Go Tsebatša Therešo Letšatši Le Letšatši Ka Go Ekiša Jesu
1 Jesu o be a e-na le modiro o kgethegilego wo a bego a swanetše go o phetha ge a be a e-tla lefaseng. O be o le bonolo ka mo go makatšago: ‘Go hlatsela therešo.’ (Joh. 18:37, NW) O ile a tsebatša therešo ka dika le merero e kgahlišago ya Tatagwe. Modiro wo o be o le bjalo ka dijo go yena; bophelo bja gagwe ka moka bo be bo ithekgile ka wona. (Joh. 4:34) Luka o begile gore Jesu o be a fela “a ruta Ntlong-kxêthwa ka mehla.” (Luka 19:47, mongwalo o sekamego ke wa rena.) Jesu o be a diriša nako yeo a bego a e-na le yona ka mo go feletšego. (Joh. 9:4) Kapejana pele ga lehu la gagwe, o ile a kgona go botša Tatagwe gore: “Xe e le Nna, ke Xo dirile wa letaxô mo faseng ka xo phêtha tirô ye O ntaetšexo wa re ke e dirê.”—Joh. 17:4.
2 Ge dipelo tša rena di tlala ka tebogo ya go leboga tšohle tšeo Jehofa a di dirilego, le rena ka mo go swanago re ikwa re gapeletšega go bolela ka yena letšatši le letšatši. Re ba ba swanago gabotse le barutiwa ba Jesu bao ba ilego ba bolela ka sebete gore: “Xa re kxône xo lesa xo bolêla tše re di bonexo le tše re di kwilexo.” (Dit. 4:20) Go bolela ga bona ka Jehofa e be e le mo go tšwelago pele, ka gobane pego e bolela gore “letšatši le lengwe le le lengwe . . . ba ile ba tšwela pele ba sa kgaotše.” (Dit. 5:42, NW) Re swanetše go ipotšiša gore, ‘Na ke moekiši wa Morutiši wa-ka, Jesu?’
3 Go Bolela ka go Akgofa ga Nako: Jesu o boletše e sa le pele gore ge molaetša wa Mmušo o tsebaditšwe lefaseng ka moka, e “tlo ba xôna bofêlô bo fihlaxo.” (Mat. 24:14) Se se swanetše go gatiša go rena bohlokwa le go akgofa ga modiro wa rena. Ka ge maphelo a ba dimilione a tloga a le kotsing, re ka hwetša gore ga go na selo se sengwe se bohlokwa kudu goba se se holago se re kago se dira. Ka ge tshepedišo ye ya dilo e le kgaufsi le go fela, nako yeo e šetšego bakeng sa go phetha modiro wo e fokotšegile!
4 Dipego di bontšha gore Jehofa o akgofiša go kgoboketšwa ga ba swanago le dinku. (Jes. 60:22) Dikarolong tše dintši tša lefase, batho ba kgeregela e le ka kgonthe therešong, ge e le gabotse ba goeletša ka lethabo gore: “Re tlo ya le [lena], gobane re kwele gobane Modimo o na le lena”! (Sak. 8:23, PK) Mantšu a Jesu ke a therešo kudu go feta nakong le ge e le efe mehleng e fetilego: “Punô ké e ntši; ’me badiri xa ba nene. . . . Kxopêlang Mong wa punô a romêlê badiri punong ya xaxwe.” (Mat. 9:37, 38) Na seo ga se re hlohleletše go ba ba fišegago go etša barutiwa ba Jesu bao “ka mehla ba [bego] ba hlwa bà le Ntlong-kxêthwa bà rêta Modimo”? (Mongwalo o sekamego ke wa rena.)—Luka 24:53.
5 Tsebatša Therešo Letšatši le Letšatši: Letšatši le lengwe le le lengwe, re swanetše go tsoma ditsela tša go tsebiša ba bangwe therešo. Dibaka di hwetšagala gabonolo. Na o ka tšea metsotso e sego kae o leletša mogwera mogala goba motho yo o tlwaelanego le yena yo o naganago gore mo gongwe a ka e amogela? Goba go thwe’ng ka go ngwalela motho yo mongwe yo o sa kago wa kgona go mo hwetša ka gae lengwalo? Na o ile wa nagana ka go sepedišetša ralebenkele pampišana nakong ya ge o reka? Ka mo go swanago, o ka nagana ka dibaka tše dingwe tše dintši tšeo o nago le tšona letšatši le lengwe le le lengwe bakeng sa go abelana kholofelo ya gago le ba bangwe. Ge e ba o dira boiteko le go bontšha sebete ka tekanyo e nyenyane, Jehofa o tla go thuša.—1 Ba-Thes. 2:2.
6 Ka gona ge re thoma mediro ya letšatši le lengwe le le lengwe, re swanetše go ipotšiša gore, ‘Na ke tla gata mogato wa pele wa go abelana kholofelo ya-ka le motho yo mongwe ge e ba sebaka se bulega lehono?’ Ekiša boemo bja kgopolo bja Jesu yo a ilego a hlalosa lebaka leo ka lona a bego a rometšwe lefaseng ka gore: “Ke swanetše go tsebatša ditaba tše di lokilego tša mmušo wa Modimo.” (Luka 4:43, NW) Ge e ba re nyaka go swana le Morutiši wa rena, re tla dira se se swanago.—Luka 6:40.