Retang Jehofa Letšatši Le Letšatši
1 Modimo wa rena Jehofa, ke Mmopi yo a makatšago le yo lerato, Mothopo wa bophelo ka moka le lethabo. Ka baka la bogolo bja gagwe, ruri o swanelwa ke theto e tšwago go tlholo ya gagwe ka moka. Re le motho ka o tee ka o tee, re rata go bolela go etša ge mopsalme a boletše gore: “Ke tlo fêla ke atiša dithêtô tša xaxo ka moka. Ka mehla ke tlo laodiša tša xe O le Mo-loka-kahlolong, xe O le Mophološi.” (Ps. 71:14, 15) Go dira se, re swanetše go tsoma ditsela tša go reta Jehofa letšatši le letšatši gomme re tutueletšege go bolela gabotse ka yena, ka go loka ga gagwe le ka ditokišetšo tša gagwe tša phološo.
2 Bakriste ba pele ba beile mohlala o mobotse tabeng ya go reta Jehofa. Mabapi le ba 3 000 bao ba kolobeditšwego ka Pentekoste, re bala go Ditiro 2:46, 47 gore: “Ba be ba sa lape xo tla Ntlong-kxêthwa ka mehla, è le ba xo kwana, . . . bà rêta Modimo, bà ratwa ke batho ka moka. . . . [Gomme] Morêna ka mehla a eketša ba ba phološwaxo.” Ba be ba ithuta ditherešo tše di kgahlišago ka Jehofa le Mesia wa gagwe. Lethabo la bona e be e le le le fetelago, le kgothaletša ba bangwe gape gore ba theetše gomme ba ithute le go reta Jehofa.
3 Dibaka di a Hwetšagala Letšatši le Lengwe le le Lengwe: Lehono ba bantši ba hwetša gore ba ka reta Jehofa letšatši le letšatši ka go nea bohlatse bjo bo sa rulaganyetšwago. Go rulaganya e sa le pele go ba thuša gore e be ba atlegago kudu. Kgaetšedi yo a bego a dirile phetho ya go ba le karolo go neeng bohlatse bjo bo sa rulaganyetšwago o ile a hwetša gore motho yo mongwe o be a pšhatlile mafasetere a mabedi le go šwahlela ka koloing ya gagwe. O ile a leletša ba tirelo ya tša go lokiša gomme ka morago a itokišetša go nea bohlatse go molokiši. Tokišetšo ya gagwe e be e akaretša go rapelela tlhahlo ya Jehofa. Mafelelong, o ile a nea bohlatse go molokiši ka iri gomme a mo sepedišetša puku ya Phela ka mo go sa Felego.
4 Kgaetšedi yo mongwe o be a fela a gahlana le moagišani ge ba be ba sepela-sepela le dimpša tša bona. Nakong e nngwe ge ba gahlana, ba ile ba ba le poledišano e tseneletšego mabapi le mathata a bophelo, gomme seo se ile sa lebiša dipoledišanong tše oketšegilego. Ge nako e dutše e e-ya, thuto ya Beibele e ile ya thongwa. Ka mo go kgahlišago, moagišani ka morago o ile a ipobola ka gore o be a ka se ke a theetša Dihlatse tša Jehofa ge nkabe di ile tša etela legaeng la gagwe, ka ge a be a sa dumele go Modimo goba Beibele.
5 Ba bangwe ba hwetša e le mo go kgonegago go nea bohlatse ge barekiši goba ba bangwe ba etela legaeng la bona. Kgaetšedi kua Ireland o ile a etelwa ke monna yo a bego a bapatša phemelo ya bophelo. Kgaetšedi o ile a hlalosa gore o lebeletše pele go thabeleng bophelo bjo bo sa felego. Ye e be e le kgopolo e mpsha ka mo go feletšego go monna yo yo a bego a godišitšwe e le mo-Roma Katholika. O ile a amogela puku ya Phela ka mo go sa Felego, a ba gona sebokeng bekeng e latetšego gomme a dumela go ba le thuto ya Beibele. Mo nakong ye morekiši yo ke ngwanabo rena yo a kolobeditšwego.
6 Ka moka ga rena re swanetše go phafogela dibaka tša go reta Jehofa letšatši le letšatši. Go a thuša go bea dimakasine goba dipampišana moo di ka bonwago gona le mo go ka kgonegago go di sepedišetša baeng gabonolo. Mafelong a mangwe nako e nyenyane yeo e fetšwago go dutšwe phakeng e ka go nea dibaka tše mmalwa tša go nea bohlatse go ba bangwe bao ba emago bakeng sa go khutša metsotso e sego kae. Bafsa ba bangwe ba Dihlatse kua sekolong ba bea dipuku tša Beibele tesekeng ya bona e le tsela ya go thoma poledišano le motho yo a e bonago gomme a botšiša dipotšišo. Dula o gopola tšhupetšo e tee goba tše pedi tša Mangwalo tšeo o ka di dirišago. Kgopela Jehofa gore a go thuše. O tla šegofaletšwa go dira bjalo.—1 Joh. 5:14.