Leina la Modimo ke Mang?

Ke selo sefe sa pele seo o se dirago ge o nyaka go tseba motho? Ke go mmotšiša leina la gagwe. Ge o be o ka botšiša Modimo gore leina la gagwe ke mang, o be a tla go araba bjang?

O be a tla re: “Ke nna Jehofa. Ke lona leina la ka.”—Jesaya 42:8.

Na ke mathomo o ekwa leina le? Go ka direga. Lebaka ke gore Dibeibeleng tše dintši leina le ga le tšwelele gantši, goba ga le gona. Gantši ge batho ba fetolela Beibele, ba ngwala sereto “MORENA,” go e na le go ngwala leina la Modimo. Eupša mathomong ge Beibele e be e sa ngwalwa, leina la Modimo le be le tšwelela ka makga a e ka bago a 7 000. Leina leo le na le ditlhaka tše nne tša Seheberu, e lego YHWH goba JHVH, gomme ga e sa le go tloga kgale le fetolelwa e le “Jehofa” ka Sepedi.

Leina la Modimo Lengwalong la go Phuthwa la Dipsalme la Dead Sea — Lengwalo la go Phuthwa la Dipsalme la Dead Sea Magareng ga ngwaga wa bo-30 le wa bo-50, SEHEBERU

Leina la Modimo Beibeleng ya Seisemane yeo e fetoletšwego ke Tyndale — Beibele yeo e fetoletšwego ke Tyndale 1530, SEISEMANE

Leina la Modimo Beibeleng ya Sepaniši yeo e fetoletšwego ke Reina-Valera — Beibele yeo e fetoletšwego ke Reina-Valera 1602, SEPANISHI

Leina la Modimo Beibeleng ya se-China yeo e fetoletšwego ya Union — Beibele yeo e fetoletšwego ya Union 1919, SE-CHINA

Leina la Modimo le tšwelela gantši mengwalong ya Seheberu le diphetolelong tše dintši tša Beibele

KE KA BAKA LA ENG GO TSEBA LEINA LA MODIMO GO LE BOHLOKWA?

Leina la Modimo le bohlokwa go yena. Ga go na yo a filego Modimo leina; ke yena a iphilego lona. Ge Modimo a bolela ka leina la gagwe la Jehofa, o itše: “Le ke lona leina la ka go iša mehleng ya neng le neng, ke lona leo ke tlago go gopolwa ka lona go iša melokong le melokong.” (Ekisodo 3:15) Ka Beibeleng, leina la Modimo le tšwelela ka makga a mantši go feta direto tša gagwe, tšeo tše dingwe tša tšona e lego Ramatlaohle, Tate, Morena, goba Modimo. E bile leina leo le tšwelela gantši go feta maina a batho ba ka Beibeleng ba bjalo ka Aborahama, Moshe, Dafida goba Jesu. Go feta moo, Jehofa ka noši o nyaka gore batho ba tsebe leina le la gagwe. Beibele e re: “Gore batho ba tsebe gore wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka.”—Psalme 83:18.

Jesu o be a tšea leina la Modimo le le bohlokwa. Thapelong ya Morena goba ya Tatawešo, Jesu o rutile balatedi ba gagwe gore ba rapele Modimo ka gore: “Leina la gago a le kgethagatšwe.” (Mateo 6:9) Jesu le yena o ile a rapela Modimo ka gore: “Tate tagafatša leina la gago.” (Johane 12:28) Bophelong bja gagwe ka moka, Jesu o be a botša batho ka leina la Modimo. Ke ka baka leo a ilego a botša Modimo ka thapelo gore: “Ke ba tsebišitše leina la gago e bile ke tla le tsebatša.”—Johane 17:26.

Leina la Modimo le bohlokwa go batho bao ba mo tsebago. Batho ba Modimo ba bogologolo ba be ba tseba gore go tseba leina la Modimo go be go tla ba šireletša le go ba phološa. Beibele e re: “Leina la Jehofa ke tora e matla. Moloki o tšhabela go lona gomme a šireletšwa.” (Diema 18:10) Le gona e re: “Yo mongwe le yo mongwe yo a bitšago leina la Jehofa o tla phologa.” (Joele 2:32) Beibele e re bahlanka ba Modimo ba be ba tla tsebja ka leina la gagwe. E re: “Ge e le morafo o mongwe le o mongwe o tla sepela ka leina la modimo wa wona; eupša ge e le rena, re tla sepela ka leina la Jehofa Modimo wa rena go iša mehleng ya neng le neng, gaešita le ka mo go sa felego.”—Mika 4:5; Ditiro 15:14.

SEO LEINA LA MODIMO LE SE BOLELAGO

Leina leo le hlalosa seo Modimo a lego sona. Diithuti tše dintši tša Beibele di re leina Jehofa le ra gore, “Yo a Bakago go ba Gona.” Ge Jehofa a be a bolela le Moshe, o ile a hlalosa seo leina la gagwe le se bolelago. O itše: “KE TLA BA SEO KE NYAKAGO GO BA SONA.” (Ekisodo 3:14) Ka gona, leina la Modimo ga le bolele feela gore ke Mmopi. Leina la gagwe le ra gore o kgona go ba selo le ge e le sefe seo a nyakago go ba sona gore a phethe morero wa gagwe. E bile le ra gore a ka šomiša le dilo tšeo a di bopilego go phetha morero woo. Ke nnete gore direto tša Modimo di re ruta ka bogolo bja gagwe le gore o na le matla, eupša leina la gagwe la Jehofa ke lona feela le hlalosago seo a lego sona le seo a ka bago sona.

Leina la Modimo le bontšha gore o na le taba le rena. Seo leina la Modimo le se bolelago se bontšha gore o rata tlholo ya gagwe, go akaretša le rena. Go oketša moo, taba ya gore Modimo o dirile gore batho ba tsebe leina la gagwe e bontšha gore o nyaka re mo tseba. Sa go kgahliša ke gore o utollotše leina la gagwe kgale le pele re ka ba gona. Se se bontšha gore Modimo ga a nyake gore re nagane gore o kgole le rena, eupša o nyaka gore re mo tsebe gabotse le go ba bagwera ba gagwe.—Psalme 73:28.

Ge re diriša leina la Modimo re bontšha gore re a mo rata. Ka mohlala, a re re o botša motho yo o nyakago e eba mogwera wa gago gore a go bitše ka leina la gago, eupša a se dire bjalo. O be o tla ikwa bjang? Ga go pelaelo gore o be o tla ipotšiša ge e ba motho yoo ka nnete a nyaka go ba mogwera wa gago. Ka mo go swanago, ge e ba re sa diriše leina la Modimo, le yena o tlo ipotšiša ge e ba ka nnete re nyaka go ba bagwera ba gagwe. O re boditše leina la gagwe, e bile o nyaka re mmitša ka lona. Ge re mmitša ka lona, re mmontšha gore re nyaka go gwerana le yena. Sa go kgahliša kudu ke gore Beibele e re Modimo o bona “bao ba sa lebalego leina la gagwe.”—Maleaki 3:16.

Ge e ba re nyaka go tseba Modimo, re swanetše go thoma pele ka go tseba leina la gagwe. Eupša ga go felele moo. Re swanetše go tseba gore Jehofa ke Modimo wa mohuta mang.

LEINA LA MODIMO KE MANG? Leina la Modimo ke Jehofa. Leina leo le bontšha gore o kgona go dira selo le ge e le sefe seo a nyakago go se dira

MODIMO O BOPILWE KE MANG?

Batho ba bantši ba ipotšiša potšišo yeo. Mohlomongwe le wena o kile wa ipotšiša yona. Potšišo ye re ka e bea ka tsela ye: Ge e ba go na le yo a bopilego dilo ka moka, gona Modimo yena o bopilwe ke mang?

Borasaense ba dumela taba ya gore lefase le na le mathomo. Seo borasaense ba se dumelago, se dumelelana le temana ya mathomo ya Beibele yeo e rego: “Mathomong Modimo o hlodile magodimo le lefase.”—Genesi 1:1.

Lefase ga se la ipopa goba la no ba gona. Selo seo se sego gona se ka se dire gore selo se sengwe se be gona. Ge nkabe go se na yo a bopilego dilo, nkabe lehono go se na selo. Le ge taba ye re ka se e kwešiše gabotse, go swanetše go ba go na le yoo e sego karolo ya dilo tšeo di bopilwego yoo a dirilego gore dilo tše di be gona. Jehofa Modimo, yo sebopego sa gagwe e lego sa moya le yo a nago le matla a magolo le bohlale, ke yena a bego a dutše a le gona pele selo le ge e le sefe se ka ba gona.—Johane 4:24.

Ge Beibele e bolela ka Modimo e re: “Pele ga ge dithaba ka botšona di belegwa, goba pele ga ge o tšweletša lefase le naga bjalo ka ge eka ke ka mahloko a pelego, Wena o Modimo go tloga mehleng ya neng le neng go iša mehleng ya neng le neng.” (Psalme 90:2) Ka lebaka leo, Modimo ga se a bopša, o be a dutše a le gona. Ka gona, ke yena “mathomong” a bopilego dilo ka moka.—Kutollo 4:11.