DIPOTŠIŠO TŠA BEIBELE DI A ARABJA
Ke ka baka la eng re swanetše go rapelela gore Mmušo wa Modimo o tle?
Na o nyaka go tseba mo go oketšegilego ka Mmušo wa Modimo le seo o tlago go se fihlelela?
Mmušo wa Modimo ke pušo ya legodimong. Jesu o boditše balatedi ba gagwe gore ba o rapelele gore o tle o bušetše toko le khutšo lefaseng. Ga go mmušo wa batho wo o ka tlošago bošoro, go hloka toka goba malwetši ka mo go feletšego, eupša Mmušo wa Modimo o ka kgona e bile o tla dira bjalo. Modimo o kgethile Morwa wa gagwe e lego Jesu gore e be Kgoši ya Mmušo woo. Le gona Jehofa o kgethile sehlopha sa balatedi ba Jesu gore se buše le Jesu Mmušong wo.—Bala Luka 11:2; 22:28-30.
Kgauswinyane, Mmušo wa Modimo o tla fediša bohle bao ba ganetšago pušo ya Modimo. Ka gona, go rapelela gore Mmušo wa Modimo o tle ke kgopelo ya gore mmušo wa Modimo o tšeele mebušo ka moka ya batho legato.—Bala Daniele 7:13, 14; Kutollo 11:15, 18.
Ke ka baka la eng batho ba tla holwa ke Mmušo wa Modimo?
Jesu ke Kgoši e swanelegago ka gobane o na le kwelobohloko. Ka ge e le Morwa wa Modimo, le yena o na le matla a go thuša bohle bao ba kgopelago thušo go Modimo.—Bala Psalme 72:8, 12-14.
Mmušo wa Modimo o tla hola bohle bao ba o rapelelago ka potego gore o tle gotee le go hola bao ba phelago ka go dumelelana le thato ya Modimo. Le ka mohla o ka se itsholele go ithuta seo Beibele e se bolelago ka Mmušo wa Modimo.—Bala Luka 18:16, 17; Johane 4:23.