Bota Jehofa, “Modimo wa Khomotšo Yohle”

“Go tumišwe Modimo le Tatago Morena wa rena Jesu Kriste, Tate wa dikgaugelo le Modimo wa khomotšo yohle.”—2 BAKOR. 1:3.

1. Go sa šetšwe nywaga ya rena, ke selo sefe seo re se nyakago?

GO TLOGA ge re belegwa, ka moka ga rena re nyaka go homotšwa. Ngwana o a lla e le gore a re botše ge a nyaka go homotšwa. Mohlomongwe o nyaka go kukwa goba o swerwe ke tlala. Le ge re šetše re gotše, re fela re nyaka go homotšwa. Seo se direga kudu ge re lebeletšane le maemo a thata.

2. Jehofa o re kgonthišetša bjang gore o tla homotša bao ba mmotago?

² Gantši ditho tša malapa a rena le bagwera ba ka re homotša go fihla bokgoleng bjo itšego. Lega go le bjalo, ka dinako tše dingwe dilo tšeo di re gateletšago ga di kgone go rarollwa ke motho le ge e le ofe. Ke Modimo feela yo a ka re homotšago go sa šetšwe gore boemo ke bjo bo gateletšago gakaakang. Lentšu la gagwe le re kgonthišetša gore: “Jehofa o kgauswi le bohle bao ba mmitšago, . . . o tla ba kwa ge ba mo llela gore a ba thuše.” (Ps. 145:18, 19) Ee, “mahlo a Jehofa a lebeletše baloki, ditsebe tša gagwe di a ba kwa ge ba llela gore a ba thuše.” (Ps. 34:15) Ge e ba re tla thekgwa ke Modimo gomme a re homotše, re swanetše go mmota. Mopsalme Dafida o ile a bolela seo ka tsela e kwagalago ge a be a opela ka gore: “Jehofa e tla ba sebo sa le ge e le mang yo a nyamilego o šoro, sebo dinakong tša tlalelo. Bao ba tsebago leina la gago ba tla go bota, gobane wena Jehofa o ka se tlogele bao ba go tsomago.”—Ps. 9:9, 10

3. Jesu o swantšhitše bjang lerato leo Jehofa a ratago batho ba Gagwe ka lona?

³ Barapedi ba Jehofa ke ba bohlokwa kudu go yena. Jesu o ile a dira gore seo se kwagale ge a be re: “Na dithaga tše hlano ga di rekišwe ka ditšhelete tša tšhipi tše pedi tša theko e nyenyane? Lega go le bjalo, ga go le e tee ya tšona ye e lebalwago pele ga Modimo. Eupša gaešita le meriri ya dihlogo tša lena e badilwe ka moka. Le se ke la boifa; le ba bohlokwa go feta dithaga tše dintši.” (Luka 12:6, 7) Jehofa o boditše setšhaba sa gagwe sa mehleng ya bogologolo a diriša moporofeta Jeremia gore: “Ke go ratile ka lerato go iša mehleng ya neng le neng. Ke ka baka leo ke go gogilego ka botho.”—Jer. 31:3.

4. Ke ka baka la’ng re ka bota dikholofetšo tša Jehofa?

⁴ Go bota Jehofa le go holofela gore o tla phethagatša dikholofetšo tša gagwe go ka re homotša dinakong tša tlalelo. Ka gona, re swanetše go bota Modimo go swana le kamoo Joshua a bego a mmota, yo a itšego: “Ga go le lentšu letee mantšung ka moka a mabotse ao Jehofa Modimo wa lena a le boditšego ona leo le sa kago la phethega. Ka moka a ile a phethega go lena. Ga go lentšu leo le sa kago la phethega.” (Josh. 23:14) Go oketša moo, re ka kgodišega gore le ge re ka kwešwa bohlokwa ka nakwana ke meleko, “Modimo o a botega” e bile a ka se ke a lahla bahlanka ba gagwe bao ba botegago.—Bala 1 Bakorinthe 10:13.

5. Re ka kgona bjang go homotša ba bangwe?

⁵ Moapostola Paulo o bolela gore Jehofa ke “Modimo wa khomotšo yohle.” “Go homotša” go bolela go thoba motho yo a gateletšegilego goba yo a nyamilego. Se se dirwa ka gore re fokotše manyami a gagwe goba sello sa gagwe gomme a feleletše a homotšegile. Seo ke sona seo Jehofa a se dirago. (Bala 2 Bakorinthe 1:3, 4.) Tatago rena wa legodimong ga a thibelwe ke selo goba ke motho gomme ka go re’alo a ka diriša selo le ge e le sefe seo se nyakegago gore a homotše bao a ba ratago. Ka morago ga moo, le rena re ka kgona go homotša badumedigotee le rena “ditlaišegong tša mohuta le ge e le ofe.” Re ka dira seo “ka khomotšo yeo re e hwetšago go Modimo.” Seo se tloga se bontšha bokgoni bja Jehofa bjo bo sa lekanywego le selo bja go homotša bao ba nyamilego!

Go Lebeletšana ka Katlego le Dilo Tšeo di Bakago Kgateletšego

6. Nea mehlala ya dilo tšeo di ka bakago kgateletšego.

⁶ Re nyaka go homotšwa ka ditsela tše di fapafapanego maphelong a rena. E nngwe ya dilo tšeo di bakago manyami a magolo ke go lahlegelwa ke motho yo re mo ratago ka lehu, kudukudu molekane yo a rategago wa lenyalo goba ngwana wa rena. Khomotšo e ka ba ya nyakega ka gobane motho a ile a swarwa gampe goba a kgethollwa. Bolwetši, botšofadi, bodiidi, mathata a lenyalo goba maemo a gateletšago a lefase di ka dira gore motho a nyake khomotšo.

7. (a) Re hloka khomotšo ya mohuta ofe ge re le maemong ao a kwešago bohloko kudu? (b) Jehofa a ka dira’ng go alafa pelo e “robegilego le e setlegilego”?

⁷ Dinakong tša ge re gateletšegile, re ka nyaka khomotšo yeo e thobago dipelo tša rena, menagano ya rena, maikwelo a rena le mebele ya rena gotee le bomoya bja rena. Tšea ka mohlala pelo. Lentšu la Modimo le a dumela gore pelo ya rena e ka ba e “robegilego le e setlegilego.” (Ps. 51:17) Ga go pelaelo gore Jehofa o kgona go lebeletšana le boemo bjo, ka gobane “o alafa ba dipelo tše di kwelego bohloko, o tlema dintho tša bona tše bohloko.” (Ps. 147:3) Gaešita le maemong ao a kwešago bohloko kudu, Modimo a ka homotša pelo yeo e nyamilego ge e ba re mo rapela re na le tumelo e sa šišinyegego e bile re boloka ditaelo tša gagwe.—Bala 1 Johane 3:19-22; 5:14, 15.

8. Jehofa a ka re thuša bjang ge re gateletšegile monaganong?

⁸ Gantši monagano wa rena o nyaka go homotšwa ka gobane diteko tša mehutahuta di ka baka kgateletšego e kgolo ya monagano. Ge e ba re diriša matla a rena feela, re ka ba ra palelwa ke go lebeletšana le diteko tše tša tumelo ya rena. Lega go le bjalo, mopsalme o opetše ka gore: “Ge dikgopolo tša ka tše di mpherekanyago di be di ata ka go nna, dikhomotšo tša gago di ile tša okobatša moya wa ka.” (Ps. 94:19) Go oketša moo, Paulo o ngwadile gore: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga; ke moka khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano ka Kriste Jesu.” (Bafil. 4:6, 7) Go bala le go naganišiša ka Mangwalo go ka re thuša kudu go lebeletšana le kgateletšego ya monagano.—2 Tim. 3:15-17.

9. Re ka lebeletšana bjang le kgateletšego ya maikwelo?

⁹ Ka dinako tše dingwe, re ka nyama kudu moo re ka bago ra wela kotsing ya go gobatšwa ke maikwelo a fošagetšego. Mohlomongwe re ikwa re ka se kgone go phethagatša boikarabelo bjo itšego bja Mangwalo goba tokelo e itšego ya tirelo. Le boemong bjo bjalo, Jehofa a ka re homotša le go re thuša. Ka mohlala: Ge Joshua a be a laelwa gore a etelele Baisiraele pele go yo lwa le ditšhaba tše matla tšeo e bego e le manaba a bona, Moshe o ile a botša setšhaba gore: “Ebang le sebete gomme le tie matla. Le se ke la di tšhaba goba la di tšhoga, ka gobane Jehofa Modimo wa lena ke yena a sepelago le lena. A ka se le lahle goba a le tlogela.” (Doit. 31:6) Ka go thušwa ke Jehofa, Joshua o ile a kgona go tsenya setšhaba sa Modimo Nageng ya Kholofetšo gotee le go fenya manaba a sona ka moka. Pejana ga moo kua Lewatleng le Lehwibidu, Moshe le yena o ile a thušwa ke Modimo ka tsela e bjalo.—Ek. 14:13, 14, 29-31.

10. Re ka hwetša thušo efe ge e ba mmele wa rena o ka kgongwa ke kgateletšego?

¹⁰ Ditiragalo tše di gateletšago di ka re kgoma gampe mmeleng. Therešo ke gore re ka holwa ke go ja ka tshwanelo, go khutša ka mo go lekanego le go itšhidulla gotee le go dula re hlwekile. Go ba le pono ya Beibele ya go ba ba phetšego gabotse moyeng le gona go ka re kgoma gabotse mmeleng. Ka gona, ke gabohlokwa gore ge re feta ka gare ga tlaišego re gopole phihlelo ya Paulo le mantšu a gagwe a kgothatšago a rego: “Re gateletšwe ka ditsela tšohle, eupša ga se ra pitlaganywa wa go palelwa ke go šutha; re a gakantšhwa, eupša ga se gore ga re na tsela ya go tšwa; re a tlaišwa, eupša ga se ra lahlwa; re lahlelwa fase ke mathata, eupša ga re senywe.”—2 Bakor. 4:8, 9.

11. Bolwetši bja moya bo ka lwantšhwa bjang?

¹¹ Diteko tše dingwe di ka gobatša boemo bja rena bja moya. Le gona mo, Jehofa a ka re hlakodiša. Lentšu la gagwe le re kgonthišetša gore: “Jehofa o thekga bohle bao ba wago, e bile o emiša bohle bao ba buraganego.” (Ps. 145:14) Gore re tle re alafše bolwetši bja rena bja moya, re swanetše go kgopela thušo go bagolo ba Bakriste. (Jak. 5:14, 15) Le gona, go dula ga rena re gopola kholofetšo ya Mangwalo ya bophelo bjo bo sa felego go ka re thuša gore re dule re tiile nakong ya ge tumelo ya rena e lekwa.—Joh. 17:3.

Mehlala ya Khomotšo e Tšwago go Modimo

12. Hlalosa tsela yeo Jehofa a ilego a homotša Aborahama ka yona.

¹² Mopsalme yo a buduletšwego o boletše gore: “Gopola lentšu leo o le boditšego nna mohlanka wa gago, leo [Jehofa] o dirilego gore ke le letele. Se se nkhomotša mohlakong wa ka, gobane polelo ya gago e mphedišitše.” (Ps. 119:49, 50) Lehono re na le Lentšu la Jehofa leo le ngwadilwego, leo le nago le mehlala e mentši ya khomotšo e tšwago go Modimo. Ka mohlala, Aborahama a ka ba a ile a gateletšega kudu ge a be a ekwa gore Jehofa o be a tlo fediša Sodoma le Gomora. Mopatriareka yoo o ile a botšiša Modimo gore: “Na ruri o ka fediša baloki gotee le ba kgopo?” Jehofa o ile a homotša Aborahama ka go mo kgonthišetša gore ge go ka hwetšwa baloki ba 50 motseng wa Sodoma, O be a ka se o fediše. Lega go le bjalo, Aborahama o ile a kgopela Jehofa ka makga a mangwe a mahlano gore: Go thwe’ng ge e ba go ka hwetšwa baloki ba 45 feela? ba 40? ba 30? ba 20? ba 10? Lebakeng le lengwe le le lengwe, Jehofa ka go se fele pelo le ka botho o ile a kgonthišetša Aborahama gore Sodoma e be e ka se fedišwe. Le ge go ile gwa hlokwa gaešita le baloki ba lesome tikologong yeo, Jehofa o ile a šireletša Lota le barwedi ba gagwe.—Gen. 18:22-32; 19:15, 16, 26.

13. Hanna o ile a bontšha bjang gore o botile Jehofa?

¹³ Mosadi wa Elikana e lego Hanna o be a nyaka ngwana ka pelo ya gagwe ka moka. Eupša e be e le moopa, gomme seo se ile sa mo gateletša. O ile a rapela Jehofa gore a mo thuše mo tabeng ye, gomme Moperisita yo a Phagamego Eli o ile a re go yena: “Eka Modimo wa Isiraele a ka go nea seo o mo kgopetšego.” Seo se ile sa homotša Hanna, “a se hlwe a bonagala a tshwenyegile.” (1 Sam. 1:8, 17, 18) Hanna o be a botile Jehofa, a tlogeletše dilo diatleng tša gagwe. Le ge a be a sa tsebe gore ditaba di tla feleletša ka eng, Hanna o ile a ba le khutšo ya ka gare. Ka morago, Jehofa o ile a araba thapelo ya gagwe. O ile a ima gomme a belega morwa, a mo rea leina la Samuele.—1 Sam. 1:20.

14. Ke ka baka la’ng Dafida a ile a nyaka khomotšo, gomme o ile a e nyaka go mang?

¹⁴ Kgoši Dafida wa Isiraeleng ya bogologolo ke mohlala o mongwe wa motho yo a ilego a homotšwa ke Modimo. Ka ge Jehofa a “bona pelo,” ge a be a kgetha Dafida gore e tle e be kgoši ya Isiraele, o be a tseba gore Dafida o be a botega e bile a ineetše borapeding bja therešo. (1 Sam. 16:7; 2 Sam. 5:10) Lega go le bjalo, Dafida ka morago o ile a dira bohlotlolo le Batseba gomme a leka go bipa sebe seo ka go dira gore monna wa gagwe a bolawe. Ge Dafida a be a lemoga bogolo bja sebe sa gagwe, o ile a rapela Jehofa gore: “Phumola dikarogo tša ka go ya ka boati bja kgaugelo ya gago. Ntlhatswišiše molatong wa ka, o ntlhwekiše le sebeng sa ka. Gobane nna ke tseba dikarogo tša ka, gomme sebe sa ka se dula se le ka pele ga ka.” (Ps. 51:1-3) Dafida o be a tloga a itshola, gomme Jehofa o ile a mo lebalela. Lega go le bjalo, Dafida o ile a swanelwa ke go lebeletšana le ditlamorago tša sebe sa gagwe. (2 Sam. 12:9-12) Eupša, kgaugelo ya Jehofa e ile ya homotša mohlanka yo wa gagwe yo a ikokobeditšego.

15. Ke thušo efe yeo Jehofa a ilego a e nea Jesu nakwana pele ga lehu la gagwe?

¹⁵ Ge Jesu a be a le mo lefaseng, o ile a lebeletšana le maemo a mantši ao a lekago. Modimo o ile a dumelela gore tumelo ya Jesu e lekwe, gomme Jesu o ile a dula a botega e le motho yo a phethagetšego yoo ka mehla a bego a botile Jehofa e bile a kgomaretše bogošing bja Gagwe. Ge Jesu a be a le kgauswi le go ekwa le go bolawa, o ile a rapela Jehofa a re: “Go se phethege thato ya ka eupša go phethege ya gago.” Ke moka morongwa o ile a iponagatša go Jesu gomme a mo matlafatša. (Luka 22:42, 43) Modimo o ile a nea Jesu khomotšo, matla le thekgo tšeo a bego a di nyaka ka nako yeo.

16. Modimo a ka dira’ng ka kgateletšego yeo re ka lebeletšanago le yona ge e ba re lebana le lehu ka baka la ge re mmotegela?

¹⁶ Gaešita le ge le rena re ka lebana le lehu ka baka la go emela tumelo ya rena ka tsela e matla ka ge re le Bakriste, Jehofa a ka kgona go re thuša gore re dule re mmotegela, e bile o tla re thuša go dira bjalo. Go oketša moo, re homotšwa ke kholofelo ya tsogo. Le gona re tloga re lebeletše pele letšatšing leo lehu, leo e lego lenaba, “le tlago go fedišwa mafelelong”! (1 Bakor. 15:26) Bahlanka ba Modimo bao ba hwilego ba botega, gotee le ba bangwe, Jehofa a ka se tsoge a ba lebetše e bile ba tlo tsošwa. (Joh. 5:28, 29; Dit. 24:15) Go bota kholofetšo ya Jehofa ya tsogo go a re homotša e bile go re nea kholofelo ya kgonthe dinakong tša ge re tlaišwa.

17. Jehofa a ka re homotša bjang ge yoo re mo ratago a ehwa?

¹⁷ Go tloga go homotša go tseba gore baratiwa ba rena bao ga bjale ba robetšego bodulabahu ba tla phela gape lefaseng le lefsa leo le kgahlišago leo le ka se bego le dilo ka moka tšeo di bakago kgateletšego gona bjale! Le gona e tla ba tokelo e kgolo gakaakang go “lešaba le legolo” la bahlanka ba Jehofa bao ba phologago bofelo bja tshepedišo ye e kgopo ya dilo go amogela gape mo lefaseng bao ba tlago go tsošwa bahung le go ba ruta!—Kut. 7:9, 10.

Matsogo a Modimo a Neng le Neng a a go Thekga

18, 19. Bahlanka ba Modimo ba ile ba homotšwa bjang ge ba be ba tlaišwa?

¹⁸ Moshe o ile a kgothatša setšhaba sa Isiraele ka mantšu a matla le a homotšago a koša ya gagwe ge a be a re: “Modimo e bile lefelo la boutamo go tloga mehleng ya bogologolo, matsogo a gagwe a neng le neng a a go thekga.” (Doit. 33:27) Ka morago moporofeta Samuele o ile a botša Baisiraele gore: “Le se ke la tlogela go latela Jehofa, le hlankele Jehofa ka dipelo tša lena ka moka. . . . Jehofa a ka se lahle batho ba gagwe ka baka la leina la gagwe le legolo.” (1 Sam. 12:20-22) Ge feela re kgomarela Jehofa borapeding bja gagwe bja therešo, a ka se ke a re lahla. Ka mehla o tla re nea thekgo yeo re e nyakago.

¹⁹ Modimo o tšwela pele a nea batho ba gagwe khomotšo yeo ba e nyakago mo mehleng ye e thata ya bofelo. Ka nywaga e fetago e lekgolo, diketekete tša badumedigotee le rena go dikologa lefase di ile tša tlaišwa le go golegwa e le feela ka gobane di be di hlankela Jehofa. Diphihlelo tša bona di hlatsela gore dinakong tša teko, ruri Jehofa o homotša bahlanka ba gagwe. Ka mohlala, yo mongwe wa bana babo rena yo a tšwago karolong yeo e bego e bitšwa Soviet Union o ile a golegwa nywaga e 23 ka baka la tumelo ya gagwe. Eupša le maemong ao, go ile gwa ba le tsela ya gore a hwetše dijo tša moya e le gore a ka matlafatšwa le go homotšwa. O itše: “Nywageng yeo ka moka, ke ithutile go bota Jehofa gomme o ile a nnea matla.”—Bala 1 Petro 5:6, 7.

20. Ke ka baka la’ng re ka kgodišega gore Jehofa a ka se re lahle?

²⁰ Go sa šetšwe seo re ka tlago ra lebeletšana le sona, re tla ba re dira gabotse ge re ka gopola mantšu a homotšago a mopsalme a rego: “Jehofa a ka se lahle batho ba gagwe.” (Ps. 94:14) Le ge re ka nyaka go homotšwa re le motho ka o tee ka o tee, re bile re na le tokelo e kgolo ya go homotša ba bangwe. Go etša ge re tla bona sehlogong se se latelago, re ka tšea karolo go homotšeng bao ba llago lefaseng le leo le nago le mathata.

O be o tla Araba Bjang?

• Ke dilo dife tšeo di ka re gateletšago?

• Jehofa o homotša bjang bahlanka ba gagwe?

• Re ka homotšwa ke eng ge re lebane le lehu?

[Box/​Pictures on page 25]

KAMOO RE KA LEBELETŠANAGO LE DILO TŠEO DI KA KGOMAGO . . .

▪ dipelo tša rena Ps. 147:3; 1 Joh. 3:19-22; 5:14, 15

▪ menagano ya rena Ps. 94:19; Bafil. 4:6, 7

▪ maikwelo a rena Ek. 14:13, 14; Doit. 31:6

▪ mebele ya rena 2 Bakor. 4:8, 9

▪ bomoya bja rena Ps. 145:14; Jak. 5:14, 15