Go ba gona Dibokeng Ka Mehla—go Bohlokwa Bakeng sa go ema ga Rena re Tiile
1 Moapostola Paulo o re kgothaleditše gore re dule re ‘phedile tumelong.’ (Tito 1:9, 13, PK) Dibokeng tša phuthego re nagana ka dikgopolo tše di phedišago gomme re rutwa kamoo re ka ipolokago ka gona re hlamilwe ka mo go feletšego ka kotse ya moya e le gore re kgone “xo fenya dipoxo tša Diabolo.”—Ba-Ef. 6:11; Ba-Fil. 4:8.
2 Diboka di re Nea Seo re se Nyakago: Go ba gona dibokeng tša phuthego ka mehla go bohlokwa bakeng sa go ema ga rena re tiile. (1 Ba-Kor. 16:13) Dibokeng go rapelwa dithapelo tša go leboga le go tumiša Modimo, gotee le go mo lopa bakeng sa phuthego le dinyakwa tša yona. (Ba-Fil. 4:6, 7) Go kopanela dikopelong tša Mmušo go a re kgothatša le go re dira gore re kgone go bontšha maikwelo a rena ge re dutše re rapela Jehofa. (Ba-Ef. 5:19, 20) Bogwera bja rena re le gotee Holong ya Mmušo pele le ka morago ga diboka bo a re kgothatša, bo a re aga le go re lapološa.—1 Ba-Thes. 5:11.
3 Ka April e sa tšwago go feta polelo e kgethegilego e rego, “Bofelo bja Bodumedi bja Maaka bo Batametše,” e ile ya gatiša ka matla megopolong ya barati ba therešo go akgofa ga gore ba gate mogato wa kapejana wa go tšwa go Babele o Mogolo. (Kut. 18:4) Ka June le July, e bile mo go tutuetšago gakaakang go akaretša dihlogo tše tharo tše ithutwago tša Morokami mabapi le go phadima ga seetša mo go edišeditšego tsela ya baloki! (Die. 4:18) Nagana ka seo se ka bego se re lahlegetše ge nkabe re ile ra hlokomologa go ba gona dibokeng tšeo.
4 Puku ya Go Rulaganyetšwa go Dira Bodiredi bja Rena e bontšha go letlakala 72 gore Sekolo sa Bodiredi sa Pušo ya Modimo ke tokišetšo bakeng sa thuto e tšwelago pele ya phuthego ka moka. Morago bjale, karolo e nngwe ya lenaneo e re thuša go tlwaelana gakaone le histori ya mehleng yeno ya mokgatlo ka go diriša puku ya Bagoeledi. Re ka se kgone go ipea kotsing ya go lahlegelwa ke thuto ye.
5 Seboka sa rena sa Tirelo se re hlamela gore re be ba atlegago kudu bodireding. Se se bonagaditšwe ka seboka seo go sona re ilego ra amogela ditaelo mabapi le go ba le karolo kabong e nabilego ya pampišana ya Kingdom News No. 34. Ditšhegofatšo tša Jehofa modirong wo e bile tše dintši, go etša ge go bonwe ka mafelelo a sa hlalosegego lefaseng ka bophara. (Bapiša le 2 Ba-Korinthe 9:6, 7.) Bao ba bago gona dibokeng ka mehla ba ile ba kgothatšwa gomme ba thušitše go tšweletša thekgo yeo e neilwego lesolong.
6 Thutong ya Puku ya Phuthego, kwešišo ya rena mabapi le go akgofa ga nako e oketšwa ke dilo tše re ithutago tšona go tšwa Lentšung la Modimo ka thušo ya puku ya Seremo sa Kutollo. Ka ge ditiragalo di sepela ka go akgofa tikologong ya lefase, re nyaka go kwešiša go phethagala ga diporofeto tše di tseneletšego tša Kutollo.
7 Dira Gore go ba Gona Dibokeng ka Mehla e be Selo sa Pele: Dinageng tše dintši moo banababo rena ba tlaišwago ke diteko, ba sa dutše ba lemoga kamoo go lego bohlokwa ka gona gore ba bokane gotee beke e nngwe le e nngwe. Ka mohlala, kua Burundi, Rwanda, Liberia le Bosnia gotee le Herzegovina, batho ba bantši kudu bao ba sa tšwago go kopanela ba ba gona dibokeng ka makga a mabedi goba gaešita le a mararo a palo yeo bagoeledi ba bago gona ka yona. Ka tsela ye Jehofa o thuša banababo rena gore ba dule ba tiile ka moya o tee.—Ba-Fil. 1:27; Ba-Heb. 10:23-25.
8 Motho le ge e le mang yo a bego a hlokomologa go ba gona dibokeng ka mehla o swanetše go gata megato ya go lokiša tshekamelo ye gona bjale. (Mmo. 4:9-12) Gore re eme re tiile, re swanetše go kgothatšana le bao ba godilego ka tsebo ka ge go tšweletšwa ke go ba gona dibokeng ka mehla.—Ba-Roma 1:11.