Le Swanetše Go Ba Batho Ba Mohuta Mang?
1 Go batamela nako ya gore batho ka moka ba sekišwe. Beibele e e bitša “letšatši la Jehofa.” Ke nako yeo kahlolo ya Modimo e tlago go phethwa ka yona malebana le ba kgopo; e bile ke nako ya go phološwa ga baloki. Batho ka moka bao ba phelago ka nako yeo ba tla sekišwa ka baka la tsela yeo ba phetšego maphelo a bona ka yona. Petro a gopola seo, o rotoša potšišo e fatollago e rego: “Le swanetše go ba batho ba mohuta mang”? O gatelela bohlokwa bja ‘ditiro tše kgethwa tša boitshwaro, mediro ya boineelo go Modimo le go phafogela letšatši la Jehofa,’ gotee le go nyakega ga go ba ‘ba se nago bosodi le senyalo, gomme le le ba khutšo.’—2 Pet. 3:11-14, bapiša le NW.
2 Ditiro tše Kgethwa tša Boitshwaro le Mediro ya Boineelo go Modimo: Boitshwaro bjo bokgethwa bo akaretša mediro e beago mohlala yeo e bontšhago go hlompha melao ya motheo ya Beibele. (Tito 2:7, 8) Mokriste o swanetše go phema boitshwaro bja lefase bjo bo tutuetšwago ke dikganyogo tša boithati tša nama.—Ba-Roma 13:11, 14.
3 “Boineelo go Modimo” bo hlaloswa e le “tswalano ya motho ka noši le Modimo e tšwago pelong yeo e tutuetšwago ke tebogo e tseneletšego ya go leboga dika tša gagwe tše di kgahlišago.” Phišego ya rena bodireding ke tsela e kgethegilego yeo re bonagatšago seka se ka yona. Seo se re tutuetšago boboleding se fetiša maikwelo feela a boikarabelo; re tutuetšwa ke lerato le le tseneletšego la go rata Jehofa. (Mar. 12:29, 30) Ka ge re tutuetšwa ke lerato le bjalo, re lebelela bodiredi bja rena e le pontšho e nago le morero ya boineelo go Modimo. Ka ge boineelo bja rena e swanetše go ba bjo bo sa kgaotšego, go tšea ga rena karolo modirong wa boboledi e swanetše go ba ga ka mehla. E swanetše go ba karolo e bohlokwa ya lenaneo la rena la beke le beke la modiro.—Ba-Heb. 13:15.
4 Go “phafoxêla” letšatši la Jehofa go bolela go le boloka e le selo sa pele dikgopolong tša rena tša letšatši le letšatši, le ka mohla re se ke ra le theošetša boemong bjo e sego bja bohlokwa bja ka morago. Go bolela go etiša dikgahlego tša Mmušo pele maphelong a rena.—Mat. 6:33.
5 Go se be le Bosodi le Senyalo, le go ba ba Khutšo: Ka ge re le karolo ya lešaba le legolo, re ‘hlatswitše mašela a rena ra a tagafatša mading a Kwana.’ (Kut. 7:14) Ka gona, go ba ba ‘se nago bosodi’ go bolela gore re swanetše go diša ka go tia maphelo a rena a hlwekilego le a neetšwego gore a se ke a šilafatšwa ke ditšhila tše di tšwago lefaseng. Re ipoloka re ‘se na senyalo’ ka go gana go dumelela mediro ya go nyatša Modimo le ya go phegelela dilo tše di bonagalago e senya semelo sa rena sa Bokriste. (Jak. 1:27; 1 Joh. 2:15-17) Re bontšha gore re phela ka “moláô” ka go bonagatša “khutšô ya Modimo” ditirišanong tša rena ka moka le ba bangwe.—Ba-Fil. 4:7; Ba-Roma 12:18; 14:19.
6 Ge re itiša ka katlego malebana le tšhilafalo ya lefase, le ka mohla re ka se ke ra “ipapetša le . . . mehla yeno,” yeo e ahlotšwego ke Jehofa. Go e na le moo, mediro ya rena e mebotse e tla thuša ba bangwe go bona phapano “[gare ga, NW] modirêla-Morêna le e a sa Mo direlexo.”—Ba-Roma 12:2; Mal. 3:18.
7 Leina la Jehofa le a godišwa, phuthego e a matlafatšwa gomme ba bangwe ba a holega ge re kgomarela “medirô e botse” ka kelohloko. (1 Pet. 2:12) Eka re ka dula re le motho wa mohuta woo.