Na Bolepi bja Dinaledi le Bodupe di ka Dirišetšwa go Bona Bokamoso?

BOLEPI BJA DINALEDI

Bolepi bja dinaledi ke mokgwa wa go bolelela dilo pele woo go wona go dumelwago gore dinaledi, ngwedi le dipolanete di na le tsela yeo ka yona di kgomago maphelo a batho. Balepi ba dinaledi ba bolela gore ge motho a belegwa, tsela yeo dietša tše tša legodimong di emego ka yona ka nako yeo, di bopa semelo le bokamoso bja gagwe.

Bolepi bja dinaledi bo sa dutše bo tumile le ge bo thomile kua Babilona ya bogologolo. Go ya ka nyakišišo yeo e dirilwego United States ka 2012, motho o tee go ba bararo o be a nagana gore bolepi bja dinaledi “bo nyakile e le bja thutamahlale” gomme batho bao ba dirago diperesente tše lesome ba itše “e tloga e le bja thutamahlale.” Na go bjalo? Aowa. Ekwa mabaka.

• Dipolanete le dinaledi ga di na matla a go kgoma maphelo a batho go ya ka tsela yeo balepi ba dinaledi ba bolelago gore di a ba kgoma.

• Gantši ditaba tšeo tše di bolelwago e sa le pele di a akaretša moo di ka šupago go motho le ge e le ofe.

• Lehono balepi ba dinaledi ba sa thea ditaba tša bona tumelong ya bogologolo ya gore dipolanete di dikologa lefase. Ge e le gabotse, dipolanete di dikologa letšatši.

• Ditaba tšeo balepi ba dinaledi ba di bolelago ka motho o tee ga di swane.

• Balepi ba dinaledi ba re batho bao ba belegwego ka letšatšikgwedi letee ba wela legorong letee la magoro a 12 goba maswao a zodiac. Ka baka la go fetoga ga tsela yeo lefase le emego ka yona go theoša le mengwaga e makgolo, matšatšikgwedi ao a bego a sepedišana le maswao a zodiac ga a sa sepedišana le dihlopha tša dinaledi tšeo a bego a theeletšwe ka tšona.

Go thwe maswao a zodiac a bontšha gore semelo sa motho se bjang. Ge e le gabotse, batho bao ba belegwego ka letšatšikgwedi le tee ga ba na dika tša go swana. Letšatši la motho la matswalo ga le bolele selo ka semelo sa gagwe. Go e na le go lebelela batho ka tsela ya kgonthe, balepi ba dinaledi ba ahlola boitshwaro le semelo tša motho ka go phopholetša. Na wo ga se mokgwa wa go kgetholla?

BODUPE

Batho ba be ba dutše ba eya go didupe ga e sa le go tloga mehleng ya bogologolo. Didupe tše dingwe di be di re ditho tša ka gare tša diphoofolo le tša batho goba tsela yeo mokoko o jago mabele ka yona di bolela se sengwe. Ba bangwe ba be ba re tsela yeo mahlare a teye goba dithorwana tša kofi di lego ka yona di bolela se sengwe ka bokamoso. Lehono go dirišwa di-tarot card, di-crystal ball, mataese le mekgwa e mengwe go “hlalosa” bokamoso bja motho. Na bodupe ke tsela e ka botwago bakeng sa go tseba bokamoso? Aowa, ga se tsela e ka botwago. A re kweng mabaka.

Ela hloko taba ya go se fetofetoge. Gantši mekgwa e fapafapanego ya bodupe e a thulana. Le ge go dirišwa mokgwa o tee, eupša seo didupe di se bolelago e sa le pele se a fapana. Ka mohlala, ge e ba motho a ka botšiša didupe tše pedi tšeo di dirišago dikarata bakeng sa go “hlalosa” bokamoso, ge e le gabotse karabo ya tšona e swanetše gore e swane. Eupša gantši dikarabo tša tšona ga di swane.

Mekgwa goba maikemišetšo a didupe a a belaetša. Baswayadiphošo ba re didupe di fo ba di diriša dikarata le di-crystal ball ka gobane sedupe se lebelela tsela yeo motho a arabelago ka yona e sego didirišwa. Ka mohlala, sedupe seo se nago le bokgoni se ka fo botšiša potšišo ke moka sa lebelela tsela yeo motho a arabelago ka yona, e ka ba ka go bolela goba boitšhišinyo bja mmele, ke moka sa kgona go tseba se sengwe ka motho yoo. Sedupe se tla retwa ka gore se tseba ditaba tša motho, le ge motho yoo a di utolotše a sa lemoge. Didupe di dira tšhelete e ntši kudu ka bofora ka ge batho ba di tshepa.

SEO BEIBELE E RE BOTŠAGO SONA

Tsela yeo balepi ba dinaledi le didupe ba dirago dilo ka yona e bontšha gore bokamoso bja rena bo rulagantšwe e sa le pele. Eupša na go bjalo? Beibele e re botša gore re ka ikgethela seo re nyakago go se dumela goba go se dira, le gore dikgetho tša rena di tlo kgoma bokamoso bja rena.​—Joshua 24:15.

Barapedi ba Modimo ba na le mabaka a mantši a go gana bolepi bja dinaledi le bodupe, ka gobane Modimo ga a amogele mekgwa ka moka ya bonoge. Beibele e re: “Go wena go se ke gwa hwetšwa . . . senoge, ramalea goba motho yo a dirišago dipheko goba moloi, goba yo a fošago ba bangwe ka meleko goba yo a dirišanago le meoya e mebe goba sedupe goba motho le ge e le ofe yo a botšišago dilo bahung. Ka gobane motho yo mongwe le yo mongwe yo a dirago dilo tše ke selo se se šišimišago go Jehofa.”a​—Doiteronomio 18:10-12.