Go Swara Thuto Ya Legae Ya Beibele

1 Thuto yeo e atlegago ya legae ya Beibele e swarwa bjang? Re na le mohlala ofe wa motheo? Ditemana tšeo di lego tabeng yeo e ithutwago di ka ahla-ahlwa bjang? Ke mang yo a swanetšego go bala dirapa? Go oketša tshepedišong ya motheo ya go swara thuto, ke eng se sengwe se se nyakegago go thuša morutwana gore a dire therešo gore e be ya gagwe? Ke mereo efe yeo e swanetšego go phengwa?

2 Kamoo go ka Swarwago Thuto ka Gona: Ge re bolela ka kakaretšo, thuto ya legae ya Beibele e swarwa ka mokgwa wo Thuto ya Morokami e swarwago ka wona. Sa pele, serapa seo se tlago go ahla-ahlwa se a balwa. Ka morago motho yo a swarago thuto o botšiša potšišo yeo e ngwadilwego mabapi le serapa seo gomme o dumelela morutwana gore a arabe. Ge e ba morutwana a phopholetša, moswari o swanetše go itokišetša go botšiša dipotšišo tšeo di hlahlago tšeo di tlago go dira morutwana gore a naganišiše ka seo se ithutwago gomme a fihle phethong e swanetšego.

3 Naganišiša kamoo ditemana di tsenago ka gona tabeng e lego serapeng. Bontšha morutwana kamoo a ka lemogago ditemana tše di tsopotšwego ka gona gomme o boledišane le yena mabapi le kamoo di šomago ka gona. Ge e ba ditemana di bontšhitšwe eupja di se tša tsopolwa, ke mo gobotse go di bala ka Beibeleng, ge feela e se tše telele kudu. Ka gona dumelela morutwana go di bala le go hlalosa kamoo di thekgago goba di hlalosago ka mo go kwalago seo se bolelwago serapeng.

4 Thuša Morutwana go Dira Gore Therešo e be ya Gagwe: Kgothaletšang barutwana go lokišetša gabotse bakeng sa thuto. Gatelelang gore go bala go bohlokwa bakeng sa go ithuta. Ge morutwana a bala taba e ntši ye e ithutwago gomme a naganišiša ka yona, go ba kaone. Baswari ba bangwe ba dira gore morutwana a bale dirapa ka moka nakong ya thuto ya Beibele. Ba bangwe ba šiedišana le morutwana ka go bala dirapa. Go swanetše go dirišwa kahlolo e botse, go naganwe ka kgatelopele ya moya ya morutwana.

5 Go akaretša taba ye e ithutwago ka mokgwa wa go e tsenya kgopolong go ka thuša morutwana go hwetša tsebo, eupja na o dumela seo a ithutago sona? Ge e ba a tla dira gore therešo e be ya gagwe, o swanetše go bona kamoo taba e mo kgomago ka gona yena ka noši. O ikwa bjang ka seo a ithutago sona? A ka diriša bjang seo a ithutilego sona? Diriša dipotšišo tšeo di fatišišago gore o fihlelele pelo ya morutwana.

6 Phema Mereo: Go na le mereo ye o swanetšego go e phema ge o swere thuto ya Beibele. Ge go rotoga ditaba tšeo di sa sepedišanego le taba yeo e ahla-ahlwago, gantši go kaone go di ahla-ahla mafelelong a thuto goba ka nako e nngwe. Gape, ke gabohlokwa go dira gore morutwana a nee dikarabo ka mantšu a gagwe ka noši go e na le go di bala pukung. Se se tla go thuša bjalo ka moswari go lemoga ge e ba morutwana o kwešiša taba.

7 Ke ka baka la’ng o sa ipeele pakane ya go swara bonyenyane thuto e tee ya Beibele? Ga se modiro o thata ge e ba o ithekga ka Jehofa le go latela tshepedišo ya motheo ya Thuto ya Morokami. Tsela e atlegago kudu ya go ruta ba bangwe therešo le go dira barutiwa ke ya go swara thuto ya legae ya Beibele. Ka go dira se, le wena o ka hwetša lethabo leo le tlišwago ke go ba le karolo e tletšego go phethagatšeng taelo ya Jesu go Mateo 28:19, 20.