Go Fihlelela Dinyakwa Tša Puno Ka Lethabo

1 Ee, ye ke nako ya puno. Ga bjale re nakong ya bofelo bja tshepedišo ye ya dilo, gomme bjalo ka ge Jesu a boletše go se sengwe sa diswantšho tša gagwe, “Punô ké bofêlô bya lebaka leno [“tshepedišo ya dilo,” NW].” (Mat. 13:39) Go Johane 5:17, Jesu o itše: “Tate ó sa dira le byalo; ’me le Nna ke a dira.” Nakong ye ya modiro wa go buna, batho ba Jehofa ga se ba swarega feela ka go bolela ditaba tše di lokilego tša Mmušo, eupja ba bile ba lokišetša mafelo a borapedi. Gona bjale go feta lege e le neng pele, go nyakega Diholo tša Mmušo. Se se kgahlišago ke gore Jehofa o tutueditše bahlanka ba gagwe gore ba ithape ka bokgoni bja bona go agweng ga Diholo tša Mmušo. Ga se feela gore ba šoma ka matla eupja ba bile ba bonagatša moya wa lethabo.

2 Gona bjale go bjalo ka mehleng ya Nehemia nakong ya ge ba-Isiraele ba be ba ba swaregile ka go aga maboto a Jerusalema. Nehemia 4:6 e bolela gore “sethšaba se be se dira ka mafolofolo.” Ke’ng seo se bego se tutuetša boemo bjo bobotse bja pelo? Se bolelwa ka morago go Nehemia 8:10: “Xobane xo thabêla Morêna ké ôna matla a rena.” Re tloga re e-na le mabaka ka moka a gore re be bašomi ba thabilego. Re šegofatšwa ke Jehofa. Re na le moya wa Jehofa, gomme lethabo ke karolo ya dienywa tša moya wa gagwe.—Ba-Gal. 5:22.

3 Dikomiti tša tša Meago tša Tikologo: Dipego tšeo di tšwago tšhemong ya lefase ka bophara di bontšha gore ‘mašemo a šweufaletše go bunwa.’ (Joh. 4:35) Go naganwa ka senyakwa se, ka 1984 Mokgatlo o ile wa thoma go kgetha Dikomiti tša tša Meago tša Tikologo bakeng sa go thuša diphuthego ka mananeo a go agwa ga Diholo tša Mmušo, go sa šetšwe gore ke meago e mefsa goba meago e mpshafatšwago. Bagolo bao ba kgethilwego gore ba šome dikomiting tše ke banna ba moya bao gantši ba nago le phihlelo e kgolo go tša meago le tša kgwebo. Keletšo ya bona e ipontšhitše e le e holago, kudu-kudu ge go e-na le moya wa tirišano magareng ga bona le banababo rena bao ba šomago komiting ya lefelong leo ya meago.

4 Diphuthego tše tharo tšeo di amogetšego thušo go tšwa go baithapi bao ba šomago le Komiti ya tša Meago ya Tikologo ka morago ba ile ba ngwalela komiti bakeng sa go bontšha tebogo. Ba ile ba bolela ka bohlale ka gore: “Hle anke le fetišetšeng lerato la rena le ditebogo go basadi ba lena, bana ba lena le diphuthego tša gabo lena. Re leboga boikgafo bjo ba bo dirago ka go le hlakanela le batho ba Jehofa ba bantši gakaakaa.”

5 Komiti e nngwe ya selete e begile gore: “Re hweditše tirišano e botse go tšwa komiting ya tša meago ya tikologong. Re tšwela pele re dumela gore . . . ye ke e nngwe ya dibopego tše putsago tša karolo yeo re nago le yona, e lego tswalano yeo re e hlagolelago le komiti ya tša meago ya tikologong.” Komiti ya tša meago ya tikologong yeo e emelago diphuthego tše pedi e sa tšwa go ngwala gore: “Thulaganyo ye e tliša ditšhegofatšo tše makatšago phuthegong. Re rata go bolela tše dingwe tša tšona: go nea tlhahlo e botse ya modiro ka komiti ya tša meago, go rulaganyetša gore banababo rena ba moya ba makgolo-kgolo bao ba nago le tsebo ya modiro ba tle ba thuše, go dira gore modiro wa go aga o kgone go dirwa ka lebelo leo le sa fokodišego phuthego moyeng eupja le matlafatša go ratana ga banababo rena, go nea bohlatse bjo bobotse setšhabeng, gomme se se kaone kudu, e le go tšweletša lefelo le lebotse leo go tumišwago Jehofa go lona.”

6 Ikopanyeng le Komiti ya tša Meago ya Tikologo ka Pela: Ge diphuthego di nagana ka go thoma modiro wa go mpshafatša goba wa go aga moago o mofsa, bagolo ba phuthego ba swanetše go ikopanya le modula-setulo wa komiti ya tikologo mathomong a modiro. Dikomiti tša tša Meago tša Tikologo di neilwe tlhahlo ke Mokgatlo, gomme bana ba babo rena ba na le phihlelo e kgolo yeo e tlago go le thuša go phema diphošo ge le reka lebala le go rulaganyetša modiro wa go aga. Ge e ba ba dula ba tsebišwa ka botlalo ka mediro ka moka lefelong leo ba le abetšwego, komiti ya selete e ka rulaganya baithapi e le gore mediro ka moka e fetšwe ka ntle le go šomiša bašomi bao ba nago le bokgoni kudu ka matla. Komiti e nngwe le e nngwe ya tša Meago ya Tikologo e boloka malokelelo a bašomi le go rulaganya baithapi bao ba lego lefelong leo e abetšwego go šoma go lona.

7 Tlhahlo yeo e neilwego dikomiti tša tikologo e akaretša mabaka ao a swanetšego go hlahlobja ka kelohloko pele go hwetšwa lebala, bjalo ka melao ya lekgotla la tikologo, ya lekgotla la mmasepala le ya lekgotla la motse yeo e laolago maemo a fapa-fapanego ao a kgomago modiro wa go agwa ga Diholo tša Mmušo. Diphuthego di ka holwa ke go hlokomela ka bohlale ga bagolo bao ba kgethilwego gore ba šome Komiting ya tša Meago ya Tikologo ka go ikopanya le bona di sa tloga fase, nako e teletšana pele ga ge go ka rekwa lebala.—Die. 15:22.

8 Bagolo ba ka ikopanya le Komiti ya tša Meago ya Tikologo ka molebeledi wa tikologo. O na le leina, aterese le nomoro ya mogala ya modula-setulo wa komiti yeo e abetšwego go thuša ka go agwa ga Diholo tša Mmušo lefelong leo phuthego e lego go lona.

9 Go Reka ka Bohlale: Ka kakaretšo, diphuthego di ile tša reka ditlabelo tša go aga ka bohlale. Mokgatlo ga o na lenaneo la go reka la kakaretšo bakeng sa go reka ditlabelo tša go aga. Lega go le bjalo, nako le nako, badiri ba bangwe ba ditlabelo ba rekišetša diphuthego ka go lebanya ka ditheko tše kgethegilego. Ge se se direga Mokgatlo o tla romela tsebišo ya barekiši ba go Dikomiti tša tša Meago tša Tikologo. Tabeng ye Mokgatlo goba komiti ya tikologo ga di bolelele barekiši ba. Ke feela taba ya go fetišetša tsebišo go diphuthego tša lefelong leo e le gore ditlabelo le ditheko tšeo di neelwago di tle di tsebje gomme go dirwe dipapišo.

10 Bagolo ba diphuthego ba swanetše go bona gore ditlabelo di hwetšwa ka go bapiša ditheko ka kelolohloko. Komiti ya tikologo e ka thuša tabeng ya go tšweletša lenaneo la dilo tšeo di swanetšego go rekwa, gotee le dilo tša go kgabiša ka gare. Komiti e nngwe le e nngwe e swanetše go ba e tseba baithapi bao ba nago le phihlelo ditabeng tše bao ba ka ithapelago go thuša diphuthego tabeng ya go rulaganya lenaneo la ditlabelo tšeo di swanetšego go rekwa. Banababo rena ba bangwe bao ba nago le tsebo ditabeng tša kgwebo ba ka dirišetšwa go hwetša ditheko tše swanetšego tša ditlabelo. Go swanetše go ikopanywa le barekiši ba bantšinyana bakeng sa go bona ditheko tše kaone-kaone mola go dutše go lebeletšwe boemo bjo bo kaone bja phahlo. Gaešita lege ka dinako tše dingwe go dirwa dithulaganyo tša go nea ditlabelo goba ditirelo “ka tefo e itšego” bagolo ba swanetše go hlahloba ditaba ka botlalo ka kelohloko, ka ge ka dinako tše dingwe go akaretšwa ditefo tšeo di fihlilwego. Ka ge go dirišwa ditšhelete tše di neetšwego, tirišano ya phuthego le Komiti ya tša Meago ya Tikologo e tla thuša go kgonthiša gore ditšhelete tše di dirišwa ka bohlale.

11 Dirang gore Polane ya Holo ya Mmušo e be e Bonolo: Gaešita lege phuthego e ka ba e kgobokeditše ditšhelete tše lekanego bakeng sa go akaretša dilo tše di oketšegilego ka ntle le go nyaka kadimo ya tšhelete, go swanetše go hlokomelwa gore go dirišwe dipolane tše tlwaelegilego le go aga moago wa maemo a lekanetšego. Se se dira gore go be le ditšhelete tše oketšegilego tšeo di ka dirišwago ditabeng tše dingwe tša pušo ya legodimo. (omSE letl. 61; 2 Ba-Kor. 8:14) Ka ge ba bantši ba ithapela go šoma medirong ya Diholo tša Mmušo, bašomi ba ka ikwa ba rwešwa morwalo ge ba kgopelwa gore ba age goba ba tsenye mekgabišo e nyakago go šongwa ka thata. Gaešita lege modumo o kwalago o nyakega, feela ditshepedišo tše di raraganego tšeo di okeditšwego ka dilo tše dingwe gantši ga di seketše tšhelete goba ga se tšeo di nyakegago. Go swanetše go naganišišwa ka kelohloko ka dilo tše bjalo pele di akaretšwa modirong wa go aga. Komiti ya tša Meago ya Tikologo e ka nea keletšo e bohlokwa tabeng ya go thuša go dira diphetho tše leka-lekanego mabapi le polane.

12 Diphuthego tše dintši di ile tša aga Diholo tše difsa tša Mmušo ka ditšhelete tšeo di adimišitšwego lefelong leo ke bao ba kopanelago le phuthego. Ka dinako tše dingwe Holo ya Mmušo e ile ya rekišwa gomme tšhelete yeo e amogetšwego ka morago ga thekišo ya ba e lekanego bakeng sa go thuša ka go agwa ga moago o mofsa o mogolo. Lega go le bjalo, diphuthego tše dingwe di swanetše go hwetša thušo e oketšegilego ya tša ditšhelete. Di ka ikopanya le Mokgatlo bakeng sa go botšiša ge e ba di ka hwetša tšhelete ya kadimo, di latela tlhahlo yeo e neilwego bagolo ka lengwalong la December 23, 1991. Pele ba kgopela tšhelete ya kadimo go Mokgatlo, bagolo ba swanetše go dira tlhahlobo ka phuthegong go bona gore (1) go tla neelwa bokae mathomong bakeng sa go thuša ka go reka lebala le bakeng sa ditshenyagalelo tša go aga, (2) go ka adingwa bokae ka phuthegong go bao ba kopanelago le (di)phuthego yeo e akaretšwago le gore (3) go tla neelwa bokae kgwedi le kgwedi bakeng sa go lefelela ditshenyagalelo tša go hlokomela phuthego le go buša tšhelete lege e le efe ya kadimo yeo e hweditšwego go Mokgatlo. Ga go na maina ao a swanetšego go bontšhwa dipampišaneng tšeo di tsenywago ge tlhahlobo ye e dirwa. Go bohlokwa gore bohle ba nee dipalo tše di nepagetšego, ba be le pono ya kgonthe ka meneelo ya bona ka noši le ditebelelo tša ditšhelete tša kadimo, ka ge bagolo ba tla diriša dipalo tše ge ba dira diphetho tše boima bakeng sa phuthego.

13 Ge modiro wa go agwa ga Holo ya Mmušo o fedile, ka dinako tše dingwe go ba le ditšhelete tšeo di šalago. Ge e ba go be go hweditšwe tšhelete ya kadimo ka Mokgatlo, gona tšhelete lege e le efe yeo e šetšego e swanetše go bušetšwa go Mokgatlo ka bjako. Ka gona Mokgatlo o tla kgona go aba tšhelete go ba bangwe bao ba nyakago thušo. Ditšhelete tšeo di šetšego ga se tša swanela go bolokwa phuthegong goba tša adingwa diphuthego tše dingwe ke (di)phuthego yeo e akaretšwago.

14 Go Akanyetša Ditshenyagalelo le Megato ya go Bala Tšhelete: Pele ga ge go thongwa modiro wa go agwa ga Holo ya Mmušo, go swanetše go akanyetšwe ka kelohloko ditshenyagalelo tša go aga pele go dirwa phetho ya mafelelo ya kgopelo ya kadimo ya tšhelete. Se se thibela go imetša bagoeledi ka morwalo o boima go feta ka mo go nyakegago. Le gona, se se dira gore tšhelete e dule e le gona ka Sekhwameng sa Mokgatlo sa Diholo tša Mmušo bakeng sa diphuthego tše dingwe tšeo di nyakago thušo e kgolo bakeng sa Holo ya Mmušo yeo e kaonefaditšwego. (Ba-Fil. 4:5) Ka ge bao ba šomago le komiti ya tša meago ya tikologo ba e-na le phihlelo kudu tabeng ye, dikakanyetšo tšeo e swanetše go ba tše nepagetšego. Gaešita lege ditshenyagalelo tšeo di sa letelwago di ka baka ditshenyagalelo tše oketšegilego, dikakanyetšo tšeo di nepagetšego ka mo go lekanego di ka hlongwa ka thulaganyo e botse le go hlahloba dilo tšeo di ka bakago ditshenyagalelo tše dikgolo, ka go rialo gwa fediša go nyakega ga tšhireletšo e kgolo yeo e swanetšego go akaretšwa dikakanyetšong tša ditshenyagalelo.

15 Modiro wa go agwa ga Holo ya Mmušo o akaretša ditshenyagalelo tše dikgolo tša tšhelete tša phuthego. Bagolo ba swanetše go bona gore ditšhelete di swarwa ka mokgwa wa boikarabelo. Go swanetše go bolokwa dipego tše nepagetšego tša ditšhelete, gomme (di)phuthego yeo e akaretšwago e swanetše go newa dipego tše kwagalago kgwedi le kgwedi. Balebeledi ba okamelago ba swanetše go bona gore sekhwama sa moago le ditšhelete ka moka tšeo di lego mabapi le sona di balwa ka kotara e nngwe le e nngwe dikgweding tšeo ditšhelete tša ka mehla tša phuthego di balwago ka tšona. Phuthego e swanetše go nea tumelelo bakeng sa modiro ka moka wa go aga ka morago ga go botšwa ditaba ka botlalo le ditshenyagalelo tšeo di akanyetšwago. (kmSE 8/84 letl. 3) Ka morago ga moo, tumelelo bakeng sa ditheko ka moka e swanetše go newa ka mokgwa o swanetšego pele ditšhelete lege e le dife di dirišwa. Mafelelong a modiro wa go aga, ditšhelete ka moka tšeo di dirišitšwego di swanetše go balwa gabotse. Moo Dikomiti tša tša Meago tša Tikologo di sa hlokomelego ditšhelete, kopi ya kakaretšo ye e swanetše go abelanwa le Komiti ya tša Meago ya Tikologo ka ge se se tla thuša bana ba babo rena gore ba dule ba e-na le pego e nepagetšego ya dikakanyetšo tše nepagetšego ge ba thuša diphuthego tše dingwe tšeo di naganago ka modiro wa go aga.

16 Seo se Phethilwego: Ga bjale go na le Dikomiti tša tša Meago tša Tikologo tše 24 tšeo di lego ka tlase ga tlhokomelo ya lekala la Afrika Borwa. Di bega gore ngwaga le ngwaga go agwa Diholo tša Mmušo tše difsa tše ka bago 24 gomme go swaraganwa gape le mediro ya go mpshafatša. Dikomiti tša tša Meago tša Tikologo di ile tša ba tša thuša Mokgatlo mananeong a go aga magae a baromiwa a Mokgatlo, lefelo la bogorogelo bja dipuku kua Durban le lefelo la bobolokelo Holong ya Kopano kua Eikenhof. Se ke bohlatse bja botee le moya wa boithapo woo o bontšhwago ke bao ba ratago Jehofa le banababo bona.—Joh. 13:34, 35.

17 Re Bonwa ke ba Bangwe: Moapostola Paulo o itše: “Re seboxêlô sa lefase le sa Barongwa le sa batho.” (1 Ba-Kor. 4:9) Bakriste lehono ba bogetšwe, kudu-kudu ba bogelwa nakong ya go agwa ga Holo ya Mmušo. Modiro woo o dirwago le moya wa lethabo wa badiri ga se woo o sa hlokomelwego. Ka baka leo, dikuranta di gatiša dihlogo tša ditaba tše dikgolo tše bjalo ka “Dihlatse tša Jehofa: Modiro wa Bona o Ile wa Phethwa,” “Ka Moya wa Kgonthe wa go Thuša,” le “Letšatšing la Boraro, ba Ile ba Khutša.”

18 Botee bja bašomi ba baithapi ka mehla bo ile bja makatša babogedi. Go baagišani ka borwa bja Johannesburg go ile gwa bonala eka “basadi le bana” ba be ba aga Holo ya Mmušo lefelong la bona la bodulo la ka ntle ga toropo. Ba be ba e-na le kgonono mabapi le ge e ba Dihlatse di tla fetša modiro wa go aga. Eupja go se go ye kae ba ile ba fetola menagano ya bona ge ba bona Holo ya Mmušo e botse e ema ka nako e kopana.

19 Kuranta ya Natala e ile ya bolela se se latelago mabapi le modiro wa go aga woo o bego o dirwa ke phuthego ya lefelong leo: ‘Holo ya Mmušo ya ditena tše di kgabišitšwego (face-brick), e agwa ka ntle le tefišo! Ee, go sa šetšwe gore o dumela se goba ga o se dumele, go šoma ka matla le boineelo bja go hloka boithati bja phuthego ya Toti ya Dihlatse tša Jehofa go ile gwa bonagala ka mafelo-beke a 10 ge ba be ba ikagela holo e mpsha ya mmušo bakeng sa go lebeletšana le dipalo tša bona tšeo di golago ka lebelo.’

20 Phuthego ya kua Ulundi e ile ya bontšha tebogo ya yona go Komiti ya tša Meago ya Tikologo gomme ya bolela gore: “Ga re kgone go ngwala pampiring kamoo re ikwago ka gona ka seo le re diretšego sona. . . . Re kgonne go lemoga gore dihlopha le bathekgi ba tšona ba be ba sa agele Phuthego ya Ulundi feela Holo. Eupja kudu-kudu ba be ba e agela Jehofa. Boemo le bothakga bjoo holo ye e botse kudu e agilwego ka bjona di ka tswalanywa feela le tutuetšo yeo.”

21 Mongwadi wa sehlopha sa bo-ra-ditaba o hlalositše gore: “Bjalo ka ge seema se bolela, Roma ga se ya agwa ka letšatši le tee, eupja phuthego ya lefelong la rena ya Dihlatse tša Jehofa e ile ya nyaka e dira gore kgopolo yeo e felelwe ke mošomo ge ba aga Holo ya bona ya Mmušo e mpsha.” Mongwadi o mongwe o ile a akaretša modiro wa go agwa ga Holo ya Mmušo ya lefelong la gabo gomme a bolela gore: “Se mo gongwe se ka bonala e le selo seo o kwago feela ka sona, eupja se diragetše gona mo. . . . Seo ba bantši ba se bonago e tloga e le mohlolo, Dihlatse tša Jehofa di se bona e le selo se se tlwaelegilego. . . . Gaešita lege ba ka ba ba sa rate go ikgantšha ka katlego ya bona, feela moya wa bona le tirišano di beela ba bangwe mehlala yeo ba ka e latelago.”

22 Kua Texas, U.S.A. motho yo e sego Hlatse o ile a ngwalela kuranta ka morago ga go bogela mediro ya go aga yeo e dirwago ka go akgofa: “Ke ile ka bogela ka go tlabega ge moago o ema pele ga mahlo a-ka. Batho ba be ba swaregile ka modiro ka gare le ka ntle. . . . Go be go sa hlabje mašata, go sa roganwe, goba go neela ditaelo mo go bonagalago. Ge o le kgole go be go bonala e ka seatla se se sa bonagalego se be se laela o mongwe le o mongwe. Mohlomongwe go bjalo. Ke sa dutše ke tlabilwe ke kgonthe ya se.” O ile a phetha lengwalo la gagwe ka gore: “Ge ba e-tla legaeng la gago, ga ba tlele go go ngamola hlogo. Ba fo nyaka go abelana le o mongwe le o mongwe lerato le lethabo la bona. Mohlomongwe re swanetše go fo ba theetša. Ke a tseba gore ke tla ba theetša. Ka gobane seo ke se bonego mafelo-bekeng a fetilego se be se swana le seetša seo se phadimago lefaseng le le fsifetšego, gomme lehono rena batho re nyaka karolo ya seetša seo le lerato.”

23 Thušo e Lerato ya Baithapi: Baithapi ba dikete-kete, bao ba akaretšago bašomi bao ba nago le tsebo ya modiro bao ba thušago ka go agwa ga Diholo tša Mmušo, ruri ba swanetše go retwa. Go dira ga bona se ka ntle le go amogela tšhelete ya ditshenyagalo bakeng sa boiteko bja bona ke bohlatse bja go šoma ga moya wa Jehofa go bona. (Dit. 20:35; 1 Joh. 4:12, 13, 21) Bašomi ba ba thabilego ba phetha modiro o montši lefelong la moago.

24 Bašomi ba bantši bao ba swanelegago ba neela nako ya bona le tsebo ya bona ya modiro bakeng sa go thuša ka go reka lebala, go dira dithulaganyo tša moago, go aga le boentšineare, go kgabiša, go beakanya mabala, go lokiša lebala, go reka, ditirelo tša dijo, taolo ya dikoloi, go lotega le tše dingwe. Banababo rena ba neela ditlabelo tša bona gore di dirišwe medirong ye ya go aga. Se se swanetše go ba se thabiša Tatago rena, Jehofa gakaakang ge a bona ba diriša dithoto tša bona le bokgoni bja bona ka tsela ye!—Bapiša le 1 Ba-Thesalonika 2:6-9 le 2 Ba-Thesalonika 3:8b.

25 Go Nyakega Bašomi ba Oketšegilego: Dikomiti tša tša Meago tša Tikologo di bega gore go nyakega baithapi ba bangwe ba bantši. Ye ke tirelo yeo e nyakegago bakeng sa go thekga dikgahlego tša Mmušo. (1 Ba-Kor. 15:58) Go nyakega bašomi bao ba nago le bokgoni, go etša ge go nyakega banababo rena ba bangwe bao ba godilego tsebong bao ba nago le ditshwanelego tša moya gaešita lege ba se na tsebo ya modiro wa go aga. Ge e ba o e-na le ditshwanelego tšeo, na o ka dira dipeakanyo e le gore o tle o be boemong bja go ithapa? (Jes. 6:8) Ka mohlala, bagolo ba bangwe goba bahlanka ba bodiredi ba ka kgona go thuša moagong wa Holo ya Mmušo mafelo-bekeng a tee kgweding e nngwe le e nngwe goba tše pedi. Mo gongwe ba ka newa tlwaetšo e le gore ba tle ba rwale boikarabelo bjo oketšegilego, gantši e le mahlakoreng ao e sego a tša go aga. Se se tla thuša banababo rena bao ba šomago ka thata bao ba okamelago modiro.

26 Dikomiti tša tša Meago tša Tikologo le dikomiti tša meago tša diphuthego di rulaganya gore baithapi ba be lefelong la moago ge go nyakega thušo ya bona. Baithapi ba ka mehla ba nyaka go hlompha seo ba se boletšego gomme ba hlompha dinako tše go beelanwego tšona ka potego, ba dira gore ‘Ee ya bona e be Ee.’ (Mat. 5:37) Ge e ba selo seo se bego se sa letelwa se ka ba thibela go dira seo, ba tsebiša molebeledi yo a ikarabelago. Baithapi ba boela diphuthegong le malapeng a gabo bona ka bjako ka mo go kgonegago gomme ga ba foše go kopanela dibokeng le tirelong ya tšhemo ka mo go sa nyakegego. Bao ba lego lefelong la moago wa Holo ya Mmušo e tla ba bao e lego (1) baithapi bao ba amogetšwego bao ba abetšwego ka mo go kgethegilego ke bao ba etelelago pele mahlakoreng gore ba be gona le (2) bao ba tšwago diphuthegong tša lefelong leo Holo ya Mmušo e agwago go lona gore ba bope sehlopha sa kakaretšo sa bašomi bao ba se nago tsebo ya modiro. Ba bangwe ba kgothaletšwa gore ba thekge modiro wa tirelo ya tšhemo diphuthegong tša gabo bona.

27 Megato ya Boithapi: Motho o ithapa bjang? Ka December 1991 sehlopha se sengwe le se sengwe sa bagolo se ile sa romelwa sesola sa difomo tša Kingdom Hall Construction Worker Questionnaire. Tšona di ka hwetšwa ke bašomi ba swanelegago ge ba di kgopela. Ge go nyakega difomo tše oketšegilego, bagolo ba ka di hwetša go molebeledi wa tikologo. Bagolo ba na le ditaelo tše feletšego mabapi le baithapi bao ba nyakegago le ditshwanelego tšeo di swanetšego go fihlelelwa.

28 Ge e ba o rata go ithapa bakeng sa go thuša go agweng ga Diholo tša Mmušo lefelong la geno gomme o le mohlanka wa bodiredi goba mogolo goba o le Mokriste yo a beago mohlala o mobotse yo e lego mošomi yo a nago le bokgoni, o ka kgopela e nngwe ya difomo go bagolo ba phuthego ya geno. Bušetša fomo e tladitšwego go bagolo. Ba tla tlaleletša ka ditlhaloso tša bona gomme ba e fetišetša go molebeledi wa tikologo yoo le yena a tlago go tlatša fomo gomme a e romela go Komiti ya tša Meago ya Tikologo. Ge e ba maemo a gago a go dumelela gomme o swanelegela go ithapa, o tla ba le ditšhegofatšo tše dikgolo ge o dutše o bona lethabo la bana beno le dikgaetšedi ge modiro wa go agwa ga Holo ya Mmušo o fedile, bakeng sa go tumiša Jehofa.

29 Bohle ba ka Thuša: Bao ba sego boemong bja go ithapa le bona ba dira modiro o bohlokwa. Ba thuša ka go hlokomela dinyakwa tša phuthego mola ba bangwe ba hlankela modirong wa go agwa ga Diholo tša Mmušo. Ka ntle le pelaelo baithapi ba bangwe ka dinako tše dingwe ba tla swanela gore ba se be gona dibokeng phuthegong ya gabo bona ge ka lerato ba thuša diphuthego tše dingwe ka go agwa ga Diholo tša Mmušo.

30 Gape ge Holo ya Mmušo e agwa kgaufsi, bagoeledi bao ba se nago bokgoni bja go aga phuthegong ya gabo lena ba ka ba le sebaka sa go thuša e le karolo ya sehlopha sa bašomi ka kakaretšo. Bašomi ba ga ba tlatše difomo tša baithapi. Go tsebišwa ka go nyakega ga thušo, gomme dithulaganyo di dirwa ke bagolo ba (di)phuthego yeo e dirago modiro wa go aga le bagolo ba diphuthego tša baagišani motheong wa gatee ka nako.

31 Ka moka ga rena re na le sebaka sa go neela ka tša ditšhelete bakeng sa Sekhwama sa Mokgatlo sa Diholo tša Mmušo ge maemo a rena a re dumelela. Ga e sa le Sekhwama sa Mokgatlo sa Diholo tša Mmušo se hlongwa ka January 1990, ditšhelete di ile tša hwetšwa di e-tšwa le dinageng tše dingwe, bakeng sa go thuša ka go agwa ga Diholo tša Mmušo tše 33 tšhemong ya lekala la Afrika Borwa. Tšona di dirišwa ke diphuthego tše 44. Diphuthego tše dintši di be di ka se hwetše mafelo a bjalo a mabotse a diboka ge nkabe e se be ka lerato la borwarre leo le bontšhwago ka thekgo ya lena e botho ya go thekga Sekhwama sa Mokgatlo sa Diholo tša Mmušo.

32 Sekhwama sa Mokgatlo sa Diholo tša Mmušo se adimiša ditšhelete bakeng sa go thuša go agweng ga Diholo tša Mmušo. Ka ge ditšhelete di bušetšwa di e-na le dipoelo, ditšhelete tše di adingwa diphuthego tše dingwe tšeo di nyakago thušo. Ke mo go holago go ikopanya le Mokgatlo bakeng sa kadimo ya tšhelete pele le tsoma thušo ya ditšhelete femeng ya tša kgwebo.

33 Mantšu a Tebogo: Ka morago ga ge Holo ya bona ya Mmušo e fedile, phuthego ya Newcastle e boletše se lengwalong leo e le ngwaletšego Mokgatlo: “Re leboga Jehofa kudu gomme re rata go le leboga kudu bakeng sa go re nea kadimo ya tšhelete bakeng sa Holo ya rena ya Mmušo le thušo yeo re e neilwego.”

34 Phuthego e nngwe e ile ya bontšha tebogo bakeng sa thušo e lerato yeo ba e neilwego ka go bolela gore: “Re rata go le botša ka ditebogo tša rena tše tšwago pelong bakeng sa thušo ya Sekhwama sa Mokgatlo sa Diholo tša Mmušo. Ka ntle le sona go agwa ga holo [ya rena] go be go tla ba thata kudu le go diega ka nako e itšego. Bohlale bja Jehofa bo tloga bo bonala thulaganyong ye.”

35 Phuthego ya Knysna e ngwadile gore: “Re thabela go bega gore Holo ya rena ya Mmušo ga bjale e feditšwe ka mo go feletšego. Re hweditše dipolelo tše dintši tše di kgothatšago le ditheto mabapi le holo e mpsha gomme re šetše re swaretše diboka tše mmalwa ka go yona. Re lemoga gore ka ntle le moya wa Jehofa le thušo ya ditšhelete [ya Mokgatlo] se se be se ka se kgonege, gomme re leboga e le ka kgonthe.”

36 Go tšwa Lebowa-Kgomo re hweditše dipolelo mabapi le moya o mobotse woo o hlagoletšwego ke banababo rena le dikgaetšedi: “Mathomong ditšhelete tšeo di kgobokeditšwego e be e le tše nyenyane. Ke moka ngwanabo rena T— a nea phuthego polelo yeo go yona a ilego a gatelela gore ba be ba ka se age Holo ya Mmušo ka disente tše 10. Ka morago ga se meneelo ya phuthego e ile ya kaonefala go iša bokgoleng bja gore mafelelong [re] ile ra dira tšhelete e lekanago R15000,00. Ke moka Mokgatlo wa thuša ka kadimo ya tšhelete yeo e dirilego gore [re] kgone go aga Holo ye ya Mmušo. — Baagišani ba ile ba makatšwa ke go bona batho bohle ba šoma gotee go akaretša le ba merafo ka moka. — Ka ge bjale Holo ya Mmušo e fedile, e tšwelela e le lefelo le lebotse la borapedi bakeng sa Dihlatse tša Jehofa mono Lebowa-Kgomo.”

37 Modiro o ka Pele: Ee, ka moka ga rena re na le lebaka la go ba bao ba thabilego ge re fihlelela dinyakwa tša puno. Re swanetše go ba le moya wa tirišano—re šome gotee le go thekga ka mo go tletšego modiro wo wa bohlokwa. (Ps. 133:1) Re thaba gakaakang go ba le banna bao ba kgethilwego ke phuthego ya Jehofa bakeng sa go etelela pele bobedi ditabeng tša moya le go agweng ga meago yeo e nyakegago! Paulo o ile a ipiletša go ba-Filipi ka gore: “Tlatšang lethabô la-ka, Le bê ba ba kwanaxo kxopolong le leratong le pelong le menaganong.” (Ba-Fil. 2:2) Ruri, re na le mabaka ka moka a go thaba, ka ge re neilwe ditaba tše di lokilego tša Mmušo o hlomilwego tšeo “di tlago go bolelwa lefaseng ka moka leo go agilwego go lona gore e be bohlatse go ditšhaba ka moka” pele bofelo bo e-tla. (Mat. 24:14, NW) Go ema ga rena ka go tia ka lehlakoreng la Mmušo le go šoma ka potego bakeng sa dikgahlego tša wona go thabiša pelo ya Jehofa. “Ngwan’a-ka! Hlalefa, O nthabiše pelo, ke tsebê se nkaxo fetola sôna xe ba nnyatša.” (Die. 27:11) Re na le tokelo e kgolo gakaakang ya go šoma gotee le go kopanela ka lethabo le Jesu Kriste modirong wa Jehofa!