Yearbook​—Polokelo ya Kgothatšo

1 Dipego le diphihlelo tše di lego mabapi le mediro ya Jehofa e makatšago ka mehla e be e dutše e le tšeo di lapološago go bahlanka ba Modimo. (Jobo 38:4, 7; Die. 25:25; Luka 7:22; Dit. 15:31) Ke ka baka leo Yearbook of Jehovah’s Witnesses e lego polokelo ya kgothatšo.

2 Yearbook e nngwe le e nngwe e nea dipego tše di agago tše di tšwago lefaseng ka moka mabapi le mediro ya Dihlatse tša Jehofa le tšeo di di fihleletšego. Diphihlelo tše di matlafatšago tumelo di gatelela tlhahlo ya Jehofa, tšhireletšo le tšhegofatšo ya batho ba gagwe. Yearbook e anega ka banna le basadi ba tiilego bao ba tlogetšego malapa, bagwera le dinaga tša gabo bona bakeng sa go tliša ditherešo tša Beibele go batho ba dikontinenteng ka moka le dihlaka-hlakeng tše dintši tša lewatle.

3 Yearbook e tutueleditše babadi ba bantši go oketša tirelo ya bona go Modimo. Mmadi yo mongwe o ngwadile gore: “Ga ke kgone go e bala ka lebelo le le lekanego. Seo ke šetšego ke se badile go fihla ga bjale ke seo se kgothatšago kudu. Se ntira gore ke ikwe gore nka kgona go dira se se oketšegilego boboleding bja ditaba tše di lokilego ge ke bona seo ba bangwe ba se dirago ka tlase ga kgateletšo.”

4 Ngwaga o mongwe le o mongwe ga e sa le go tloga ka 1927, Yearbook of Jehovah’s Witnesses e be e dutše e le polokelo ya kgonthe ya dipego le diphihlelo tše di tutuetšago. Na o holwa ka botlalo ke mothopo wo o kgethegilego wa kgothatšo? Gore o dire bjalo, kgonthišetša gore o bala Yearbook di tloga fase ge o e hwetša. Ka gona ngwageng ka moka, boeletša dikarolo tše itšego tša yona bakeng sa kgothatšo yeo wena le lapa la gago le e nyakago.