Na Jesu o holofeditše modirabobe bophelo bja legodimong?

Potšišo ye e a rotoga ka gobane Jesu o ile a holofetša sesenyi seo se bego se bolawa kgauswi le yena bophelo bja nakong e tlago Paradeiseng. Jesu o itše: “Ruri ke go botša lehono, o tla ba le nna Paradeiseng.” (Luka 23:43) Ela hloko gore Jesu ga se a ka a bolela gore Paradeise yeo e tla ba kae. Ka gona, na Jesu o be a era gore modirabobe yoo o be a tla ba le yena legodimong?

Sa pele, a re hlahlobeng taba ya ge e ba modirabobe yoo a be a swanelegela bophelo bja legodimong. Batho bao ba nago le tebelelo ya go phela legodimong ba kolobeditšwe ka meetse le ka moya o mokgethwa le gona ke barutiwa ba Jesu bao ba tswetšwego ka moya. (Johane 3:3, 5) Selo se sengwe seo se nyakegago ke gore ba phele ka go dumelelana le ditekanyetšo tša Modimo tša boitshwaro gomme ba bonagatše dika tše bjalo ka potego le kwelobohloko. (1 Bakorinthe 6:9-11) Gape ba swanetše go dula ba botegela Modimo le Kriste go fihla mafelelong a bophelo bja bona bja lefaseng. (Luka 22:28-30; 2 Timotheo 2:12) Ke feela ge ba phela ka tsela yeo moo ba ka ipontšhago ba swanelwa ke go tsošwa bahung le go swanelegela boikarabelo bjo bogolo bjoo bo ba letetšego legodimong, e lego go hlankela ba ena le Kriste e le baperisita le dikgoši tša batho ka nywaga e sekete.—Kutollo 20:6.

Ka mo go fapanego, modirabobe yo a bego a le kgauswi le Jesu o be a phetše e le sesenyi e bile o hwile e le sesenyi. (Luka 23:32, 39-41) Ke therešo gore o ile a bontšha boemo bjo bo hlomphegago bja kgopolo ge a be a era Jesu a re: “O nkgopole ge o tsena Mmušong wa gago.” (Luka 23:42) Lega go le bjalo, e be e se morutiwa wa Jesu yo a kolobeditšwe le yo a tswetšwego ka moya, e bile o be a se a ka a ipontšha gore o lokile ka boitshwaro bja gagwe gotee le go kgotlelela ka potego bophelong bja gagwe. Na go bonagala e le mo go kwagalago gore Jesu o be a ka mo holofetša go ba kgoši legodimong gotee le balatedi ba gagwe ba botegago bao ba itlhatsetšego e le ba botegago?—Baroma 2:6, 7.

Ka mohlala: Ge motho a be a ka go kgopela tshwarelo bakeng sa go utswa tšhelete ya gago, o be o ka dira phetho ya go se mo swariše. Eupša na o be o ka mmota wa gore a hlokomele kgwebo ya gago goba lapa la gago? Boikarabelo bjo bjalo o be o ka bo nea feela bao o ba botago e le ruri. Ka mo go swanago, bao ba newago kholofelo ya go phela legodimong ba swanetše go thea motheo wa go ka botwa gore ba tla kgomarela ditekanyetšo tše di lokilego tša Modimo ge ba buša batho. (Kutollo 2:10) Modirabobe yo, gaešita le ge a ile a dira boipiletšo bjo bo tšwago pelong ka motsotso wa mafelelo, ga se a ka a thea motheo o bjalo.

Eupša na Jesu ga se a ka a botša modirabobe yo gore o be a tla ba le yena legodimong letšatšing lona leo? Seo se be se ka se kgonege, ka ge Jesu a se a ka a tsena legodimong letšatšing leo. Go e na le moo, o ile a ba ka “lebitleng” matšatši a mararo. (Mateo 12:40; Mareka 10:34) Gaešita le ka morago ga go tsošwa ga gagwe, o ile a dula lefaseng matšatši a 40 pele a rotogela legodimong. (Ditiro 1:3, 9) Ka baka leo, modirabobe yoo ga se a ka a ba le Jesu legodimong ka lona letšatši leo.

Bjale, modirabobe yoo o be a tla tsena Paradeiseng efe? Ka morago ga go tsošwa bahung, o tla ba Paradeiseng ya lefaseng, yeo Jesu a tlago go buša go yona. (Ditiro 24:15; Kutollo 21:3, 4) Bakeng sa go ithuta ka mo go oketšegilego ka Paradeise yeo le seo Modimo a se nyakago go rena, boledišana le yo mongwe wa Dihlatse tša Jehofa.