Letlolo La Dipotšišo

● Ke ka baka la’ng go le bohlokwa go fetša go ithuta dipuku tše pedi ka botlalo le barutiwa ba bafsa gaešita lege ba ka kolobetšwa pele ba fetša puku ya bobedi?

Jehofa o šegofatša phuthego ya gagwe ka bontši bja batho ba bafsa bao ba kgeregelago ka diphuthegong. Re thabela go bona go kgoboketšwa mo mo gogolo. Lega go le bjalo, re lemoga gore batho ba ba bafsa ba nyaka thušo e tšwelago pele le tlhahlo gore ba ithute go direla Jehofa.

Ba bafsa ba nyaka thušo gore ba be le tsebo e nepagetšego ka therešo. (Ba-Kol. 1:9, 10) Re na le tokelo ya go ba thuša go hwetša kwešišo e botse ya dithuto tša motheo tša Beibele le kwešišo e botse ya seo Beibele e se rutago mabapi le ditekanyetšo tša boitshwaro, bophelo bja Bokriste le ditaba tše di tswalanago le tšeo. Se se tla ba thuša gore e be bao ba tseparetšego ka go tia therešong e le gore ba fenye diteko ka moka tšeo di ka bego di le ka pele.

Barutwana gape ba swanetše go ba ba godilego ka mo go tletšego matleng a bona a go kwešiša. (1 Ba-Kor. 14:20) Phihlelo e bontšhitše gore go fihlelela boemo bja motho yo a godilego ka mo go feletšego wa moya, go ba le thuto ya motho ka noši ya Beibele le morutiši go a thuša. Ka gona, gaešita lege motho a ka kolobetšwa pele a fetša thuto ya gagwe ya go ithuta dipuku tše pedi, bohlale bo laela gore thuto ya legae ya Beibele e swanetše go tšwela pele go ba go fihla a feditše go ithuta dipuku ka bobedi.

KA MORAGO GA KOLOBETŠO

Jesu o itše re swanetše go dira barutiwa—re ba kolobetše le go ba ruta. (Mat. 28:19, 20) Karolo e kgolo ya go ruta barutiwa e dirwa ka morago ga kolobetšo. Tsebo yeo motho a ka e hwetšago go tšwa pukung e tee feela gantši ga se yeo e lekanego go phetha tlwaetšo ya gagwe ya moya. Tlhahlo e oketšegilego e a nyakega go mo tiiša bakeng sa modiro wa bodiredi le go mo hlama gore a lwantšhane le dikgateletšo tšeo di tlelago bao ba direlago Jehofa mehleng ye ya bofelo. Go palelwa ke go nea tlwaetšo e lekanego go ka tlogela morutwana e le yo a sa itokišetšago moyeng go ka ikemela ka noši. Ka morago ga ge motho yo mofsa a kolobeditšwe, re tšwela pele re mo thuša gore a dire tšwelopele e oketšegilego go sa šetšwe ge e ba a feditše go ithuta dipuku tše pedi goba go se bjalo. Puku ya mathomo yeo e ithutwago e nea kwešišo dithutong tša motheo. Puku ya bobedi e akaretša dika tša Bokriste. Dipuku tše e ka ba puku ya Phela ka mo go sa Felego gomme ka morago mo gongwe puku ya Go ba Batee Borapeding goba Khutšo ya Kgonthe. Ge e ba dipuku tše di se gona, tše dingwe tšeo di nago le tsebišo e swanago di ka dirišwa. Go tšwetša pele thuto ya Beibele go ba go fihla ge puku ya bobedi e feditšwe, go nea thuto e kwagalago ka merero ya Jehofa gaešita le ditekanyetšo tša gagwe tše phagamego tša Bokriste le melao. Se se thuša motho yo mofsa gore a kwešiše seo se bolelwago ke melao ya motheo ya Bokriste gomme a tseme medu ka go tia tumelong. (Ba-Kol. 2:7) Bakeng sa ditaba ka botlalo tše oketšegilego le tsebišo ka go bega dithuto tše bjalo, bona Letlolo la Dipotšišo ka go Tirelo ya Rena ya Mmušo ya November 1987.

Ee, ka morago ga kolobetšo ba bafsa ba swanetše go letelwa gore ba dire tšwelopele ya moya. (Ba-Heb. 6:1-3) Mabakeng a mantši ga go tšee nako go fetša puku ya bobedi. Ka baka leo motho yo mofsa o newa motheo o tiilego.