Letlolo La Dipotšišo

◼Bana ba banyenyane ba batswadi ba Bakriste ba ka ba le karolo go fihla kae bodireding bja tšhemo pele ba lebelelwa e le bagoeledi ba sa kolobetšwago?

Batswadi ba Bakriste ba nyaka gore bana ba bona ba gole gore e be bahlanka ba ipheditšego le ba ikgafilego ba Jehofa. (1 Sam. 2:18, 26; Luka 2:40) Gaešita le nywageng ya tlase kudu, bana bao ba lego malapeng a Bokriste ba swanetše go kgona go itlhalosa ka mo go swanetšego ge ba emela tumelo ya bona yeo e theilwego Beibeleng. Kgolo ya moya ya bana e a oketšega ge ba dutše ba sepela gotee le batswadi ba bona bodireding bja tšhemo go tloga bjaneng. Eupja go bohlokwa gore bafsa ba tutueletšege go tšwa pelong ge e ba ba tla thabela tirelo ya tšhemo, ba kganyoga go ba bagoeledi ba sa kolobetšwago, gomme ba tšwela pele ba e-ba le karolo modirong wa boboledi bja Mmušo. Tlwaetšo ya kelohloko ya batswadi e a nyakega. (1 Tim. 4:6; 2 Tim. 2:15) Bagoeledi ba bangwe bao ba swanelegago ba ka thuša ka dinako tše dingwe ge e ba batswadi ba dumela.—Bona Bodiredi bja Rena, matlakala 99-100.

Ge bana bao ba itshwerego gabotse ba sepela gotee le batswadi ba bona ba Bakriste modirong wa ntlo le ntlo, ba ithuta kamoo ba ka kopanelago ka gona bodireding. Eupja ba ka se ke ba lebelelwa e le bagoeledi ba sa kolobetšwago go ba go fihla ge ba e-na le tekanyo e itšego ya bokgoni le tsebo tšeo e lego tša bona. Batswadi ba Bakriste ba ka dira phetho ge e le ka tekanyo yeo ka yona ngwana a ka bago le karolo go neeng bohlatse ge ba dutše ba šoma gotee. Bana bao ba sa hlwago ba lebelelwa e le bagoeledi ba sa kolobetšwago ga se ba swanela go ya tšhemong ba nnoši goba go sepela gotee le bana ba bangwe tirelong ya tšhemo. Batswadi ba ka lokišeletša bana ba bona bakeng sa tirelo ya tšhemo gomme ba ba dumelela gore ba be le karolo ka ditsela tše di fapa-fapanego, tše bjalo ka go bala lengwalo, go neela pampišana goba makasine, goba go bontšha mong wa ntlo seswantšho go tšwa dipukung. Ge ngwana a dutše a gola, a ka kgona go ba le karolo poledišanong e tiilego go se nene.

Ka tlwaetšo e botse, bafsa ba ka ithuta go lemoga bohlokwa bja bodiredi ge ba dutše ba arabela tlhahlong ya batswadi ba bona gomme ba itshwara ka tsela ya bothakga. Batswadi ga se ba swanela go tlogela bana ba bona bao ba sa hlwago ba lebelelwa e le bagoeledi ba sa kolobetšwago sebokeng sa tirelo ya tšhemo, ba letetše gore ba bangwe ba tla ba hlokomela. Batswadi bao ba tshwenyegago ba lemoga boikarabelo bja bona ka noši bja go hlokomela modiro wa bana ba bona. Ee, bagoeledi ba bangwe ba ka ba ba ikemišeditše go thuša ka go tlwaetša bana ba banyenyane ka phuthegong bao ba bontšhago kgahlego ya kgonthe ya go hlankela Jehofa bodireding.