Lenaneo Le Lefsa La Letšatši Le Le Kgethegilego La Kopano

Sehlogo sa lenaneo le lefsa la letšatši le le kgethegilego la kopano go thoma ka September ke se se rego “Dira Dilo Tšohle ka Baka la Ditaba tše di Lokilego.” (1 Ba-Kor. 9:23, NW) Ditaba tše di lokilego tša Mmušo ke ditaba tše bohlokwa kudu tšeo di kwewago lehono. Lenaneo le tla re thuša go leboga tokelo e kgethegilego yeo re nago le yona ya go ba barwadi ba ditaba tše tše di kgahlišago. Gape le tla re nea sebete sa gore re tšwele pele re tsebatša ditaba tše di lokilego ka ntle le go kgaotša.—Dit. 5:42.

Lenaneo le tla re bontšha kamoo re ka dirišago tlwaetšo ya rena ya pušo ya Modimo ka mo go tletšego e le gore re ka kgona go phetha go gontši bodireding. Re tla kwa go tšwa go ba bangwe bao ba ilego ba dira ditokišo e le gore ba oketše tirelo ya bona, go akaretša le bafsa bao ba ikgafago ka mo go feletšego gore ba atološe ditaba tše di lokilego.—Bapiša le Ba-Filipi 2:22.

Polelo ya motheo yeo e tlago go newa ke seboledi sa moeng, e tla gatelela go nyakega ga gore re dule re “swanelegela go gafelwa ditaba tše di lokilego.” (1 Ba-Thes. 2:4, NW) Re tla thušwa go bona gore ge e ba re tla boloka tokelo ya go abelana ditaba tše di lokilego le ba bangwe, re swanetše go tšwela pele re phela ka go dumelelana le dinyakwa le ditekanyetšo tša Modimo tseleng ya rena ya go nagana le boitshwarong. Ditšhegofatšo tšeo re di hwetšago ka go dira se le tšona di tla gatelelwa.

O se ke wa fošwa ke lenaneo le la bohlokwa. Bao ba sa tšwago go ineela bao ba ratago go kolobetšwa letšatšing le le kgethegilego ba swanetše go tsebiša molebeledi yo a okamelago gatee-tee. Laletša bohle bao o ithutago le bona gore ba be gona. Anke re dumeleleng Jehofa gore a re matlafatše gore re dire dilo ka moka ka baka la ditaba tše di lokilego gomme ka go rialo re phethe modiro o mogolo kudu pele ga Haramagedone.