DIPOTŠIŠO TŠA BEIBELE DI A ARABJA

Na re ka tseba therešo mabapi le Modimo?

Hlatse ya Jehofa e boledišana le monna yo a dutšego pankeng ya phakeng ka Beibele — Ke ka Baka La’ng Modimo a Nyaka Gore re Tsebe Therešo? Bala Johane 17:3

Modimo o boledišane le batho. O dirišitše moya wa gagwe o mokgethwa, goba matla a šomago, go tsenya dikgopolo tša gagwe menaganong ya bangwadi ba Beibele. (2 Petro 1:20, 21) Re ka tseba therešo mabapi le Modimo ka go bala Beibele.—Bala Johane 17:17; 2 Timotheo 3:16.

Ka Beibeleng, Modimo o utolla dilo tše dintši ka yena. O tsebiša lebaka leo ka lona a bopilego batho, seo a tlago go se direla batho le kamoo a nyakago re phela ka gona. (Ditiro 17:24-27) Jehofa Modimo o nyaka gore re tsebe therešo ka yena.—Bala 1 Timotheo 2:3, 4.

Ke ka baka la’ng Modimo a amogela batho bao ba ratago therešo?

Jehofa ke Modimo wa therešo gomme o rometše Morwa wa gagwe e lego Jesu gore a tlo ruta batho therešo. Ka baka leo, bao ba ratago therešo ba kgahlwa ke Jesu. (Johane 18:37) Modimo o nyaka gore batho ba bjalo e be barapedi ba gagwe.—Bala Johane 4:23, 24.

Sathane Diabolo o paledišitše batho ba bantši go tseba Modimo ka go gaša dithuto tša maaka mabapi le Modimo. (2 Bakorinthe 4:3, 4) Batho bao ba sa ratego se se lokilego ba kgahlwa ke dithuto tše bjalo tša maaka. (Baroma 1:25) Eupša batho ba dimilione ba dipelo tše botegago ba hwetša therešo mabapi le Modimo ka go ithuta Beibele.—Bala Ditiro 17:11.

Bakeng sa tsebišo e oketšegilego, bona kgaolo 1 ya puku ya puku ya Ke Eng Seo ge e le Gabotse Beibele e se Rutago?, yeo e gatišitšwego ke Dihlatse tša Jehofa

E hwetšagala le go www.pr2711.com/nso