Boelang Bakeng Sa Go Phološa Ba Bangwe
1 Ke thato ya Modimo “xore batho bohle ba phološwê ba fihlêlê tsebô ya therešô.” (1 Tim. 2:4) Re ka dira’ng gore re thuše? Dira maeto a go boela ka morero wa go ruta therešo ka thuto ya ka mehla ya legae ya Beibele. O tla re’ng? Ditšhišinyo tše di latelago di ka go thuša.
2 Ge o dira leeto la go boela, go sa šetšwe gore puku ya “Motho yo a Phagamego Kudu” e sepedišitšwe goba go se bjalo, mo gongwe o ka rata go diriša matseno a a lebanyago bakeng sa go thoma thuto:
◼Mo gongwe o ka botšiša gore: “Ke’ng seo se dirilego gore Jesu e be motho yo a phagamego kudu wa lefaseng?” O ka araba ka go šupa go tše sego kae tša dikgaolo tše 133 tšeo di lebišago tlhokomelo bophelong bja gagwe, semelong sa gagwe, thutong ya gagwe le medirong ya gagwe. Kgaolo 24 e hlalosa morero wa gagwe wa go tla lefaseng. Kgaolo 35 e seka-seka Thuto ya gagwe e tumilego ya Thabeng. Kgaolo 133 e sedimoša ka ditšhegofatšo tšeo batho ba tlago go di thabela ge Jesu a phetha modiro wa gagwe. Bontšha mong wa ntlo kamoo dipotšišo le mangwalo ao a lego mafelelong a kgaolo e nngwe le e nngwe a re thušago ka gona go kwešiša dintlha tša bohlokwa kudu kgaolong e nngwe le e nngwe. Akaretša dintlha tše sego kae feela gomme o dire dithulaganyo tše itšego bakeng sa go etela gape.
3 Matseno a mangwe e ka ba a rego:
◼“Ke tloga ke thabetše poledišano ya rena ya beke e fetilego. Batho ba bantši ba bontšhitše go tshwenyega ka maemo a mpefalago a lefase. Ke naganne gore kgaolo 111 ya puku ye ya Motho yo a Phagamego Kudu yo a Kilego a Phela, e tla go kgahliša. [Lokišetša go hlalosa dikarolo tše di kgethilwego go kgaolo 111 bakeng sa go araba e tee goba tše pedi tša dipotšišo tša tlhahlobo tše di lego mafelelong a kgaolo, ka mohlala: “Ke maemo afe a lefase ao a swayago go ba gona ga Kriste?” goba “Jesu o nea seswantšho sefe go thuša barutiwa ba gagwe ba nakong e tlago go lemoga nako yeo ka yona bofelo bo lego kgaufsi?”] Go ya ka seo re se balago mo, o be o ka re kholofelo ya rena ke efe bakeng sa bokamoso bjo bo lego kgaufsi? [Dumelela karabo gomme ka morago o rete mong wa ntlo.] Ke’ng seo re swanetšego go se dira ge e ba re holofela go phologa bofelo bja tshepedišo ye e kgopo?” Bala Johane 17:3 gomme o ithapele go swara thuto ya ka mehla ya legae ya Beibele.
4Ge e ba motho yo re mo etelago a swaregile, re sa dutše re ka ba ba atlegago ka go bolela gore:
◼“Ke a tseba gore o na le metsotso e sego kae feela, eupša go na le selo se sengwe seo o ka naganago ka sona ge o dutše o feleletša mošomo wa gago. [Bala Mateo 5:3.]” Goba o ka re: “Ke go ngwaletše mangwalo a a mararo. Ka ge e se nako e botse ya go boledišana, e re ke a tlogele gomme ge ke boa ke tla rata go tšea metsotso e mehlano ke a ahla-ahla le wena.” Ge go bonala gore nako e nngwe e ka ba e swanetšego kudu go mong wa ntlo, mo gongwe o ka botšiša gore: “Na o be o tla rata go tseba mo go oketšegilego mabapi le nako yeo bofelo bja tshepedišo ya dilo bo tla tlago ka yona?” Ke moka o ka rulaganyeletša go boa bakeng sa go araba potšišo.
5 Gopola gore pakane ya go dira maeto a go boela ke go thoma dithuto tša Beibele. Re tla hwetša lethabo le legolo ge bao ba ithutago ba ithuta go bitša Jehofa bakeng sa phološo.—Dit. 2:21.