Go Dirišana Gabotse Le Moswari Wa Rena Wa Thuto Ya Puku Ya Phuthego

1 Thuto ya Puku ya Phuthego e tšea karolo e bohlokwa tšwelopeleng ya bokgoni bja rena re le badiredi ba ditaba tše di lokilego. Dihlopha di dirilwe ka morero gore e be tše nyenyane go kgothaletša moya o borutho wa lapa bakeng sa thuto ya Beibele le e nngwe ya dipuku tša Mokgatlo. Dihlopha tše tše nyenyane gape di tšweletša maemo a mabotse a go re tlwaetša go ba bao ba atlegago kudu bodireding bja tšhemo. Batho ka o tee ka o tee ba hwetša kgothatšo le tlhokomelo tše di lebanyago ka thulaganyo ya thuto ya puku. Re ka dirišana bjang ka mo go tletšego le moswari wa thuto gomme ra holwa ke tokišetšo ye e botse?

2 Go Tšea Karolo ka Mafolofolo Bodireding bja Tšhemo: Boikarabelo bjo bongwe bjo bohlokwa bja moswari wa thuto ya puku ke go thuša setho se sengwe le se sengwe sa sehlopha gore se tšee karolo ka mafolofolo bodireding. Tabeng ye, puku ya Bodiredi bja Rena e re gopotša go letlakala 44 gore “go ba gona ka mehla, phišego le mafolofolo ao a a bontšhago modirong wa tšhemo di tla bonagatšwa go bagoeledi.” Ka dinako tše dingwe moswari wa thuto o tla šoma tirelong le ditho tša lapa la gagwe ka noši, eupja gape o tla thabela go sepela le ba bangwe dibopegong tše di fapa-fapanego tša bodiredi ge e ba maemo a gagwe a dumela. Na o ka thekga diboka tša tirelo ya tšhemo ka mehla? Go dira ga gago bjalo go tla lebogwa kudu ke moswari wa gago wa thuto ya puku le bagoeledi ba bangwe.

3 Diboka tša tirelo ya tšhemo di rulaganyeditšwe mafelong ao go lego bonolo go ya go ona e le gore bohle ba tšee karolo ka mafolofolo modirong wa boboledi. Ge se dutše se naganišiša ka maemo a lefelong leo, sehlopha se sengwe le se sengwe se tla rata go thoma bodiredi e sa le ka pela. Bagoeledi ba bantši le babulamadibogo ba atlega kudu ge ba tšwela pele bodireding ka morago ga mosegare o mogolo mafelo-bekeng.

4 Na o rata go hwetša thušo sebopegong se sengwe sa bodiredi? Mo gongwe moswari wa gago wa thuto ya puku a ka rulaganyetša gore mogoeledi yo a nago le bokgoni sehlopheng sa lena a šome le wena. Mafelelong a kgwedi, kgonthišega gore o tliša pego ya gago ya tirelo ya tšhemo gatee-tee. Bobedi moswari wa thuto ya puku ya phuthego le mongwaledi ba tla leboga tirišano ya gago e botse le tabeng ye e bohlokwa.—Bapiša le Luka 16:10.

5 Ge Molebeledi wa Tirelo a Etela Sehlopha: Gantši molebeledi wa tirelo o etela sehlopha se tee sa thuto ya puku kgweding e nngwe le e nngwe bakeng sa go kgothaletša modiro o mogolwanyane le o nago le morero bodireding bja tšhemo. Theetša ka šedi polelo ya metsotso e 15 yeo a e neelago mafelelong a thuto ya puku, ka ge e tla nea keletšo e lebanego yeo e tlago go thuša sehlopha go kaonefatša dibopegong tše di fapa-fapanego tša modiro wa boboledi. Gape molebeledi wa tirelo o fišegela go šoma le ditho tše di fapa-fapengo tša thuto ya puku mafelo-bekeng. Diriša tokišetšo ye e kgethegilego ka mo go holago e le gore o ka holega ka phihlelo le bokgoni bja gagwe tšhemong.

6 Mohlala wa rena ka noši wa tirišano e botse le go ikemišetša ga rena go thuša bao ba se nago phihlelo di tla thuša go tšweletša moya o borutho le wa bogwera Thutong ya Puku ya Phuthego ge re dutše re ‘dira botse; re bo direla batho bohle, kudu-kudu re bo direla batho babo rena ba tumelo.’—Ba-Gal. 6:10.