SEHLOGO SE ITHUTWAGO 14
Na o Phetha Bodiredi bja Gago ka Botlalo?
“Dula o tsebatša ditaba tše dibotse, gomme o phethe bodiredi bja gago ka botlalo.”—2 TIM. 4:5, mongwalo wa tlase.
KOPELO 57 Re Ruta Batho ba Mehuta Yohle
SEO RE TLAGO GO ITHUTA SONAa
Ka morago ga gore Jesu a tsošwe bahung, o ile a kopana le barutiwa ba gagwe gomme a ba laela gore “[ba ye ba] dire batho ba ditšhaba ka moka barutiwa” (Bona serapa 1)
1. Bahlanka ka moka ba Modimo ba nyaka go dira’ng, gona ka baka la’ng? (Bona seswantšho sa letlakala la ka ntle.)
KRISTE JESU o ile a laela balatedi ba gagwe gore “[ba ye ba] dire batho ba ditšhaba ka moka barutiwa.” (Mat. 28:19) Bahlanka ba Modimo ka moka bao ba botegago ba nyaka go ithuta kamoo ba ka ‘phethago ka botlalo’ modiro wo Jesu a ba laetšego wona. (2 Tim. 4:5) Sa bohlokwa le go feta ke gore mošomo wo o bohlokwa kudu e bile o swanetše go dirwa kapejana go feta mošomo le ge e le ofe. Eupša go ka ba thata gore re fetše nako e ntši re phetha modiro wo go ya ka mokgwa wo re bego re ka nyaka ka gona.
2. Re lebeletšana le mathata afe ge re dutše re phetha modiro wa rena wa go bolela ditaba tše dibotse?
2 Go na le dilo tše dingwe tše bohlokwa tšeo re di dirago tšeo di nyakago nako le matla a rena. Ka mohlala, re ka swanelwa ke go šoma diiri tše dintši ka letšatši e le gore re hlokomele malapa a rena. Go ka ba boima gore re hlokomele malapa a rena ka dilo ka moka tšeo di nyakegago, goba mohlomongwe re ka ba re babja, re na le kgateletšego ya monagano goba re imelwa ke mathata ao a tlišwago ke botšofadi. Re ka kgona bjang go phetha bodiredi bja rena ka botlalo mola re lebeletšane le mathata a bjalo?
3. Mantšu a Jesu ao a lego go Mateo 13:23, a re thuša go kwešiša’ng?
3 Ga se ra swanela go nyama ge e ba maemo a rena a sa re dumelele go fetša nako e ntši re bolela ditaba tše dibotse. Jesu o be a tseba gore ka moka ga rena re be re ka se kgone go tšweletša peu ya Mmušo wa Modimo go swana. (Bala Mateo 13:23.) Jehofa o tšeela godimo selo se sengwe le se sengwe seo re se dirago go mo hlankela, ge feela e le sohle seo re ka se kgonago. (Baheb. 6:10-12) Eupša ka dinako tše dingwe re ka bona eka maemo a rena a re dumelela go fetša nako e ntši re bolela ditaba tše dibotse. Sehlogong se re tlo bolela ka seo re ka se dirago gore go bolela ditaba tše dibotse go tle pele maphelong a rena, kamoo re ka phelago bophelo bjo bo se nago ditšhitišo le kamoo re ka kaonefatšago bokgoni bja rena bja go ruta. Sa pele, go phetha bodiredi bja rena ka botlalo go bolela’ng?
4. Go phetha bodiredi bja rena ka botlalo go bolela’ng?
4 Go phetha bodiredi bja rena ka botlalo go bolela’ng? Go bolela go dira sohle seo re ka se kgonago go botša batho ditaba tše dibotse le go ba ruta Beibele. Eupša go phetha bodiredi bja rena ka botlalo ga go bolele feela go no fetša nako e ntši re le tšhemong. Selo se bohlokwa go Jehofa ke maikemišetšo a rena a go botša batho ditaba tše dibotse. Ka ge re rata Jehofa le baagišani ba rena, re dira sohle seo re ka se kgonago go phetha bodiredi bja rena bja Bokriste.b (Mar. 12:30, 31; Bakol. 3:23) Go hlankela Jehofa ka pelo ka moka go bolela go diriša matla a rena, bokgoni le go dira sohle seo re ka se kgonago tirelong ya gagwe. Ge re ka kwešiša tokelo yeo re nago le yona ya go bolela ditaba tše dibotse, re tlo dira sohle seo re ka se kgonago go botša batho ba bantši ka Modimo.
5-6. Ke ka baka la’ng re ka re motho yo a dulago a swaregile a ka kgona go dira gore go bolela ditaba tše dibotse go tle pele bophelong bja gagwe? Nea mohlala.
5 Nagana ka lesogana leo le ratago go ruta. Le thabela go ruta nako le nako ge le hwetša sebaka sa go dira bjalo. Mafelelong lesogana leo le hwetša mošomo wa go ruta sekolong se itšego gabedi mo bekeng. Eupša ga le gole tšhelete e lekanego bakeng sa go itlhokomela. Ke moka le bona go le kaone gore le šome lebenkeleng le itšego matšatši a mangwe a mahlano. Le ge le fetša nako e ntši le šoma lebenkeleng leo, eupša le rata go ruta. Le nyaka go kaonefatša tsela yeo le rutago ka yona gore le tle le kgone go iphediša ka go ruta. Le ge le šoma matšatši a mabedi feela sekolong, le thabela go ruta.
6 Ka tsela e swanago, o ka ba o rata go fetša nako e ntši o bolela ditaba tše dibotse, eupša go sa kgonege. Lega go le bjalo, o rata mošomo woo wa go bolela ditaba tše dibotse. O leka ka thata go botša batho ditaba tše dibotse gore o fihlelele dipelo tša bona. Ka ge o na le dilo tše dintši tšeo o swanetšego go di dira, o ka ba o ipotšiša gore ke eng seo o ka se dirago gore go bolela ditaba tše dibotse go tle pele bophelong bja gago.
O KA DIRA ENG GORE GO BOLELA DITABA TŠE DIBOTSE GO TLE PELE BOPHELONG BJA GAGO?
7-8. Re ka ekiša Jesu bjang tseleng yeo a bego a lebelela bodiredi?
7 Jesu o beile mohlala o mobotse tseleng yeo a bego a lebelela bodiredi bja gagwe ka yona. Selo se bohlokwa kudu bophelong bja gagwe e be e le go bolela ka Mmušo wa Modimo. (Joh. 4:34, 35) O be a sepela maeto a matelele gore a kgone go botša batho ba bantši ditaba tše dibotse. O be a dula a nyaka ditsela tša go botša batho ditaba tše dibotse, e ka ba ka magaeng a bona goba gohle moo ba bego ba hwetšagala gona. Jesu o be a etiša pele bodiredi bja gagwe.
8 Re ka ekiša Jesu ka go nyaka ditsela tša go botša batho ditaba tše dibotse nako le ge e le efe goba kae le kae moo re ba hwetšago gona. Re ikemišeditše go tlogela dilo le ge e le dife tšeo re di ratago gore re bolele ditaba tše dibotse. (Mar. 6:31-34; 1 Pet. 2:21) Ba bangwe ka phuthegong ba kgona go hlankela e le babulamadibogo ba kgethegilego, ba ka mehla goba ba go thuša. Ba bangwe ba ithutile leleme le lefsa goba ba hudugetše mafelong ao go nyakegago bagoeledi ba oketšegilego. Eupša modiro o mogolo o dirwa ke bagoeledi bao ba sa kgonego go dira dilo tšeo, bao ba lekago ka thata go botša batho ditaba tše dibotse. Go sa šetšwe gore re kgona go fetša nako e ntši tšhemong goba go se bjalo, Jehofa ga a re kgopele go dira seo re ka se se kgonego. O nyaka gore ka moka ga rena re ipshine ka go mo hlankela ge re dutše re bolela “ditaba tše dibotse tša letago tša Modimo yo a thabilego.”—1 Tim. 1:11; Doit. 30:11.
9. (a) Paulo o ile a kgona bjang go etiša pele modiro wa go bolela ditaba tše dibotse gaešita le ge a ile a swanelwa ke go šoma mošomo wa boiphedišo? (b) Go ya ka Ditiro 28:16, 30, 31, Paulo o be a lebelela bjang bodiredi bja gagwe?
9 Moapostola Paulo o re beetše mohlala o mobotse wa go etiša pele mošomo wa go bolela ditaba tše dibotse. Ge a be a le Korinthe leetong la gagwe la bobedi la boromiwa, o ile a felelwa ke tšhelete gomme a swanelwa ke go dira ditente. Eupša o be a sa etiše pele mošomo wa go dira ditente. O be a no šomela go iphediša e le gore a tle a kgone go botša Bakorinthe ditaba tše dibotse ntle le gore ba lefelele ditshenyagalelo tša gagwe. (2 Bakor. 11:7) Gaešita le ge Paulo a ile a swanelwa ke go šoma mošomo wa boiphedišo, o ile a dula a etiša pele go bolela ditaba tše dibotse, e bile o be a di bolela le ka Sabatha e nngwe le e nngwe. Ka morago ga gore maemo a gagwe a kaonefale, Paulo o ile a kgona go etiša pele modiro wa go bolela ditaba tše dibotse ka mo go feletšego. O ile “a swarega kudu ka lentšu, a nea bohlatse go Bajuda go bontšha gore Jesu ke Kriste.” (Dit. 18:3-5; 2 Bakor. 11:9) Ka morago, ge Paulo a be a golegilwe ka ntlong ya gagwe e hirilwego kua Roma ka mengwaga e mebedi, o be a botša bao ba bego ba mo etela ditaba tše dibotse e bile o be a ngwala mangwalo. (Bala Ditiro 28:16, 30, 31.) Paulo o be a ikemišeditše gore go se be le selo le ge e le sefe seo se mo šitišago go bolela ditaba tše dibotse. O ngwadile gore: “Ka ge re na le bodiredi bjo . . . , ga re lape.” (2 Bakor. 4:1) Go swana le Paulo, gaešita le ge re ka swanelwa ke go fetša nako e ntši re šoma mošomo wa boiphedišo, re ka kgona go dira gore mošomo wa go bolela ditaba tše dibotse o tle pele maphelong a rena.
Go na le ditsela tše dintši tšeo re ka phethago bodiredi bja rena ka botlalo (Bona serapa 10 le 11)
10-11. Re ka phetha bjang bodiredi bja rena ka botlalo, gaešita le ge re babja?
10 Ge e ba re sa kgone go bolela ditaba tše dibotse ka ntlo le ntlo ka baka la botšofadi goba bolwetši, re ka diriša mekgwa e mengwe. Bakriste ba lekgolong la pele la mengwaga ba be ba eya gohle moo batho ba bego ba hwetšagala gona. Ba be ba diriša sebaka se sengwe le se sengwe go botša batho ka Modimo. Ba be ba nea bohlatse ka ntlo le ntlo le mafelong a batho bohle. (Dit. 17:17; 20:20) Ge e ba re sa kgone go sepela sebaka se setelele, re ka dula lefelong leo go tletšego batho gomme ra boledišana le bao ba fetago ka tsela. Goba mohlomongwe re ka nea bohlatse bjo bo sa rulaganyetšwago, ra nea bohlatse ka go ngwala mangwalo goba ka go diriša founo. Bagoeledi ba bangwe bao ba sa kgonego go ya ka ntlo le ntlo, ba thabela go diriša mekgwa ye e mengwe ya go bolela ditaba tše dibotse.
11 Le ge o se wa phela gabotse, o ka kgona go phetha bodiredi bja gago ka botlalo. A re boleleng gape ka mohlala wa moapostola Paulo. O itše: “Dilong tšohle ke na le matla ka baka la yo a mphago matla.” (Bafil. 4:13) Paulo o ile a hloka matla ao ge a be a babja nakong ya ge a be a le go le lengwe la maeto a gagwe a boromiwa. O ile a botša Bagalatia gore: “Bolwetši bja ka nameng ke bjona bo nneilego sebaka sa pele sa gore ke le botše ditaba tše dibotse.” (Bagal. 4:13) Ka mo go swanago, gaešita le ge o babja, o ka hwetša dibaka tša go botša batho ba bangwe ka Mmušo wa Modimo. O ka botša dingaka, baoki goba batho ba bangwe bao ba go hlokomelago. Ba bantši ba batho ba, ba ba ba le mešomong ge bagoeledi ba bangwe ba ba etela ka magaeng a bona.
KAMOO O KA PHELAGO BOPHELO BJO BONOLO
12. Go boloka leihlo la gago “le lokile” go bolela’ng?
12 Jesu o itše: “Lebone la mmele ke leihlo. Ka gona, ge e ba leihlo la gago le lokile [goba “le tsepeletše,” mongwalo wa tlase], gona mmele wa gago ka moka o tla taga.” (Mat. 6:22) Jesu o be a e ra go re’ng? O be a e ra gore re swanetše go phela bophelo bjo bonolo goba re tsepelele selong setee se bohlokwa, re se šitišwe ke selo go se fihlelela. Jesu ka boyena o re beetše mohlala tabeng ye. O ile a dula a etiša bodiredi bja gagwe pele, le gona o ile a ruta barutiwa ba gagwe gore ba se šitišwe ke selo ge ba hlankela Jehofa. Ge re dula re etiša bodiredi bja rena pele, re ekiša Jesu ka gobane re “tsoma Mmušo pele le toko ya [Modimo].”—Mat. 6:33.
13. Re ka thušwa ke’ng go dula re etiša bodiredi bja rena pele?
13 Tsela e nngwe ya go dula re etišitše bodiredi bja rena pele ke ka go fokotša nako yeo re e fetšago re dira dilo tša go hloka mohola. Seo se tla re thuša go fetša nako e ntši re thuša batho go tseba Jehofa le go mo rata.c Ka mohlala, na re ka beakanya nako yeo re e fetšago mošomong e le gore re kgone go fetša nako e ntši re le tšhemong gare ga beke? Na re ka fokotša nako yeo re e fetšago ge re ithabiša?
14. Banyalani ba bangwe ba ile ba dira diphetogo dife e le gore ba kgone go fetša nako e ntši tšhemong?
14 Ngwanabo rena Elias yoo e lego mogolo, yena le mosadi wa gagwe ba ile ba nolofatša bophelo bja bona. Elias o re: “Re be re ka se kgone go bula madibogo di tloga fase, eupša go be go na le dilo tšeo re bego re ka di dira gore re fetše nako e ntši tšhemong. Ka gona, re ile ra thoma go oketša ganyenyane-ganyenyane nako yeo re e fetšago re le tšhemong. Ka mohlala, re ile ra thoma go seketša tšhelete, ra se sa ithabiša kudu, ra kgopela bengmošomo ba rena gore ba re fokoletše nako ya go šoma e le gore re kgone go fetša nako e ntši re le tšhemong. Seo se ile sa re thuša gore re kgone go nea bohlatse mantšiboa, re sware dithuto tša Beibele tše dintši, gotee le go ya tšhemong ya gare ga beke gabedi mo kgweding. Seo se ile sa re thabiša kudu!”
KAMOO O KA KAONEFATŠAGO TSELA YEO O RUTAGO KA YONA
Ge e ba re diriša seo re ithutago sona sebokeng sa gare ga beke, re tla kgona go kaonefatša tsela ya rena ya go bolela ditaba tše dibotse le ya go ruta (Bona serapa 15 le 16)d
15-16. Go ya ka Timotheo wa Pele 4:13, 15, re ka kaonefatša bjang bokgoni bja rena bja go bolela ditaba tše dibotse? (Bona le lepokisi leo le rego: “Dipakane Tšeo di Nthušago go Phetha Bodiredi bja ka ka Botlalo.”)
15 Tsela e nngwe ya go phetha bodiredi bja rena ka botlalo ke ka go kaonefatša tsela yeo re rutago ba bangwe ditaba tše dibotse. Batho bao ba šomago, ba fela ba newa tlwaetšo e itšego e le gore ba kaonefatše tsela yeo ba šomago ka yona. Go bjalo le ka batho bao ba bolelago ditaba tše dibotse. Re swanetše go tšwela pele re kaonefatša bokgoni bja rena bja go ruta tšhemong.—Die. 1:5; bala 1 Timotheo 4:13, 15.
16 Re ka dira’ng gore re kgone go kaonefatša bokgoni bja rena ge re ruta batho tšhemong? Re ka diriša tlhahlo yeo re e hwetšago Sebokeng sa Bophelo bja rena le Bodiredi sa beke le beke. Seboka se se re nea tlwaetšo yeo e re thušago go kaonefatša bokgoni bja rena bodireding. Ka mohlala, ge modulasetulo a eletša barutwana bao ba neilego dipolelo tša bona, le rena re ka ithuta dilo tšeo di ka re thušago go kaonefatša bokgoni bja rena ge re ruta batho tšhemong. Ka morago ga moo, re ka diriša ditšhišinyo tšeo ge re botša motho yo mongwe ditaba tše dibotse. Re ka kgopela molebeledi wa sehlopha sa rena sa tšhemo gore a re thuše goba ra kgopela go šoma le yena tšhemong. Goba re ka kgopela go šoma le mogoeledi yo a nago le bokgoni, mmulamadibogo goba molebeledi wa tikologo. Ge re dutše re tlwaela go diriša sedirišwa se sengwe le se sengwe seo se lego ka go Dikgatišo le Dibidio tša go Ruta Batho Beibele (Teaching Toolbox), re tlo ipshina ka go ruta batho ka Modimo.
17. Mafelelo e tla ba afe ge o phetha bodiredi bja gago ka botlalo?
17 Ruri ke tokelo e kgolo gore Jehofa o re dumeletše go ba “bašomigotee” le yena! (1 Bakor. 3:9) Ge o “[kgonthišetša] dilo tše bohlokwa kudu” e bile o etiša bodiredi bja gago pele, o tlo “[hlankela] Jehofa ka go hlalala.” (Bafil. 1:10; Ps. 100:2) Ka ge o le yo mongwe badiredi ba Modimo, o ka kgodišega gore Modimo o tla go nea matla ao o a hlokago gore o phethe bodiredi bja gago go sa šetšwe mathata ao o nago le wona. (2 Bakor. 4:1, 7; 6:4) Go sa šetšwe gore maemo a gago a go dumelela go fetša nako e ntši o nea bohlatse goba go se bjalo, o ka “ba le lebaka la go hlalala” goba go thaba ge o dira bodiredi bja gago ka pelo ka moka. (Bagal. 6:4) Ge o phetha bodiredi bja gago ka botlalo, o bontšha gore o rata Jehofa le moagišani. “Ka go dira [bjalo] o tla iphološa wa ba wa phološa bao ba go theetšago.”—1 Tim. 4:16.
KOPELO 58 Go Tsoma Bagwera ba Khutšo
a Jesu o re laetše gore re botše batho ditaba tše dibotse tša Mmušo wa Modimo le go ba dira barutiwa. Sehlogong se re tlo ithuta kamoo re ka phethago bodiredi bja rena ka botlalo gaešita le ge re na le mathata a mantši. Le gona re tlo ithuta kamoo re ka kaonefatšago bokgoni bja rena ge re bolela ditaba tše dibotse le kamoo re ka bago le lethabo ka gona ge re phetha mošomo wo.
b TLHALOSO YA MANTŠU A ITŠEGO: Bodiredi bja rena bja Bokriste bo akaretša dilo tše di fapafapanego, e lego go bolela ditaba tše dibotse le go ruta, modiro wa tlhakodišo, go aga le go hlokomela mafelo a rena a borapedi, a bjalo ka Diholo tša Mmušo, Diholo tša Kopano, Diofisi tša Bofetoledi (di-RTO) le Meago ya Bethele.—2 Bakor. 5:18, 19; 8:4.
c Bala lepokisi leo le rego: “Kamoo o ka Nolofatšago Bophelo bja Gago” leo le tšwelelago go Morokami wa July 2016, letl. 10, gomme o kwe ka ditsela tše šupa tša go dira seo.
d TLHALOSO YA DISWANTŠHO Letlakala 6: Kgaetšedi o nea polelo ya leeto la go boela sebokeng sa gare ga beke. Ge a feditše, modulasetulo o mo nea keletšo gomme kgaetšedi o ngwala tšhišinyo yeo ka poroutšheng ya Go Ruta. Ke moka ka morago o diriša seo a ithutilego sona ge a le tšhemong mafelobekeng.