Dula o Hlankela Jehofa ka Pelo e Feletšego

“Morwa wa ka, tseba Modimo wa tatago gomme o mo hlankele ka pelo e feletšego.” —1 DIKOR. 28:9.

TSOMA DIKARABO TŠA DIPOTŠIŠO TŠE DI LATELAGO:

․․․․․

Pelo ya seswantšhetšo ke eng?

․․․․․

Ke tsela efe yeo re ka e dirišago go hlahloba dipelo tša rena?

․․․․․

Re ka hlankela Jehofa bjang ka pelo e feletšego?

1, 2. (a) Ke setho sefe sa mmele seo go bolelwago ka sona kudu ka tsela ya seswantšhetšo ka Lentšung la Modimo go feta tše dingwe? (b) Ke ka baka la’ng go le bohlokwa gore re kwešiše seo se bolelwago ke pelo ya seswantšhetšo?

LENTŠU la Modimo gantši le bolela ka ditho tša mmele wa motho ka tsela ya seswantšhetšo. Ka mohlala, mopatriareka Jobo o itše: ‘Diatla tša ka ga di na bošoro.’ Kgoši Solomone o lemogile gore: “Pego e botse e nontšha marapo.” Jehofa o ile a kgonthišetša Hesekiele gore: “Phatla ya gago . . . ke e thatafišitše go feta legakabje.” Le gona moapostola Paulo o ile a botšwa gore: “O re tlišetša dilo tše mpsha ditsebeng tša rena.”—Jobo 16:17; Die. 15:30; Hesek. 3:9; Dit. 17:20.

² Lega go le bjalo, go na le setho se sengwe sa mmele seo go bolelwago kudu ka sona ka tsela ya seswantšhetšo ka Beibeleng go feta ditho tše dingwe ka moka. Ke setho seo Hanna yo a botegago a boletšego ka sona thapelong ge a re: “Pelo ya ka e thabišwa ke Jehofa.” (1 Sam. 2:1) Ge e le gabotse, bangwadi ba Beibele ba diriša lentšu “pelo” mo e nyakilego go ba ka makga a sekete, gantši mo e nyakilego go ba ka kgopolo ya seswantšhetšo. Go tloga go le bohlokwa kudu go kwešiša seo pelo e se emelago ka gobane Beibele e re re swanetše go e šireletša.—Bala Diema 4:23.

PELO YA SESWANTŠHETŠO KE ENG?

3. Re ka lemoga bjang seo se bolelwago ke pelo ya seswantšhetšo ka Beibeleng? Bontšha.

³ Le ge Lentšu la Modimo le sa nee tlhaloso ya pukuntšu bakeng sa pelo ya seswantšhetšo, le re dumelela go kwešiša seo se bolelwago ke polelwana ye. Bjang? Ka mohlala, nagana ka seswantšho se sebotse seo se agilwego ka maswikana a manyenyane a sekete. E le gore re bone gore maswikana ao a tšweleditše seswantšho sa mohuta ofe, re swanetše go katologela morago gomme re bone seswantšho seo ka moka. Ka mo go swanago, ge e ba re ka katologela morago gomme ra lebelela maemong ka moka moo pelo ya seswantšhetšo e dirišitšwego ka Beibeleng, gona re ka lemoga gore ditsela tšeo lentšu le le dirišitšwego ka tšona di bopa seswantšho se itšego. Seswantšho sefe?

4. (a) Pelo ya seswantšhetšo e emela’ng? (b) Ke’ng seo se bolelwago ke mantšu a Jesu ao a begilwego go Mateo 22:37?

⁴ Bangwadi ba Beibele ba diriša pelo ya seswantšhetšo go hlalosa seo motho a tlogago a le sona ka gare. E akaretša dibopego tše bjalo ka dikganyogo, dikgopolo, tshekamelo, boemo bja kgopolo, bokgoni, ditutuetšo le dipakane tša rena. (Bala Doiteronomio 15:7; Diema 16:9; Ditiro 2:26.) Go etša ge puku e nngwe ya ditšhupetšo e boletše, e re ke “motho yo a feletšego wa ka gare.” Maemong a mangwe, pelo ya seswantšhetšo ga e šupe go dilo ka moka tšeo go boletšwego ka tšona ka mo godimo. Ka mohlala, Jesu o itše: “O rate Jehofa Modimo wa gago ka pelo ya gago ka moka, ka moya wa gago ka moka le ka monagano wa gago ka moka.” (Mat. 22:37) Boemong bjo, pelo ya seswantšhetšo e šupa go maikwelo, dikganyogo le ditiro tša motho wa ka gare. Ka go bolela ka pelo, moya le monagano e le tšeo di ikemetšego, Jesu o gateletše gore re swanetše go bontšha ka maikwelo a rena gore re rata Modimo, go akaretša le tsela yeo re phelago ka yona le go diriša matla a rena a go nagana. (Joh. 17:3; Baef. 6:6) Eupša ge go bolelwa ka pelo ya seswantšhetšo e nnoši, e emela motho yo a feletšego wa ka gare.

LEBAKA LEO RE SWANETŠEGO GO ŠIRELETŠA DIPELO TŠA RENA

5. Ke ka baka la’ng re nyaka go dira sohle seo re ka se kgonago go hlankela Jehofa ka pelo e feletšego?

⁵ Ge Kgoši Dafida a be a gopotša Solomone mabapi le pelo, o itše: “Morwa wa ka, tseba Modimo wa tatago gomme o mo hlankele ka pelo e feletšego le ka moya o thabilego; gobane Jehofa o lekola dipelo ka moka, le gona o lemoga ditshekamelo ka moka tša menagano.” (1 Dikor. 28:9) Ka kgonthe, Jehofa ke Mohlahlobi wa dipelo ka moka, go akaretša le tša rena. (Die. 17:3; 21:2) Le gona seo a se hwetšago dipelong tša rena se kgoma kudu tswalano ya rena le yena gotee le bokamoso bja rena. Ka go re’alo re na le lebaka le lebotse la go kwa keletšo e buduletšwego ya Dafida ka go dira sohle seo re ka se kgonago go hlankela Jehofa ka pelo e feletšego.

6. Ke’ng seo re swanetšego go se lemoga ka boikemišetšo bja rena bja go hlankela Jehofa?

⁶ Mediro ya rena ya phišego re le batho ba Jehofa e bontšha gore re na le kganyogo e tseneletšego ya go hlankela Modimo ka pelo e feletšego. Ka nako e swanago, re lemoga gore dikgateletšo tša lefase le kgopo la Sathane le dikganyogo tša sebe tša mebele ya rena ke ditutuetšo tše matla tšeo di ka fokodišago boikemišetšo bja rena bja go hlankela Modimo ka pelo e feletšego. (Jer. 17:9; Baef. 2:2) Ka gona, e le gore re hlahlobe ge e ba boikemišetšo bja rena bja go hlankela Modimo ga bo fokole—e lego seo se bolelago gore re dule re le šedi—re swanetše go dula re hlahloba dipelo tša rena ka mehla. Re ka dira seo bjang?

7. Ke’ng seo se bontšhago boemo bja dipelo tša rena?

⁷ Go molaleng gore motho yo re lego yena ka gare ga a bonagale—go fo swana le ge bokagare, goba pelo, ya sehlare e sa bonagale. Go sa dutše go le bjalo, go etša ge Jesu a boletše Thutong ya Thabeng, go etša ge dienywa di utolla ge eba sehlare se phetše gabotse, le ditiro tša rena di bontšha boemo bja kgonthe bja dipelo tša rena. (Mat. 7:17-20) Anke re hlahlobeng e nngwe ya ditiro tšeo.

TSELA E BONAGALAGO YA GO HLAHLOBA DIPELO TŠA RENA

8. Mantšu a Jesu a lego go Mateo 6:33 a tswalana bjang le seo se lego ka dipelong tša rena?

⁸ Pejana thutong yeo ya thabeng, Jesu o boditše batheetši ba gagwe seo go dira ga bona tiro e itšego go ka se bontšhago ka kganyogo ya bona e tseneletšego ya go hlankela Jehofa ka pelo ka moka. O itše: “Ka gona, tšwelang pele le tsoma Mmušo pele le toko ya gagwe gomme dilo tše tše dingwe ka moka le tla di okeletšwa.” (Mat. 6:33) Ka kgonthe, ka seo re se etišago pele maphelong a rena, re dira gore go bonagale seo re se kganyogago, seo re se naganago le seo re se rulaganyago ka garegare ga dipelo tša rena. Ka gona, go hlahloba dilo tšeo re di etišago pele maphelong a rena ke tsela e bonagalago ya go bona ge e ba re hlankela Modimo ka pelo e feletšego.

9. Ke taletšo efe yeo Jesu a ilego a e fetišetša go banna ba bangwe, gomme ditiro tša bona di ile tša utolla’ng?

⁹ Nakwana ka morago ga gore Jesu a kgothaletše barutiwa ba gagwe gore ba ‘tšwele pele ba tsoma Mmušo pele,’ tiragalo yeo e ilego ya direga e bontšha kamoo boemo bja pelo ya motho bo bonagatšwago ka kgonthe ke seo a se etišago pele bophelong. Mongwadi wa Ebangedi e lego Luka o thoma tiragalo yeo ka go bolela gore Jesu o be ‘a ikemišeditše go ya Jerusalema’ gaešita le ge a be a tseba seo se bego se tla mo diragalela moo. Ge yena le baapostola ba gagwe ba be “ba sepela ba le tseleng,” Jesu o ile a kopana le banna ba bangwe bao a ilego a laletša yo mongwe le yo mongwe wa bona ka gore: “Eba molatedi wa ka.” Banna bao ba be ba ikemišeditše go amogela taletšo ya Jesu—eupša ka tlase ga maemo a itšego. Yo mongwe wa banna bao o arabetše ka gore: “Ntumelele pele ke tloge ke yo boloka tate.” Yo mongwe a re: “Morena, ke tla go latela, eupša ntumelele pele gore ke ye go šadiša ba ntlo ya ka gabotse.” (Luka 9:51, 57-61) Ruri go be go na le phapano e kgolo magareng ga boikemišetšo bja Jesu bjo bo tiilego bja pelo ka moka le dikarabo tše fokolago tša banna bao! Ka go etiša dilo tšeo ba di ratago pele, go feta dikgahlego tša Mmušo, ba ile ba utolla gore ba be ba sa ikemišetša go hlankela Modimo ka dipelo tše feletšego.

10. (a) Balatedi ba Kriste ba arabetše bjang taletšong ya Jesu? (b) Ke papišo efe e kopana yeo Jesu a ilego a e anega?

¹⁰ Ka go se swane le banna bao e bego e ka ba barutiwa, re dirile gabotse ka gore re amogele taletšo ya Jesu ya go ba balatedi ba gagwe e bile ga bjale re hlankela Jehofa letšatši le lengwe le le lengwe. Ka tsela ye, re bontšha kamoo re ikwago ka gona ka Jehofa ka dipelong tša rena. Lega go le bjalo, le ge re le mafolofolo ka phuthegong, re sa dutše re swanetše go lemoga kotsi yeo e ka kgomago boemo bja dipelo tša rena. Kotsi yeo ke efe? Ka yona nako yeo, ge Jesu a be a boledišana le bao e bego e ka ba barutiwa ba gagwe o utollotše kotsi yeo ka gore: “Ga go motho yo a beilego seatla sa gagwe mogomeng gomme a lebelela dilo tše di lego ka morago, yo a swanelegelago Mmušo wa Modimo gabotse.” (Luka 9:62) Re ka ithuta thuto efe papišong yeo?

NA RE ‘KGOMARELA GO SE SEBOTSE’?

11. Ke’ng seo se ilego sa direga ka modiro wa mothwalwa wa papišong ya Jesu, gomme ka baka la’ng?

¹¹ Go dira gore thuto ya papišong e kopana ya Jesu e bonagale gabotse, anke re oketšeng ditaba tše dingwe seswantšhokgopolong se. Mothwalwa o swaregile ka go lema. Lega go le bjalo, ge a dutše a lema, ga a fetše go nagana ka legae la gagwe moo go nago le ba lapa, bagwera, dijo, mmino, lesego le moriti. O hlologetše dilo tšeo ka moka. Ka morago ga ge a lemile sekgoba se segolo, kganyogo ya mothwalwa yo ya go nyaka dilo tše di kgahlišago bophelong e mo imela mo e lego gore o a retologa gomme o lebelela “dilo tše di lego ka morago.” Le ge go sa dutše go na le modiro o mogolo wo o swanetšego go dirwa pele ga ge tšhemo e lengwa ka moka ga yona, mothwalwa o a šitišega gomme mošomo wa gagwe o a šalela. Therešo ke gore mong wa mothwalwa o nyamišwa ke go hloka kgotlelelo ga mošomi yo.

12. Ke go swana gofe mo re go bonago ka mothwalwa wa papišong ya Jesu le Bakriste ba bangwe lehono?

¹² Bjale ela hloko kamoo boemo bjo bo ka swanago le bja lehono. Molemi a ka emela Mokriste yo mongwe le yo mongwe yo go bonagalago dilo di mo sepelela gabotse eupša ge e le gabotse a le kotsing ya moya. Ka mohlala, anke re nagane ka ngwanabo rena yo a dulago a swaregile bodireding. Lega go le bjalo, le ge a eba gona dibokeng e bile a tšea karolo tirelong ya tšhemo, ga a fetše go nagana ka dibopego tše dingwe tša bophelo bja lefase tšeo a bonago di kgahliša. Ka garegare pelong ya gagwe, o a di duma. Mafelelong, ka morago ga nywaga e mmalwa a phetha bodiredi bja gagwe, go kganyoga ga gagwe dilo tša lefase go mo imela moo e lego gore o a retologa gomme a lebelela “dilo tše di lego ka morago.” Le ge go sa dutše go na le modiro o montši wo o swanetšego go dirwa bodireding, ga a “[swarelele] ka go tia lentšung la bophelo,” gomme mediro ya gagwe ya pušo ya Modimo e a fokola. (Bafil. 2:16) Jehofa, yena “Mong wa puno,” o nyamišwa ke go hloka kgotlelelo mo go bjalo.—Luka 10:2.

13. Go hlankela Jehofa ka pelo e feletšego go akaretša’ng?

¹³ Thuto e molaleng. Ke mo go kgahlišago go tšea karolo ka mehla medirong e agago le e kgotsofatšago e bjalo ka go ba gona dibokeng tša phuthego le go tšea karolo tirelong ya tšhemo. Eupša go hlankela Jehofa ka pelo e feletšego go akaretša se se fetago seo. (2 Dikor. 25:1, 2, 27) Ge e ba ka garegare pelong ya gagwe Mokriste a tšwela pele a rata “dilo tše di lego ka morago”—ke gore, dibopego tše dingwe tša tsela ya lefase ya go phela—o kotsing ya go lahlegelwa ke boemo bja gagwe bjo bobotse le Modimo. (Luka 17:32) Ke feela ge e ba ka kgonthe re ‘hlaswa se kgopo gomme re kgomarela go se sebotse’ re tlago go ba ba “swanelegelago Mmušo wa Modimo gabotse.” (Baroma 12:9; Luka 9:62) Ka gona, ka moka ga rena re swanetše go kgonthišetša gore ga go na selo le setee lefaseng la Sathane seo se ka re šitišago go hlokomela dikgahlego tša Mmušo ka pelo ka moka, go sa šetšwe gore se bonagala se na le mohola gakaakang goba gore se kgahliša gakaakang.—2 Bakor. 11:14; bala Bafilipi 3:13, 14.

DULA O PHAKGAME!

14, 15. (a) Sathane o leka bjang go kgoma boemo bja dipelo tša rena? (b) Bontšha seo se dirago gore mokgwa woo Sathane a o dirišago o be kotsi kudu.

¹⁴ Go rata ga rena Jehofa go re tutueleditše go ineela go yena. Go tloga ka nako yeo go ya pele bontši bja rena re hlatsetše ka nywaga e mentši gore re ikemišeditše go hlankela Jehofa ka pelo e feletšego. Lega go le bjalo, Sathane ga se a hwa matwa. O sa dutše a hlasela dipelo tša rena. (Baef. 6:12) Go ba gona, a ka ba a lemoga gore re ka se fo tlogela Jehofa gateetee. Ka baka leo, ka boradia o diriša “dipelaelo tša lefase le” ka maiteko a go fokodiša ganyenyane-ganyenyane phišego ya rena ya go hlankela Modimo ka pelo ka moka. (Bala Mareka 4:18, 19.) Ke ka baka la’ng tsela ye ya Sathane e atlega gakaaka?

¹⁵ E le gore re arabe potšišo yeo, inagane o bala puku ka lebone la mohlagase leo le phadimago, ke moka tleloupu ya lona ya fsa. Kapejana o lemoga seo se diregilego ka gobane phapoši yeo e leswiswing le lesoleso. O tsenya tleloupu e nngwe legatong la yela ya go fsa, ke moka phapoši e boela e ba le seetša. Bošegong bja go latela, o sa dutše o bala ka lebone le le swanago. Eupša seo o sa se tsebego ke gore motho yo mongwe o fetotše tleloupu ya lebone la gago a tsenya e nngwe yeo seetša sa yona se sa phadimego kudu. Go molaleng gore o ka fo se lemoge phapano yeo. Le gona ge e ba letšatšing la go latela leo motho yo mongwe a fetoša gape tleloupu yeo gomme a tsenya yeo seetša sa yona se fokotšegilego ganyenyane go ye ya bobedi, kgonagalo ke gore o sa dutše o ka se lemoge phapano yeo. Ka baka la’ng? Ka gobane seetša sa yona se fokotšega ganyenyane-ganyenyane moo e lego gore ga o lemoge seo. Ka tsela e swanago, ditutuetšo tše mpe tša lefase la Sathane di ka dira gore phišego ya rena tirelong ya Jehofa e fokotšege ganyenyane-ganyenyane. Ge e ba Mokriste a sa ele hloko, a ka se lemoge phetogo ye yeo e tlago ganyenyane-ganyenyane gomme Sathane o tla ba a atlegile.—Mat. 24:42; 1 Pet. 5:8.

GO BOHLOKWA GO RAPELA

16. Re ka itšhireletša bjang maanong a Sathane?

¹⁶ Re ka itšhireletša bjang maanong a bjalo a Sathane gomme ra dula re hlankela Jehofa ka pelo e feletšego? (2 Bakor. 2:11) Go bohlokwa gore re rapele. Paulo o kgothaleditše badumedigotee le yena go “lwantšha ditiro tša bohwirihwiri tša Diabolo [ba] tiile.” Ke moka o ile a ba eletša ka gore: “Ka mohuta o mongwe le o mongwe wa thapelo le topo le [tšwele] pele thapelong mabakeng ohle.”—Baef. 6:11, 18; 1 Pet. 4:7.

17. Dithapelo tša Jesu di re ruta thuto efe?

¹⁷ E le gore re ganetše Sathane ka go tia, re dira gabotse go ekiša boemo bja kgopolo bja Jesu ka thapelo, e lego bjoo bo ilego bja bonagatša kganyogo ya gagwe e tseneletšego ya go hlankela Jehofa ka pelo e feletšego. Ka mohlala, ela hloko seo Luka a se begilego ka tsela yeo Jesu a rapetšego ka yona bošegong bja pele ga lehu la gagwe: “Ge a le bohlokong a tšwela pele a rapela go tšwa pelong.” (Luka 22:44) Jesu o be a kile a rapela ka go tšwa pelong, eupša boemong bjo bja ge a be a lebeletšane le teko e kgolo ya bophelo bja gagwe lefaseng, o ile a rapela ka mo go tseneletšego “go tšwa pelong”—gomme thapelo ya gagwe e ile ya arabja. Mohlala wa Jesu o bontšha gore dithapelo tše dingwe di tseneletše kudu go feta tše dingwe. Ka go re’alo, ge diteko tša rena e eba tše šoro kudu le gona ge maano a bohwirihwiri a Sathane e eba a šoro le go feta, gona ke moo re swanetšego go rapelela tšhireletšo ya Jehofa ka mo go tseneletšego “go tšwa pelong.”

18. (a) Ke’ng seo re swanetšego go ipotšiša sona ka dithapelo tša rena, gona ka baka la’ng? (b) Ke dilo dife tšeo di kgomago dipelo tša rena, gona ka ditsela dife? (Bona lepokisi go letlakala 16.)

¹⁸ Dithapelo tše bjalo di tla re kgoma bjang? Paulo o itše: “Dilong tšohle tsebišang Modimo dikgopelo tša lena ka thapelo le ka topo gotee le ka go leboga; ke moka khutšo ya Modimo yeo e fetago kwešišo yohle ya batho e tla diša dipelo tša lena.” (Bafil. 4:6, 7) Ee, re swanetše go rapela ka go tšwa pelong gomme re dira seo kgafetšakgafetša e le gore re dule re hlankela Jehofa ka pelo e feletšego. (Luka 6:12) Ka baka leo, ipotšiše gore: ‘Na ke rapela go tšwa pelong? Na ke rapela kgafetšakgafetša?’ (Mat. 7:7; Baroma 12:12) Karabo ya gago e utolla go gontši ka go tsenelela ga kganyogo yeo o nago le yona ya go hlankela Modimo.

19. Ke eng seo o tlago go se dira gore o dule o hlankela Jehofa ka pelo e feletšego?

¹⁹ Go tšwa go seo re šetšego re se ahlaahlile, dilo tšeo re di etišago pele bophelong di ka re botša go gontši ka boemo bja dipelo tša rena. Re nyaka go kgonthišetša gore dilo tšeo re di tlogetšego goba maano a boradia a Sathane ga di fokodiše boikemišetšo bja rena bja go hlankela Jehofa ka pelo e feletšego. (Bala Luka 21:19, 34-36.) Ka go re’alo, go swana le Dafida re dula re lopa Jehofa gore: ‘Ntire gore ke go boife ka pelo ka moka.’—Ps. 86:11.

[Lepokisi go letlakala 16]

DILO TŠE THARO TŠEO DI KGOMAGO DIPELO TŠA RENA

Go fo swana le ge re ka gata megato bakeng sa go hola dipelo tša rena tša kgonthe, ka go re’alo re ka gata megato yeo e ka thušago go boloka dipelo tša rena tša seswantšhetšo di phetše gabotse. Ela hloko dilo tše tše tharo tše bohlokwa:

1 Phepo: Dipelo tša rena tša seswantšhetšo di swanetše go hwetša tekanyo e nyakegago ya dijo tšeo di nago le phepo. Ka mo go swanago, re swanetše go kgonthišetša gore re hwetša tekanyo e nyakegago ya dijo tša moya ka go ba le thuto ya ka mehla ya motho ka noši, go naganišiša le go ba gona dibokeng.—Ps. 1:1, 2; Die. 15:28; Baheb. 10:24, 25.

2 Go itlwaetša: E le gore dipelo tša rena tša kgonthe di phele gabotse, ka dinako tše dingwe di swanetše go pompa madi ka matla. Ka mo go swanago, go tšea karolo ka phišego bodireding—mohlomongwe ka go katanela go oketša mediro ya rena ya moya—go boloka dipelo tša rena tša seswantšhetšo di phetše gabotse.—Luka 13:24; Bafil. 3:12.

3 Tikologo: Tikologo ya go se boife Modimo yeo re swanetšego go šoma le go phela ka gare ga yona e ka gateletša o šoro dipelo tša rena tša kgonthe le tša seswantšhetšo. Lega go le bjalo, re ka fokotša kgatelelo yeo ka go kopana le badumedigotee le rena nako le nako ge go kgonega, e lego bao ba re hlokomelago e le ka kgonthe e bile ba hlankela Modimo ka dipelo tša bona ka moka.—Ps. 119:63; Die. 13:20.