Go Thuša Bohle Ba Ba Bontšhitšego Kgahlego
1 Tumelo ya rena le lerato la rena go ba bangwe di tla re tutueletša go thuša le go laleletša bohle bao ba bontšhitšego kgahlego molaetšeng wa Mmušo Segopotšong ka March. Batho ba bjalo ba swanetše go hlahlelwa tokišetšong ya Jehofa ya phološo, yeo e theilwego sehlabelong sa Kriste sa topollo.—Ba-Heb. 9:28.
2 Ke kgopolo e botse go ngwala lelokelelo la bao o ratago go ba laleletša Segopotšong. Akaretša batho lege e le bafe bao ba bago gona dibokeng ka sewelo gotee le bao ba bego ba ithuta pele goba bao ba bontšhitšego kgahlego ka ditsela tše dingwe. Le se ke la lebala balekane bao ba sa dumelego le ditho tše dingwe tša lapa. Ka morago ga ge o ngwadile lelokelelo la gago, dira boiteko bjo bo kgethegilego bja go etela o mongwe le o mongwe. Mo gongwe o ka rata go kgopela bagolo gore ba go thuše go dira maeto a itšego.
3 O ka re’ng ge o etetše?
Ka morago ga tumedišo ya bogwera, o ka bolela selo se se swanago le se:
◼“Nakong e fetilego, o bontšhitše kgahlego dilong tša moya gomme ke ile ka nagana gore o tla thabela taletšo ye ya tiragalo e bohlokwa. [Nea mong wa ntlo taletšo e gatišitšwego ya go laleletšwa Segopotšong.] Segopotšo sa lehu la Kriste ke tiragalo e nnoši yeo Morena Jesu Kriste a laetšego balatedi ba gagwe gore ba e gopole. Re fagahletše go boeletša seo Kriste a se phethilego ka lehu la gagwe le kamoo re ka hwetšago bophelo bjo bo sa felego ka gona ka baka la lona. Ngwagola, bao ba fetago dimilione tše 11 ba bile gona sebokeng se se se kgethegilego. E tla ba mo go thabišago ge o ka ba gona gotee le nna lenyaga.” Kgonthišetša gore o ngwala nako le lefelo leo phuthego ya lena e tlago go binela monyanya wa Segopotšo go lona. Le gona, ithapele go lokišetša senamelwa ge e ba seo se nyakega.
4 Ge batho bao ba thomago go tla ba e-ba gona Segopotšong, ba swanetše go dirwa gore ba ikwe ba amogelegile. Ba thušeng go tlwaelana le bagoeledi ba phuthego ya lena gomme le ba tsebiše go batho bao ba thabelago bao ba ka bago ba dula kgaufsi le magae a bona. Go tla ba kgothatša go lemoga gore batho ba bantši tikologong ya bona ba thabela therešo. Ba laleletše go dula le lapa la gago nakong ya monyanya wa Segopotšo ge e ba go kgonega.
5 Ee, go fo ba gona Segopotšong go ka se ke gwa kgonthišetša gore ba tla phologa. Eupja go ba bantši bao le ba laletšago, e ka ba mogato wa bona wa mathomo wo o išago go bontšheng tumelo mading a tšholotšwego a Jesu. Tseleng ya go ya gae le e-tšwa sebokeng, botšiša moeng ge e ba a be a tla rata go ba gona Sebokeng sa Phatlalatša le Thutong ya Morokami ka Sontaga se se latelago. E-ba yo botho le yo a nago le bogwera. Mmotše gore o ikemišeditše go thuša ka tsela lege e le efe yeo o ka kgonago ka yona. Ge a ka thoma kapejana go kopanela le rena ka mehla, tšwelopele ya gagwe ya moya e tla ba e akgofago kudu. Re tla ba le lethabo le kgotsofalo gakaakang ge re ka phologa ‘masetla-pelo a magolo’ gotee le ba bangwe ba bantši bao re ilego ra kgona go ba thuša!—Kut. 7:9, 14.