O be a Ratwa ke Modimo le ke Bagwera ba Gagwe

LEHONO ga go na motho yo a tsebago leina la gagwe. O tsebja feela ka leina la tatagwe, Jefeta. A re lebeleleng ka Beibeleng gomme re ithute ka bona. Re tla lemoga gore morwedi wa Jefeta o be a ratwa ke Modimo gotee le ke bagwera ba gagwe.

Re ka bala mabapi le Jefeta le morwedi wa gagwe ka Beibeleng go Baahlodi kgaolo 11. Ka ge Jefeta e be e le mohlanka yo a botegago wa Modimo, ga go pelaelo gore o be a ahlaahla Mangwalo ka mehla le morwedi wa gagwe.

Jefeta o phetše pele ga ge batho ba Modimo, Baisiraele, ba kgopela kgoši ya motho gore e ba buše. Jefeta e be e le monna yo matla yo a bego a kgona go lwa. Ka gona Baisiraele ba ile ba mo kgopela gore a ba etelele pele kgahlanong le Baamoni, setšhaba sa baagišani seo se bego se elwa le Baisiraele.

Jefeta o be a nyaka thušo ya Modimo gore a fenye Baamoni, ka gona o ile a dira kholofetšo. Jefeta o ile a re ge Modimo a ka mo nea phenyo, o tla nea Jehofa motho wa pele yo a bego a tla tšwa ka ngwakong wa gagwe ge a boa gae. Motho yoo o be a tla hlankela bophelo bja gagwe ka moka ka taberenakeleng ya Modimo—lefelo leo batho ba bego ba rapela Modimo go lona mehleng yeo. Na o tseba gore go tšwele mang pele?—a

Ee, morwedi wa Jefeta! Jefeta o be a nyamile. O be a ena le ngwana o tee feela. Eupša o be a holofeditše Jehofa gomme o be a swanetše go phetha kholofetšo ya gagwe. Ka yona nako yeo, morwedi wa gagwe o itše: “Tate, ge e ba o holofeditše Jehofa, gona ntire go ya ka kholofetšo yeo e tšwilego molomong wa gago.” Ke moka o ile a kgopela go tlogelwa a nnoši ka dikgwedi tše pedi gore a ye dithabeng go yo lla. Ke ka baka la’ng a lla? Ka gobane ge a dumela go phetha keno ya tatagwe, o tla be a gafa tshwanelo ya go nyalwa le go ba le bana. Lega go le bjalo, ga se a ka a lebelela dikganyogo tša gagwe e le tše bohlokwa kudu. O be a nyaka go ikokobeletša tatagwe le go botegela Jehofa. Na o nagana gore o ile a thabiša Jehofa le tatagwe?—

Ka gona Jefeta o ile a romela morwedi wa gagwe le bagwera ba gagwe dithabeng. Ge a boa, tatagwe o ile a phetha keno ya gagwe ka go mo romela go yo hlankela bophelo bja gagwe ka moka taberenakeleng ya Modimo kua Shilo. Ngwaga o mongwe le o mongwe, basetsana ba Isiraele ba be ba eya Shilo go yo kgothatša morwedi wa Jefeta.

Na o tseba bana bao ba ikokobeletšago batswadi ba bona le go rata Jehofa?—Ke gabotse go tseba bana bao gakaone le go ba bagwera ba bona. Ge e ba o ekiša morwedi wa Jefeta gomme o ekwa le go botega, o tla ba le bagwera ba babotse. O tla dira gore batswadi ba gago ba thabe gomme le wena Jehofa o tla go rata.