Tsogo ya Jesu e Bolela Bophelo!

TSOGO ya Jesu ga se feela tiragalo ya mehleng ya bogologolo yeo e sa bolelego selo go rena lehono. Moapostola Paulo o bontšhitše bohlokwa bja yona ge a be a ngwala gore: “Kriste o tsošitšwe bahung, yena thakangwaga ya bao ba robetšego lehung. Gobane bjalo ka ge lehu le tlile ka motho, tsogo ya bahu le yona e tla ka motho. Gobane go etša ge ka Adama bohle ba ehwa, ka tsela e swanago, le ka Kriste bohle ba tla phedišwa.”—1 Bakorinthe 15:20-22.

Jesu o ile a tsošwa ka Nisani 16, 33 C.E., e lego letšatši leo mo ngwageng Baisiraele ba bego ba tliša dithakangwaga tša puno ya pele ya mabele pele ga Jehofa Modimo sekgethweng sa tempeleng kua Jerusalema. Ka go bitša Jesu thakangwaga, Paulo o be a umaka gore go be go tla ba le batho bao ba tlago go tsošwa bahung.

Mantšu a latelago a Paulo a hlalosa seo tsogo ya Jesu e dirilego gore se kgonege. Paulo o itše: “Bjalo ka ge lehu le tlile ka motho, tsogo ya bahu le yona e tla ka motho.” Ka baka la sebe le go se phethagale tšeo di fetišeditšwego go rena ke Adama, ka moka ga rena re a hwa. Lega go le bjalo, ka go neela bophelo bja gagwe bjo bo phethagetšego e le topollo, Jesu o buletše batho tsela ya go lokollwa bokgobeng bja sebe le lehu ka tsogo. Paulo o dirile kakaretšo e botse ya taba ye ka go ngwala go Baroma 6:23 gore: “Moputso woo sebe se o lefago ke lehu, eupša mpho yeo Modimo a e neago ke bophelo bjo bo sa felego ka Kriste Jesu Morena wa rena.”

Jesu o hlalositše ka boyena gore lehu le tsogo tša gagwe di bolela eng go rena. Ge a bolela ka yena, o itše: “Morwa wa motho o tla fegwa . . . gore yo mongwe le yo mongwe yo a dumelago go yena a be le bophelo bjo bo sa felego. Gobane Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Johane 3:14-16.

Nagana feela—bophelo bjo bo sa felego go se na bohloko, tlaišego, goba manyami! (Kutollo 21:3, 4) A tebelelo e thabišago gakaakaang! Seithuti se sengwe se beile taba ka tsela ye: “Le ge dirapa tša bahu di re gopotša gore bophelo ke bjo bokopana, tsogo e re kgonthišetša gore lehu ke le lekopana.” Ee, tsogo ya Jesu e bolela bophelo!