re thomeng ka go hlahloba seo Beibele e re rutago sona mabapi le moya o mokgethwa.

“Matla a Yo Godimo-dimo”

Mangwalo a bolela ka mo go kwagalago gore moya o mokgethwa ke matla ao Modimo a a dirišago go phethagatša thato ya gagwe. Ge morongwa Gabariele a be a tsebiša Maria gore o be a tlo ba le ngwana gaešita le ge e be e le kgarebe, morongwa o mmoditše gore: “Moya o mokgethwa o tla theogela go wena, gomme matla a Yo Godimo-dimo a tla go aparetša. Ka baka leo, le yo a tlago go belegwa o tla bitšwa yo mokgethwa, Morwa wa Modimo.” (Luka 1:35) Go ya ka mantšu a Gabariele, go na le kgokagano magareng ga moya o mokgethwa le “matla a Yo Godimo-dimo.”

Kgopolo e swanago e hwetšwa gape karolong e nngwe ya Beibele. Moporofeta Mika o itše: “Xe e le nna, ka kxonthe ke tletše matla a Môya wa Morêna.” (Mika 3:8) Jesu o holofeditše barutiwa ba gagwe gore: “Le tla amogela matla ge moya o mokgethwa o fihla godimo ga lena.” (Ditiro 1:8) Le gona moapostola Paulo o boletše ka “matla a moya o mokgethwa.”—Baroma 15:13, 19.

Ka gona, re ka fihlelela phetho efe go ya ka seo re šetšego re se kwele? Go na le kgokagano ya kgaufsi kudu magareng ga moya o mokgethwa le matla a Modimo. Moya o mokgethwa ke tsela yeo Jehofa a dirišago matla a gagwe ka yona. Ge e bewa ka go lebanya, moya o mokgethwa ke matla ao Modimo a a dirišago, goba matla a šomago. Matla ao ruri ke a magolo! Ga re kgone go kwešiša matla ao a nyakegago bakeng sa go hlola legohle ka moka ga lona. Ka moporofeta Jesaya, Jehofa o neile tšhišinyo ya gore re naganišiše ka se se latelago: “Llalang Le bônê tša kwa xodimo; ké mang e a di hlodilexo, a di nthša byalo ka mohlape wo o badilwexo? a di bitša tšohle ka maina, mo xo boati byo bokaakaa xwa se hlôkwê le setee, ka xobane è le yo matla a maxolo.”—Jesaya 40:26.

Ka go rialo, Beibele e bontšha gore legohle, go akaretša le thulaganyo le go dumelelana ga lona, le gona ka baka la “matla a maxolo” a Modimo Ramatla-ohle. Ke mo go kwagalago gore matla a šomago a Modimo ke a magolo-golo le gore go ba gona ga rena go ithekgile ka ona.—Bona lepokisi le le rego “Moya o Mokgethwa o a Šoma.”

Jehofa a ka diriša moya wa gagwe o mokgethwa go dira ditiro tše dikgolo, go swana le ge a be a hlola legohle. Eupša gape a ka a diriša bakeng sa go thuša batho ba gagwe. Beibele e tletše ka ditšhupetšo tša kamoo matla a šomago a Modimo a ilego a nea bahlanka ba gagwe ba lefaseng matla.

“Moya wa Jehofa o go Nna”

Bodiredi bja Jesu bo re bontšha ka tsela e kgahlišago tsela yeo ka yona moya o mokgethwa wa Modimo o ka neago bahlanka ba gagwe matla. Jesu o boditše Banatsaretha gore: “Moya wa Jehofa o go nna.” (Luka 4:18) Ke’ng seo Jesu a ilego a se fihlelela ge a be a le “matleng a moya”? (Luka 4:14) O ile a fodiša mohuta o mongwe le o mongwe wa bolwetši, a homotša maphoto a galefilego a lewatle, a fepa dikete tša batho ka dinkgwa le dihlapi tše sego kae, a ba a tsoša le bahu. Moapostola Petro o hlalositše Jesu e le “motho yo Modimo a [mmonagaditšego] phatlalatša ka mediro e matla le ka dika le dipontšho tšeo Modimo a di dirilego ka yena.”—Ditiro 2:22.

Gona bjale moya o mokgethwa ga o sa tliša mehlolo e bjalo. Go e na le moo, o ka re direla dilo tše di makatšago. Jehofa o nea bahlanka ba gagwe moya o mokgethwa ka go rata, bjalo ka ge Jesu a ile a kgonthišetša barutiwa ba gagwe. (Luka 11:13) Ka baka leo, moapostola Paulo o be a ka bolela gore: “Dilong tšohle ke na le matla ka baka la yo a mphago matla.” (Bafilipi 4:13) Na moya o mokgethwa o ka kgatha tema e bjalo bophelong bja gago? Sehlogo se se latelago se tla araba potšišo yeo.

[Lepokisi/​Seswantšho go letlakala 5]

Lebaka leo ka Lona Moya o Mokgethwa e Sego Motho

Beibele e bapiša moya o mokgethwa le meetse. Ge a be a holofetša batho ba gagwe ditšhegofatšo tša nakong e tlago, Modimo o itše: “Naxa ye e nyorilwexo ke e thšêla meetse, mo xo omilexo ke iša dinokana. Peu ya xaxo ke tlo e thšêla môya wa-ka; mahloxeding a xaxo ke tlo iša thšexofatšô ya-ka.”—Jesaya 44:3.

Ge Modimo a tšhela moya wa gagwe go bahlanka ba gagwe, ba “tlala moya o mokgethwa” goba ba “[tlatšwa] moya o mokgethwa.” Jesu, Johane Mokolobetši, Petro, Paulo, Baranaba le barutiwa bao ba ilego ba bokana ka letšatši la Pentekoste ya 33 C.E. ka moka ba hlaloswa e le bao ba ilego ba tlala, goba ba tlatšwa, moya o mokgethwa.—Luka 1:15; 4:1; Ditiro 4:8; 9:17; 11:22, 24; 13:9.

Ela hloko taba ye: Na motho a ka ‘tšhelwa’ bathong ba fapa-fapanego? Na o ka bolela gore motho o tee a ka “tlala” sehlopheng ka moka sa batho? Seo ga se na tlhaologanyo. Beibele e bolela ka batho ba tlala ka bohlale, kwešišo, goba gaešita le ka tsebo e nepagetšego, eupša ga go na moo e bolelago ka motho yoo a tlalago ka motho yo mongwe.—Ekisodo 28:3; 1 Dikxoši 7:14; Luka 2:40; Bakolose 1:9.

Lentšu la Segerika leo le fetoletšwego e le “moya” ke pneuʹma, yeo gape e fetišago kgopolo ya matla a sa bonagalego. Go ya ka Expository Dictionary of New Testament Words ya Vine, lentšu pneuʹma “le šupa moya o fokago . . . le mohemo; ke moka, la šupa moya, woo go swana le moya o fokago, o sa bonagalego, o ka se swaregego e bile e le o matla.”

Ka gona, go molaleng gore moya o mokgethwa ga se motho.a

[Mongwalo wa tlase]

[Mothopo]

Photodisc/SuperStock