Beibele e Re’ng?
Diabolo ke mang goba ke eng?
NA O KA RE Diabolo ke . . .
Morongwa yo a sa bonagalego?
Bobe bjo bo lego ka pelong ya motho?
E fo ba nonwane?
SEO BEIBELE E SE BOLELAGO
Diabolo o ile a boledišana le Jesu a mo ‘leka.’ (Mateo 4:1-4) Ka gona, Diabolo ga e fo ba nonwane, e bile ga se bobe bjo bo lego ka pelong ya motho. Ke morongwa yo a sa bonagalego.
KE ENG SE SENGWE SEO RE KA ITHUTAGO SONA KA BEIBELENG?
Diabolo o thomile e le morongwa yo mokgethwa, eupša “ga se a ka a ema a tiile therešong.” (Johane 8:44) O ile a ba moaketši gomme a hlanogela Modimo.
Barongwa ba bangwe ba ile ba tlatša Sathane borabeleng bja gagwe.—Kutollo 12:9.
Diabolo o dira gore batho ba bantši ba se tsebe gore o gona.—2 Bakorinthe 4:4.
Na Diabolo a ka laola batho?
BATHO BA BANGWE BA BOLELA gore taba ya gore Diabolo o laola batho ke maaka, mola ba bangwe ba boifa go tsenwa ke meoya e mebe. Wena o nagana’ng?
SEO BEIBELE E SE BOLELAGO
“Lefase ka moka le rapaletše matleng a yo kgopo.” (1 Johane 5:19) Diabolo o laola batho, eupša ga a laole batho ka moka.
KE ENG SE SENGWE SEO RE KA ITHUTAGO SONA KA BEIBELENG?
Diabolo o diriša maaka gore a laole batho ba bantši.—2 Bakorinthe 11:14.
Ka dinako tše dingwe, meoya e mebe e kgona go laola batho.—Mateo 12:22.
O ka kgona go ‘ganetša Diabolo’ o thušwa ke Modimo.—Jakobo 4:7.