DIPOTŠIŠO TŠA BEIBELE DI A ARABJA

Ke ka baka la eng go le thata go fihlelela khutšo ya lefase?

Beibele e nea mabaka a mabedi a motheo. La pele, le ge batho ba fihleletše dilo tše dibotse, ga se ba bopša ba na le bokgoni bja go laola dikgato tša bona. La bobedi, mekgatlo ya batho e paletšwe ka ge “lefase ka moka le rapaletše matleng a yo kgopo,” Sathane Diabolo. Ka gona, maiteko a batho a paletšwe ke go tliša khutšo ya lefase.—Bala Jeremia 10:23; 1 Johane 5:⁠19.

Boithati bja batho le go rata ga bona maemo di dirile gore go fihlelela khutšo ya lefase go be thata. Pušo ya lefase yeo e ka rutago batho go rata se se lokilego le gore ba hlokomelane ke yona feela yeo e tla tlišago khutšo ya lefase.—Bala Jesaya 32:17; 48:18, 22.

Ke mang yo a tlago go hloma khutšo lefaseng?

Modimo Ramatlaohle o holofeditše go hloma pušo e tee ya go buša batho ka moka. E tla tšeela mebušo ya batho legato. (Daniele 2:44) Morwa wa Modimo, Jesu, o tla buša e le Kgošana ya Khutšo. O tla fediša bobe lefaseng ka moka gomme o tla ruta batho tsela ya khutšo.—Bala Jesaya 9:6, 7; 11:4, 9.

Ka tlase ga tlhahlo ya Jesu, batho ba bantši lefaseng ka bophara ba šetše ba diriša Lentšu la Modimo, Beibele, go ruta batho kamoo ba ka phelago ka khutšo le ba bangwe. Kgauswinyane, khutšo ya lefase e tla ba selo sa kgonthe.—Bala Jesaya 2:3, 4; 54:13.