Beela Nako Ka Thoko Bakeng Sa Modiro Wa Dimakasine

1 Jehofa o dirile phetho ya gore go tla ba le ‘khutšo, bokamoso le kholofelo’ bakeng sa bao ba latelago ditsela tša gagwe. (Jer. 29:11) Tsebišo mabapi le tebelelo ye e newa ka tsela e swanetšego ka go Morokami le Phafoga! Dimakasine tše di ka hola mehuta ka moka ya batho ka tlase ga boemo bjo bongwe le bjo bongwe. (1 Tim. 2:4) Na wena le lapa la gago ka mehla le beela nako ka thoko bakeng sa go aba dimakasine?

2 Ge e ba dimakasine tše o di sepedišago di theogile, tshekamelo ye e ka lokišwa bjang? Selo se sengwe sa bohlokwa ke go boloka tebogo ya gago ya dikagare tša dimakasine tša rena e phela. Monna yo mongwe o ngwadile gore: “Go bala dimakasine tša lena ke phihlelo e thabišago e le ka kgonthe. Ga se ‘bahomotši’ ba ba nyatšegago ba ba sa holego eupja di rwele tlhahlo le keletšo mabapi le kamoo o ka dirago ka gona gore bophelo bo be le morero.” Morokami le Phafoga! ke ditšweletšwa ka nyakišišo yeo e etšwego hloko gomme ke ditokišetšo tša “molaki e a bôtêxaxo yo bohlale.” (Mat. 24:45) Ke didirišwa tše di atlegago bakeng sa go fihlelela dipelo tša batho.

3 Tlwaelana le dihlogo tše di lego ka dimakasineng tše o di sepedišago. Tsoma dintlha tšeo di ahla-ahlago mathata a gona bjale a tikologong ya geno. Ke mo gobotse go lokišetša go bolela le banna, basadi le bafsa bao o ka gahlanago le bona mejakong goba setarateng. Itokišetše go bontšha kamoo dimakasine di kgomago batho ka o tee ka o tee le malapa ka moka ka gona.

4 Phafogela Dimakasine: Go nea bohlatse ka dimakasine e swanetše go ba karolo e bohlokwa ya thulaganyo ya gago ya tirelo ya tšhemo. Dinako tše di go swanetšego kudu bakeng sa go sepediša dimakasine ke dife? Na o lekile go šoma ka ntlo le ntlo lebaka la iri goba go feta moo ge letšatši le e-ya go sobela goba mantšiboa pele ga Thuto ya lena ya Puku ya Phuthego? Go nea bohlatse mantšiboa go bile le mafelelo a mabotse kudu mafelong a mangwe. Mokibelo ke letšatši le lebotse bakeng sa go aba dimakasine ka ditsela tše di fapa-fapanego, eupja matšatši a mangwe le ona a ka dirišwa bakeng sa modiro wo. Go ya ka ntlo le ntlo le go tloga lebenkeleng le lengwe go ya go le lengwe e swanetše go ba karolo ya ka mehla ya Letšatši la Dimakasine.

5 Yo mongwe le yo mongwe o swanetše go ba le otara ya ka mehla ya palo ya dikopi tšeo di abjago tša tokollo e nngwe le e nngwe ya dimakasine. Ge ka lebakeng le lengwe o swere ditokollo tša kgale, di ka dirišetšwa go bontšha beng ba dintlo dihlogo tše di fapa-fapanego tše di ahla-ahlwago dimakasineng. Nako le nako go ka tlogelwa sehlopha sa dikopi tša kgale magaeng a batho bao ba rotšego modiro, mafelong a go hlokomela batšofadi le dipetleleng tšeo go dumelelwago. Dimakasine tše bjalo ka moka di ka balwa e le tšeo di sepedišitšwego gomme di swanetše go begwa kgwedi e nngwe le e nngwe pampišaneng ya gago ya Peho ea Tšebeletso ea Tšimo.

6 Ka go diriša ditšhišinyo tše di lego ka mo godimo, ga go pelaelo gore o tla bona koketšego palong ya dimakasine tšeo o kgonago go di aba. Batho ba dipelo tše di botegago bao ba imelwago ke bophelo tshepedišong ye ya gona bjale e kgopo ba leboga tsebišo e lapološago, go etša yeo e hwetšwago ka go Morokami le Phafoga! Ka kgonthe dimakasine tše di nea dijo tša moya tšeo di nyakwago ke bao ba tsomago go amogelwa ke Jehofa. Ka gona, phafogela dimakasine gomme o tsome ditsela tša go oketša go abja ga dikgatišo tše tše bohlokwa tšhemong ya geno.