Go Nyakega Ga Gore Batho Ba Tsome Modimo

1 Lekgolong le la bo-20 la nywaga, batho ba bantši ba ile ba hudugela mafelong a mangwe ka baka la dintwa, kgatelelo le mathata a tša boiphedišo. Le gona, lefase le bonala le nyenyefala ka baka la dinamelwa tše di akgofago le kgokagano e akgofago ya tša poledišano. Se se dirile gore dihlopha tše fapa-fapanego tša bodumedi di batamelane kudu. Ke ka baka leo go kwewago ditaba tše dintši ka bodumedi le kamoo bo kgomago batho ka gona kae le kae.

2 Modiro wa rena wa boboledi le wona o kgomegile. Ga go sa hlwa go makatša go kopana le batho ba bodumedi bjo re sa bo tsebego.

3 Go re thuša gore re be le kwešišo e kaone ka madumedi a mangwe, re neilwe puku ya Go Tsoma ga Batho Modimo. E araba dipotšišo tše makgolo mabapi le ditumelo tša motheo tša madumedi a magolo a lefase. Re tla ba re diriša puku ye bodireding bja rena kgweding ya June. Ke dihlogo dife go tšwa go thušo ye e bohlokwa kudu tšeo di ka gatelelwago go kgothaletša batho ba botegago gore ba ithute ka mo go oketšegilego ka Modimo?

4 Potšišo e nngwe ya motheo yeo e ahlwa-ahlwago pukung ye ka moka ke e rego: Na motho o na le moya (soul) o sa hwego woo o phologago lehu gomme wa tšwela pele o phela ka morago ga lehu? Mo e nyakilego e e-ba bodumeding bjo bongwe le bjo bongwe, go rutwa kgopolo yeo ka sebopego se itšego. Dipotšišo tše dingwe tšeo di ahla-ahlilwego ka pukung šidi: Na go na le lefelo le go thwego ke diheleng moo meoya e hlokofatšwago gona? Kholofelo ya kgonthe ya bahu ke efe? Na go na le Modimo o tee, goba go na le medimo e mentši? Tlhokomelo e ka lebišwa dipotšišong tšeo di lego go matlakala 17-18 tša puku ye. Gaešita lege o bolela le moila-Modimo goba mo-agnostic, potšišo 4 le 5 e ka tanya tlhokomelo ya gagwe, gomme mohlomongwe ya feleletša ka poledišano e holago.

5 Batho ka moka ba swanetše go tsoma Modimo le go tsoma go amogelwa ke yena gona bjale. Ditiragalo tša lefase di bontšha gore Haramagedone e tla ka lebelo. Ke nako ya go gata mogato ka mafolofolo. A tokelo e kaakang ya go kgothaletša ba bangwe go tsoma Jehofa gona bjale, ge a sa dutše a ka hwetšwa! (Jes. 55:6, 7) Puku ya Go Tsoma ga Batho Modimo e thuša batho bjang go tsomeng ga bona Modimo? E nea tsebišo e tanyago mogopolo go batho bao ba nago le ditlogo tše di fapa-fapanego. Ka mohlala, serapeng sa 26 go letlakala 297 e šupetša ma-Moseleme gore Bokriste bja kgonthe ga bo rute thuto ya Boraro botee. Ela hloko kamoo serapa 43 go letlakala 229 se ka tsošago kgahlego ya ba-Juda ka gona mabapi le go diriša leina la Modimo.

6 Re na le mabaka ka moka a go fišegela go sepetša puku ye. Ge e ba re tlwaelane gabotse le dikagare tša yona, gona re tla hwetša dibaka tša go tsoša kgahlego ya batho ba botegago bao ba nago le ditlogo tše dintši tša bodumedi. Eka re ka bontšha go fišegela tirelo ye.

7 Jehofa ke Modimo yo a fago kudu le wa kgaugelo. Taletšo ya gagwe ya gore re ithute ka yena ke e botho gakaakang! Go ka ba le ba bantši kudu bao tlago go ba batumiši ba Jehofa. Ka June re tla kgona go thuša ba bantši Bojakaneng, bao e sego Bakriste gaešita le ba nago le ditlogo tša go se rate Modimo go thoma go rapela Jehofa “ka môya le ka xo rereša” ka thušo ya puku ya Go Tsoma ga Batho Modimo. (Joh. 4:23, 24) Eka re ka phegelela go hwetša batsomi ba therešo gomme re matlafatše tswalano ya bona le Modimo wa therešo. A ka hwetša!