Aga Bophelo Bja Gago Tirelong Ya Jehofa
1 Jesu o ile a swantšha batheetši ba gagwe le mehuta e mebedi ya baagi. Yo mongwe o ile a aga tsela ya gagwe ya bophelo lwaleng la go kwa Kriste gomme o ile a kgona go emeletšana le madimo a kganetšo le tlaišego. Yo mongwe o ile a aga lešabašabeng ka baka la go se kwe ga boithati gomme a se kgone go emeletšana le kgateletšo ge e e-tla. (Mat. 7:24-27) Ka ge re phela bofelong bja tshepedišo ye ya dilo, re lebeletšana le madimo a mantši a bonaba. Maru a maso a masetla-pelo a magolo a ipopa ka bjako ka pele ga rena. Na re tla tiišetša go fihla bofelong tumelo ya rena e le e feletšego? (Mat. 24:3, 13, 21) Go gontši go ithekgile ka tsela yeo re agago bophelo bja rena gona bjale. Ka gona, ke mo go akgofilego go ipotšiša gore, ‘Na ke aga bophelo bja-ka bja Bokriste ka go tia tirelong ya go kwa Modimo?’
2 Go aga maphelo a rena tirelong ya Jehofa go bolela’ng? Go bolela go dira Jehofa motheo wa maphelo a rena. Go akaretša go lebiša tlhokomelo Mmušong e le selo sa motheo seo re kgomegago ka sona. Go akaretša go kwa Modimo medirong ka moka ya maphelo a rena a letšatši le letšatši. Se se nyaka gore re dire thuto ya Beibele ya motho ka noši, ya lapa le ya phuthego le bodiredi bja rena bja tšhemo ka pelo ka moka gomme re dire gore tše e be tšona dilo tšeo di tlago pele go rena. (Mmo. 12:13; Mat. 6:33) Tsela e bjalo ya go kwa e feleletša ka tumelo e tiilego wa lwala yeo e ka se kego ya šwalalana ge e lebeletšane le madimo le ge e le afe a bonaba ao a ka re welago.
3 Ke mo go thabišago go bona batho ba dimilione ba aga maphelo a bona le dikholofelo tša bona ka bokamoso ka kgodišego tirelong ya Modimo, go etša ge Jesu a dirile. (Joh. 4:34) Ba kgomarela thulaganyo e tsepamego ya mediro ya pušo ya Modimo gomme ba thabela ditšhegofatšo tše di humilego ka baka la se. Mma yo mongwe o ile a hlalosa kamoo yena le monna wa gagwe ba ilego ba godiša barwa ba bona ba babedi ka katlego gore ba hlankele Jehofa: “Re ile ra tlatša maphelo a rena ka therešo—go ya dikopanong ka moka, go lokišetša diboka le go ba go tšona le go dira tirelo ya tšhemo karolo ya ka mehla ya maphelo a rena.” Monna wa gagwe o ile a oketša ka gore: “Therešo ga se karolo ya bophelo bja rena, ke bophelo bja rena. Selo se sengwe le se sengwe se dikologa go yona.” Na le wena ka mo go swanago o dirile gore tirelo ya Jehofa e be selo seo se tlago pele-pele ka lapeng la gago?
4 Hlama Thulaganyo e Šomago ya Beke le Beke: Mokgatlo wa Jehofa o re thuša gore re latele mokgwa o mobotse wa moya ka go rulaganya diboka tše hlano ka beke. Bakriste bao ba agago maphelo a bona borapeding bja Jehofa ba rulaganya ditaba tša bona tša boiphedišo le tša lapa ka tsela ya gore ba be gona dibokeng tše ka moka tše bohlokwa. Ga ba dumelele ditaba tšeo e sego tša bohlokwa gakaalo gore di šitišane le go ba gona ga bona ka mehla dibokeng.—Ba-Fil. 1:10; Ba-Heb. 10:25.
5 Bakriste ba ba godilego tsebong ba lemoga gore go etša ge go le bohlokwa go ja dijo tša ka mehla ka dinako tše itšego letšatši le lengwe le le lengwe, ka gona go bohlokwa go dira thulaganyo e tsepamego ya thuto ya motho ka noši le ya lapa, go akaretša le go lokišetša diboka. (Mat. 4:4) Na o ka beela ka thoko bonyenyane nako ya metsotso e 15 goba e 20 letšatši le lengwe le le lengwe bakeng sa thuto ya motho ka noši? Taba-kgolo ke go se dumelele dilo tše dingwe di tsena-tsenana le nako yeo e beetšwego ka thoko bakeng sa thuto. Go dire mokgwa o holago. Se mo gongwe se ka nyaka gore o tsoge e sa le ka pela mesong e mengwe le e mengwe go feta kamoo o dirago ka gona gona bjale. Ditho tše 17 000 tša lapa la Bethele la lefase ka bophara di tsoga e sa le mesong kudu bakeng sa go ahla-ahla temana ya letšatši. Ke therešo gore go tsoga e sa le ka pela go nyakega gore o ye malaong ka iri e swanetšego ya bošego e le gore o thome letšatši le le latelago o lapologile e bile o khuditše.
6 Ge e ba o le hlogo ya lapa, tšea mogato wa pele gore o hlame le go rulaganya lenaneo la lapa la gago la modiro wa pušo ya Modimo. Malapa a mangwe a bala Beibele, Yearbook goba puku e nngwe a le gotee ge a iketlile ka morago ga dijo tša mantšiboa. Batswadi ba bantši bao ba bonego bana ba bona ba gola e e-ba Bakriste ba tiilego moyeng ba re selo se sengwe seo se tlaleleditšego katlegong ya bona e bile mokgwa wa lapa wa go beela ka thoko mantšiboa a itšego bekeng e nngwe le e nngwe ao ka ona ba thabelago nako e botse ya moya ba le gotee. Tate yo mongwe yo bjalo o itše: “Ke dumela gore tšwelopele ya moya ya bana ba rena e bile gona kudu-kudu ka baka la thuto ya rena ya ka mehla ya lapa mantšiboeng a Laboraro, yeo e ilego ya thoma mo e ka bago nywageng e 30 e fetilego.” Bana ba gagwe ka moka ba bararo ba ile ba kolobetšwa e sa le ba banyenyane ka nywaga, gomme ka morago boraro bja bona ka moka ba ile ba tsenela bodiredi bja nako e tletšego. Go tlaleletša thutong ya lapa, go ka boeletšwa dithero tša tirelo ya tšhemo goba dikarolo tša seboka, gomme mediro e mengwe e holago ya thabelwa gotee.
7 Thulaganyong ya gago ya beke le beke, na o ile wa ‘reka nako’ bakeng sa boboledi bja Mmušo? (Ba-Kol. 4:5, NW) Bontši bja rena re phela maphelo a leema-ema ka ge re e-na le boikarabelo bja lapa le bja phuthego bjo re swanetšego go bo hlokomela. Ge e ba re sa dire dithulaganyo tše tsepamego tša gore re be le karolo modirong wa boboledi le wa go ruta beke e nngwe le e nngwe, go tla ba bonolo gore dilo tše dingwe di pipetše modiro wo o bohlokwa. Mong wa moraka o mogolo wa dikgomo o ile a bolela gore: “Mo e ka bago ka 1944 ke ile ka lemoga gore tsela e nnoši yeo ka yona ke bego nka ya tirelong e be e le ka gore ke rulaganye letšatši le itšego bakeng sa yona. Go ba go fihla lehono ke sa dutše ke tšea letšatši bekeng bakeng sa tirelo.” Mogolo yo mongwe wa Mokriste o hwetša gore go ba le thulaganyo e tsepamego ya go nea bohlatse e dira gore a kgone go dira tekanyo ya diiri tše15 ka kgwedi modirong wa boboledi. Ge e ba a e-na le modiro le ge e le ofe wa kgwebo ka Mokibelo, o o rulaganyeletša ka morago ga tirelo ya gagwe ya tšhemo mesong. Na wena le lapa la gago le ka rulaganya bonyenyane letšatši le tee bekeng e nngwe le e nngwe bakeng sa tirelo ya tšhemo, la dira se karolo ya lena ya tsela ya moya ya bophelo?—Ba-Fil. 3:16.
8 Hlahlobišiša Mokgwa wa Gago wa Bophelo: Go na le dilo tšeo di šitišago go aga maphelo a rena go dikologa tirelo ya Jehofa. Maemo a sa letelwago a ka šitiša thulaganyo ya rena e rulaganyeditšwego ka kelohloko ya thuto, diboka le tirelo. Le gona Lenaba la rena e lego Sathane le tla dira sohle se le ka se kgonago go go “thibêla” gomme la šitiša dithulaganyo tša rena. (1 Ba-Thes. 2:18; Ba-Ef. 6:12, 13) O se ke wa dumelela mapheko a a go nyemiša moko mo e lego gore o a langwa. Dira diphetogo le ge e le dife tšeo di nyakegago go phetha modiro wa gago o rulaganyeditšwego wa pušo ya Modimo. Go nyakega boikemišetšo le go phegelela gore o phethagatše seo ge e le gabotse e lego se se holago.
9 Ga se ra swanela go dumelela ditutuetšo tša lefase le tutuetšo e mpe ya go se phethagale ga nama ya rena gore di tliše mediro yeo e sego ya moya yeo e ka thomago go senya bogolo bja nako ya rena le tlhokomelo ya rena. Go nyakega go itlhahloba, o diriša dipotšišo tša go etša tše rego: ‘Na go bjalo ka ge eka tsela ya lapa la-ka ya bophelo ganyenyane-ganyenyane e thoma go se be le teka-tekano goba go ba le mapheko? Na ke thomile go aga bophelo bja-ka dilong tša lefase le tšeo di fetago? (1 Joh. 2:15-17) Ke diriša nako e kaaka’ng dikgahlegong tša motho ka noši, maetong a boithabišo, dipapading goba boithabišong bjo bongwe—go akaretša go bogela thelebišene goba go hlohlomiša go Internet—ge e bapetšwa le nako yeo ke e dirišago medirong ya moya?’
10 Ge e ba o lemoga gore bophelo bja gago bo thoma go tlala ka mediro e mentši yeo e sego bohlokwa, ke’ng seo se swanetšego go dirwa? Go fo etša ge Paulo a ile a rapelela gore eka banababo ba ka “lokišega,” goba “go lebantšhwa ka tshwanelo,” ke ka baka la’ng o sa lope thušo go Jehofa gore o buše gape o tielele tirelong ya gagwe? (2 Ba-Kor. 13:9, 11, mongwalo wa ka tlase wa NW) Ka gona ikemišetše go phelela phetho ya gago gomme o dire dipeakanyo tše di nyakegago. (1 Ba-Kor. 9:26, 27) Jehofa o tla go thuša go phema go retologela go le letona goba le letshadi tirelong ya go mo hlankela ka potego.—Bapiša le Jesaya 30:20, 21.
11 Dula o Swaregile Tirelong ya Modimo e Thabišago: Ba dimilione ba phegelela lethabo ka mo go tseneletšego eupša ba hwetša gore ge bofelo bja lefase bo batamela, dilo tše di bonagalago tšeo ba ilego ba di tsoma ka phišego ga se tša ba tlišetša lethabo le le swarelelago. E bile “xo phuthêla phefô ka kobô.” (Mmo. 2:11) Ka lehlakoreng le lengwe, ge re boloka maphelo a rena a dikologa go Jehofa, ‘re mmea ka pele ga rena ka mehla,’ re ba le kgotsofalo e tseneletšego. (Ps. 16:8, 11, PK) Se se bjalo ka gobane ke ka baka la Jehofa re bilego gona. (Kut. 4:11) Ka ntle le yena, Mophethagatši yo Mogolo wa Morero, bophelo ga bo na morero. Go hlankela Jehofa go tlatša maphelo a rena ka modiro o nago le mohola le morero wo o re holago gaešita le ba bangwe ka tsela e swarelelago, ee, ka tsela ya ka mo go sa felego.
12 Go bohlokwa gore re se ke ra ba ba tšeago dilo gabohwefo gomme ra lahlegelwa ke maikwelo a rena a go akgofa ga mehla mabapi le go batamela ga ka pela ga bofelo bja lefase la Sathane. Bophelo bja rena bja letšatši le letšatši bo tutuetšwa ke pono ya rena ka bokamoso. Batho ba mehleng ya Noage, bao ba bego ba sa dumele gore go be go tla ba le meetse-fula a lefase ka moka, “ba be ba sa šetše selô” ba thea maphelo a bona a letšatši le letšatši dikgahlegong tša motho ka noši—ba e-ja, ba e-nwa e bile ba tsena lenyalong—go ba go fihla ge meetse-fula “a ba tšea ka moka.” (Mat. 24:37-39) Lehono, bao ba theago maphelo a bona lefaseng le ba tla bona ditebelelo tša bona ka bokamoso di šwalalana pele ga bona tshenyegong e kgolo go feta tšohle tšeo di kilego tša wela motho e lego “’tšatši la Morêna.”—2 Pet. 3:10-12.
13 Ka gona, tšwela pele o aga bophelo bja gago go Modimo yo a phelago, e lego Jehofa le go direng thato ya gagwe. Ga go peeletšo yeo o ka e dirago bophelong bjo yeo e nago le Mothekgi yo a botegago go swana le Jehofa. Ga a aketše—o tla botegela dikholofetšo tša gagwe. (Tito 1:2) A ka se ke a hwa—ga go na selo seo se bolokilwego go Jehofa seo se lahlegilego. (Habak. 1:12; 2 Tim. 1:12) Bophelo bja go kwa le bja tumelo bjoo re bo agago gona bjale ke feela mathomo a bophelo bjo bo tlago go swarelela go ya go ile tirelong e thabišago ya Modimo wa rena yo a thabilego!—1 Tim. 1:11; 6:19.
“Therešo ga se
karolo ya bophelo bja rena, ke bophelo bja rena.
Selo se sengwe le se sengwe se dikologa go yona.”