Aborahama—Monna wa Boikokobetšo

Aborahama o dutše ka tenteng ya gagwe, o thabela moriti wa yona mosegare phišong e ntšhago hlapi ka meetseng. Ge Aborahama a lebelela kua kgojana, o bona banna ba bararo bao ba etetšego lefelong leo.a Ntle le go dikadika, o kitimela go yo gahlanetša baeng bao, o ba kgothaletša gore ba khutše go se nene gomme ba thabele kamogelo ya gagwe. O ithaopela go ba nea “senkgwanyana,” eupša o tšwela pele ka go ba lokišeletša motlalo wa dijo woo o akaretšago senkgwa seo se sa tšwago go pakwa, lebebe, maswi le nama e nanana le e botse. Ge a dutše a nea baeng ba gagwe dijo, Aborahama ga a bontšhe feela moya wa go amogela baeng, eupša o bontšha le boikokobetšo bja kgonthe bjalo ka ge re tla bona.—Genesi 18:1-8.

BOIKOKOBETŠO KE ENG? Boikokobetšo ke go se be le boikgantšho goba makoko. Motho yo a ikokobeditšego o amogela gore batho ka moka ba mo feta ka tsela e itšego. (Bafilipi 2:3) O theetša ditšhišinyo tša ba bangwe e bile o ikemišeditše go ba direla mediro ya tlasana.

ABORAHAMA O ILE A BONTŠHA BOIKOKOBETŠO BJANG? Aborahama o ile a hlankela ba bangwe ka lethabo. Ka ge go boletšwe mathomong, ge Aborahama a be a bona baeng bao ba bararo, gateetee o ile a lokišeletša gore dinyakwa tša bona di hlokomelwe. Mosadi wa gagwe, Sara, ka bjako o ile a thoma go ba lokišeletša dijo. Lega go le bjalo, ela hloko gore ke mang yo a bego a dira mošomo o montši: Aborahama o ile a kitimela go yo gahlanetša baeng bao, o ile a ithaopela go ba nea tša go ja, o ile a kitimela mohlapeng gomme a kgetha phoofolo bakeng sa gore e hlabje, ke moka a nea baeng dijo. Go e na le gore a abele bahlanka ba gagwe mošomo ka moka, monna yo yo a ikokobeditšego o ile a ikgafela go dira mošomo woo ka moka wa tlasana. O be a sa lebelele go hlankela ba bangwe e le go itheola seriti.

Aborahama o ile a theetša ditšhišinyo tša bao ba lego ka tlase ga taolo ya gagwe. Beibele e bega go se nene ka dipoledišano tša Aborahama le Sara. Lega go le bjalo, re bala gore ka makga a mabedi Aborahama o ile a theetša dikgopolo tša Sara gomme a dira ka go dumelelana le tšona. (Genesi 16:2; 21:8-14) Go e nngwe ya dipoledišano tše, tšhišinyo ya Sara mathomong e ile ya dira gore “Aborahama a šulafalelwe kudu.” Eupša ge Jehofa a be a be a bolela le Aborahama, a mmotša gore tšhišinyo ya Sara ke e botse, Aborahama ka boikokobetšo o ile fetofetoga le maemo gomme a diriša tšhišinyo yeo.

RE ITHUTA ENG? Ge e ba re ikokobeditše e le ka kgonthe, re tla thabela go hlankela ba bangwe. Re tla thabišwa ke go dira sohle seo re ka se kgonago go dira gore ba thabele bophelo.

Re ka bontšha boikokobetšo gape ka tsela yeo re arabelago ka yona ditšhišinyong tša ba bangwe. E ka ba bohlale go amogela ditšhišinyo tša ba bangwe go e na le go gana kgopolo e itšego ka gobane re se ra ka ra e nagana ka tsela yeo. (Diema 15:22) Bao ba nago le tekanyo e itšego ya taolo ba ka holwa ka mo go kgethegilego ke go ba le kgopolo e bjalo e bulegilego. Mookamedi yo a nago le phihlelo yo a bitšwago John o re: “Ke lemogile gore molebeledi yo botse o nea batho sebaka sa go ikwa ba lokologile go ntšha sa mafahleng.” O oketša ka gore: “Go nyakega boikokobetšo go lemoga gore motho yo mongwe yo a lego ka tlase ga taolo ya gago a ka tla ka tsela e kaone ya go dira dilo go feta ya gago. Go oketša moo, ga go le o tee—gaešita le molebeledi—yo a dulago a ena le dikgopolo tše dibotse.”

Re tla amogelwa ke Jehofa ge e ba re ekiša mohlala wa Aborahama ka go theetša ditšhišinyo tša ba bangwe le go ba direla mediro ya tlasana. Go ba gona, “Modimo o lwa le baikgogomoši, eupša o bontšha baikokobetši botho bja gagwe bjo bogolo.”—1 Petro 5:5.

[Mongwalo wa tlase]