Diriša Diporoutšha Go Ipiletša Monaganong Le Pelong
1 Ditherešo tša Beibele di swanetše go neelwa ka tsela yeo di tlago go ipiletša monaganong le pelong. Ge Jesu a be a hlalosetša batheetši ba gagwe therešo, o ile a kgetha ditaba tšeo di bego di ba kgahliša le go ba tutuetša. (Luka 24:17, 27, 32, 45) Katlego ya bodiredi bja rena e ithekgile kudu ka boiteko bjo re katanelago go bo bontšha bakeng sa go hlaola dinyakwa tša moya tša batheetši ba rena.
2 Diporoutšha e ka ba didirišwa tše di atlegago go fihleleleng monagano le pelo tša bao re kopanago le bona bodireding. Nagana e sa le pele ka bao ba ka arabelago molaetšeng wa poroutšha e nngwe le e nngwe yeo e sepedišwago ka August:
—Na Modimo Ruri o na le Taba le Rena? Batho bao ba gateletšegilego ka tša boiphedišo goba ba ilego ba lebeletšana le masetla-pelo ba tla thabela molaetša wo o homotšago wo o bolelago ka bokamoso bjo bo se nago tlaišego.
—Morero wa Bophelo ke Ofe—O ka o Hwetša Bjang? Bafsa bao ba naganago kudu ka bokamoso bja bjona ba tla holwa kudu ke dikarabo tše theilwego Beibeleng tšeo di hwetšwago ka poroutšheng ye.
—Thabela Bophelo Lefaseng ka mo go sa Felego! Diswantšho tše dintši le ditemana tše di bontšhitšwego di tla thuša bana ba banyenyane le bao ba sa kgonego go bala gabotse go kwešiša merero ya Modimo.
—Mmušo Woo o Tlago go Tliša Paradeise. Motho le ge e le ofe yo a nago le kgokagano le mmušo a ka arabela molaetšeng wo o lego mabapi le kamoo Mmušo wa Modimo o tlago go rarolla ka gona mathata a thata a batho.
—Ge Motho yo o mo Ratago a E-hwa. Balaodi ba bantši ba ditirelo tša poloko ba thabela go ba le dikopi tša poroutšha ye bakeng sa malapa ao a hwetšwego. Bagoeledi bao ba neago bohlatse mabitleng ba diriša poroutšha ye bakeng sa go homotša bao ba llago. Dikgaetšedi tše pedi di ile tša batamela lapa la batho ba šupago bao ba bego ba rapela lebitleng. Ka baka la go abelana le bona molaetša o homotšago o lego ka poroutšheng, thuto ya Beibele e ile ya thongwa le mma letšatšing le le latelago!
—Na o Swanetše go Dumela Boraro Botee? Motho yo a nweletšego kudu bodumeding a ka arabela therešong e hwetšwago tabeng ye ye e kwalago gabotse yeo e pepentšhago thuto ya motheo ya Bojakane.
3 Itlwaelanye le poroutšha e nngwe le e nngwe, gomme o dire phetho ya kamoo o ka e dirišago gakaone ka gona tšhemong ya lena. Bakeng sa dithero tše di šišintšwego, bona letlakala la ka morago la tokollo ya July 1998 ya Tirelo ya Rena ya Mmušo. Eka Jehofa a ka šegofatša maiteko a gago a go fihlelela menagano le dipelo tša batho.—Mar. 6:34.