Oketša Lehumo la Gago la Tirelo ya Mmušo
1 Jesu o swantšhitše kholofelo ya Mmušo le lehumo le bohlokwa-hlokwa. (Mat. 13:44-46) Na re swana le banna ba diswantšhong tša Jesu ba ba ilego ba rekiša dithoto tša bona ka moka gore ba reke selo sa bohlokwa bjo bogolo? Ge e ba go le bjalo, re tla etiša Mmušo wa Modimo pele, gaešita lege go ka akaretša mathata le go itima tše dintši.—Mat. 6:19-22.
2 Ka ge tirelo ya rena ya Mmušo e le lehumo, re swanetše go kganyoga go e oketša. Tsela ya rena bophelong e bontšha’ng? Na re oketša modiro wa rena wa Mmušo? Re ka dira bjalo ka go tšea karolo dibopegong tše di fapa-fapanego tša bodiredi go akaretša modiro wa ntlo le ntlo, go dira maeto a go boela, go swara dithuto tša Beibele le go nea bohlatse bjo bo sa rulaganyetšwago.
3 ‘Nka Oketša Bjang Karolo Ya-ka?’ Ge ngwaga o mofsa wa tirelo o thoma, ke mo gobotse gore yo mongwe le yo mongwe a hlahlobe modiro wa gagwe ka noši go bona seo a ka se dirago go oketša nako e dirišwago bodireding bja tšhemo gomme a ipotšiše gore: ‘Na nka rulaganya ditaba tša-ka gore ke ngwadiše bjalo ka mmulamadibogo wa go thuša nako le nako goba gaešita le ka nako e sa kgaotšego? Ka go dira dipeakanyo tše sego kae, na nka tsenela tirelo ya bobulamadibogo bja ka mehla?’ Babulamadibogo ba bafsa ba ba ngwadišago ka September 1 ba swanelegela go ya Sekolong sa Tirelo ya Bobulamadibogo ngwageng o tlago.
4 Bagoeledi ba bangwe ba ipeetše pakane ya go nea ka mo go oketšegilego bohlatse bjo bo sa rulaganyetšwago. Gantši modiro wo o tšweletša dienywa tše botse kudu. Ba bangwe ba ka lemoga go nyakega ga go kaonefatša tabeng ya go dira maeto a go boela a atlegago goba go thoma dithuto tše difsa tša Beibele.
5 Ge e ba re lemoga gore bodiredi bja rena bo hlaelela ka tsela e itšego, re ka dira’ng go bo oketša? Ba ba fihleletšego dipakane tše di phagamego ka katlego ba eletša gore re swanetše go thoma ka go ikemišetša go etiša dikgahlego tša Mmušo pele, go sa šetšwe seo se nyakegago. (Mat. 6:33) Go nyakega tumelo le go ithekga ka Jehofa ka mo go feletšego. (2 Ba-Kor. 4:7) Tsoma thušo ya gagwe ka thapelo e tšwago pelong le e phegelelago. (Luka 11:8, 9) Re ka kgodišega gore Jehofa o tla šegofatša maiteko a rena a potego a go oketša karolo ya rena tirelong ya gagwe.—1 Joh. 5:14.
6 Boledišana le banababo rena ba bangwe le dikgaetšedi ba ba okeditšego bodiredi bja bona ka katlego. Ba botšiše mabapi le kamoo ba kgonnego go fenya mapheko ka gona ka ntle le go nyema moko. Diphihlelo tša bona e ka ba sona se se nyakegago go go kgodiša gore bodiredi bjo bo okeditšwego ga se bjo bo ka se fihlelelwego.
7 Ge o bala dihlogo tše di bolelago ka tirelo ya tšhemo ka go Morokami goba Tirelo ya Rena ya Mmušo, naganišiša ka thapelo kamoo o ka dirišago ditšhišinyo ka gona bodireding bja gago. Dira se se swanago ge o le dibokeng tša phuthego goba dikopanong. Ditšhišinyo tše di neilwego sehlogong se di theilwe polelong yeo e bego e le karolo ya lenaneo la kopano ya tikologo la ngwagola. Ke ya pele ya lelokelelo la dihlogo tše di bego di reretšwe go re thuša go tšwela pele le go diriša kgothatšo e neilwego ka lenaneo leo.
8 Jesu o ile a tšeela bodiredi bja gagwe godimo kudu, a bo dira selo se segolo seo a bego a tshwenyegile ka sona. O itše: “Sejô sa-ka ké xe ke dira thatô ya E a nthomilexo.” (Joh. 4:34) Na re ikwa ka tsela e swanago? Ge e ba re ikwa bjalo, ruri re tla hwetša ditsela tša go oketša modiro wa rena gomme ra abelana le ba bangwe “tše botse” tše di tšwago polokelong ya lehumo la rena.—Mat. 12:35; Luka 6:45.