Re Nyaka Phuthego
1 Barwa ba Kora ba kile ba bolela tebogo ya bona ya go leboga phuthego ya Jehofa ka tsela ye: “Letšatši letee rè le malapeng a xaxo, ké lôna le le botse xo matšatši a sekete.” (Ps. 84:10) Go bona, lefase le be le se na selo seo le ka se neago se se swanago. Ge e ba o e-na le maikwelo ao, o swanetše go dira phuthego kokwane ya bophelo bja gago.
2 Go tloga mathomong a yona, phuthego ya Bokriste e bontšhitše gore e šegofatšwa ke Jehofa. (Dit. 16:4, 5) Ga go le o tee wa rena yo a swanetšego go tšeela phuthego fase goba a nagana gore e fo ba tsela ya go re kopanya gotee ka mmele. Phuthego ke lefelo leo Dihlatse tša Jehofa tikologong e nngwe le e nngwe di matlafatšwago go lona. E nea bogwera bjo bo kopanego e le gore re ka rutwa ke Jehofa le go rulaganyeletšwa modiro wa Mmušo.—Jes. 2:2.
3 Phuthego ya Bokriste ke mokero wa motheo bakeng sa go re ruta therešo. (1 Tim. 3:15) Balatedi ba Jesu ba swanetše “xore bohle e bê batee”—ba be boteeng le Modimo, le Kriste gotee le yo mongwe le yo mongwe wa bona. (Joh. 17:20, 21; bapiša le Jesaya 54:13.) Go sa šetšwe mo re ka yago gona lefaseng, banababo rena ba dumela dithuto le melao ya motheo ya Beibele, gomme ba itshwara ka go dumelelana le yona.
4 Re tlwaetšwa le go hlamelwa go phetha kabelo ya rena ya go dira barutiwa. Kgweding e nngwe le e nngwe, Morokami, Phafoga! le Tirelo ya Rena ya Mmušo di nea tsebišo e thušago bakeng sa go re thuša go thoma dipoledišano tša Mangwalo. Diboka di reretšwe go re bontšha kamoo re ka hwetšago le go hlagolela kgahlego ka gona. Koketšego yeo re e bonago lefaseng ka bophara e hlatsela gore re na le thekgo e tšwago legodimong modirong wo.—Mat. 28:18-20.
5 Ka phuthego, re amogela kgothatšo ya letšatši le letšatši yeo e ‘re išago leratong le medirong e mebotse.’ (Ba-Heb. 10:24, 25) Re matlafaletšwa go kgotlelela meleko ka potego. Balebeledi ba lerato ba re thuša go lebeletšana le dikgateletšo le dipelaelo. (Mmo. 4:9-12) Re newa keletšo e nyakegago ge re le kotsing ya go aroga. Ke mokgatlo ofe o mongwe wo o neago tlhokomelo e bjalo e lerato?—1 Ba-Thes. 5:14.
6 Ke thato ya Jehofa gore re dule kgaufsi le mokgatlo wa gagwe bakeng sa go šireletša botee bja rena. (Joh. 10:16) Tsela e nngwe yeo phuthego e re thušago ka yona go dula re kopana le sehlopha sa molaki yo a botegago ke ka go romela balebeledi ba basepedi gore ba re kgothatše. Go arabela ga rena tlhahlong e lerato go re kopanya gotee boteeng bjo bo thušago go re boloka re tiile moyeng.
7 Phuthego e bohlokwa bakeng sa phologo ya rena ya moya. E be e tla ba mo go sa kgonegego go hlankela Jehofa ka mo go amogelegago re arogane le yona. Ka gona, anke re kgomareleng seo Jehofa a se lokišeditšego. Eka re ka šoma ka go dumelelana le dipakane tša yona gomme re diriše ka potego keletšo yeo re e amogelago moo. Ke ka tsela ye feela moo re ka bontšhago kamoo phuthego e lego ya bohlokwa kudu go rena.—Ps. 27:4.