Borapedi bja Therešo bo a Gola ka Bohlabela bja Yuropa
1 Bakriste ba lekgolong la pele la nywaga e be e le baboledi ba ba fišegago ba Mmušo. Ba ile ba thaba ge diphuthego di be di “ata ka mehla.” (Dit. 16:5) Go ruta ga bona ka sebete go ile gwa fetišetša borapedi bja therešo Asia, Afrika le Yuropa gomme se sa feleletša ka puno e humilego ya badumedi.
2 Mo nakong ye ya bofelo, borapedi bja therešo bo tšwela pele bo ata kudu-kudu dinageng tša Yuropa Bohlabela. Dinageng tšeo go tšona re bego re le ka tlase ga dithibelo tša mmušo go fihla mathomong a bo-1990, ga bjale re ba le dikoketšego tšeo di bonagalago kudu. Yearbook ya 1999 e bontšha gore tše pedi tša dinaga tšeo, e lego Russia le Ukraine, e nngwe le e nngwe e begile bagoeledi ba ka godimo ga 100 000 bao ba bago le karolo bodireding bja phatlalatša. Mašemong a 15 a Soviet Union ya kgale, ga e sa le go tloga ka 1991 batho ba ka godimo ga 220 000 ba ile ba ineela go Jehofa gomme ba kolobetšwa! Kgolo ye e tšwelago pele ka lebelo e dirile gore go nyakege gore go agwe Diholo tše dintši tše difsa tša Mmušo le Diholo tša Kopano gotee le go katološa meago e mmalwa ya makala.
3 Ka ge go ile gwa tsebišwa ka go Tirelo ya Rena ya Mmušo ya March 1997, karolo ya Sekhwama sa Mokgatlo sa Diholo tša Mmušo ga bjale e šomišwa bakeng sa go nea diphuthego dikadimo dinageng tšeo go nyakegago Diholo tša Mmušo tše oketšegilego ka mo go akgofilego kudu eupša e le moo go nago le methopo e lekanyeditšwego le mathata a šoro a tša boiphedišo. Magareng ga March 1996 le October 1998, Mokgatlo o ile wa nea tumelelo go dikgopelo tša dikadimo tša Diholo tša Mmušo tše 359 tše di tšwago go diofisi tša makala tšeo di okametšego dinaga tše 11 tša ka Bohlabela bja Yuropa. Ditšhelete tšeo di neelwago di šomišetšwa go reka naga le ditlabakelo bakeng sa go agwa ga Diholo tše mpsha tša Mmušo le go thuša diphuthego bakeng sa go mpshafatša mafelo ao a lego gona. Diswantšho tšeo di bontšhwago mo di re nea kgopolo ya kamoo meneelo ya Sekhwama sa Mokgatlo sa Diholo tša Mmušo kua United States le dinageng tše dingwe e ilego ya hola banababo rena ka gona Bohlabela bja Yuropa.
4 Ka 1998, Bulgaria e ile ya ba le koketšego ya 12 lekgolong, gomme banababo rena ba ile ba thaba ge Holo ya bona ya Mmušo ya pele e be e neelwa ka April wona ngwaga woo. Croatia e ile ya ba le koketšego ya 4 lekgolong, gomme ga bjale banababo rena moo ba aga Diholo tša Mmušo tše di oketšegilego bakeng sa go tšwetša pele borapedi bja therešo. Hungary Diholo tša Mmušo tše 80 di dirišwa ke diphuthego tše 144. Se se bolela gore go diphuthego tše 235 tšeo di lego gona nageng yeo, tše 61 lekgolong di na le lefelo la tšona la borapedi. Macedonia lenaneo la go agwa ga Diholo tša Mmušo le feditše diholo tše pedi gomme tše di oketšegilego di sa dutše di tšwela pele. Selemong sa 1999, Holo ya Mmušo ya mabato a mabedi e ile ya fetšwa motseng-mošate wa Skopje. Holo ye e ka kgona go dirišwa ke mo e ka bago diphuthego tše tshelelago.
5 Ngwagola kua Russia, ka kakaretšo batho ba ka godimo ga 260 ba be ba kolobetšwa beke e nngwe le e nngwe! Ka go latela mohlala o dirišitšwego dinageng tše dingwe, lekala la Russia ga bjale le rulagantše Dikomiti tša Tikologo tša tša Meago tše 12 go lefelo la tšona leo le nabilego, bakeng sa go thekga go agwa ga nakong e tlago ga Diholo tša Mmušo. Ka leboa la St. Petersburg, go agwa ga Holo ya pele ya Kopano nageng yeo go tšwela pele, e lego yeo e tlago go rwala batho ba 1 600. Moago o tla akaretša gape le Diholo tše hlano tša Mmušo tšeo e nngwe le e nngwe e tla bago le ditulo tše 200. Bakeng sa go nea dinyakwa tša moya tša banababo rena le batho ba bantši bao ba thabelago kua Ukraine, Diholo tša Mmušo tše 84 di feditšwe gomme tše 80 di sa dutše di agiwa.
6 Na koketšego ye ya ka Bohlabela bja Yuropa ga e tliše lethabo ka dipelong tša rena? Go sa šetšwe moo re dulago gona, koketšego ya borapedi bja therešo e re gopotša gore Modimo ga a bebe sefahlego le gore go se fele pelo ga gagwe go tla bolela phologo bakeng sa “lešaba le lexolo.” (Kut. 7:9; 2 Pet. 3:9) A tokelo e kaakang yeo re nago le yona bakeng sa go ba le karolo e nyenyane go tlaleletšeng kgolong ya moya ya ba bangwe, gaešita le go bao ba lego dinageng tša kgole! Diema 28:27 e re kgonthišetša gore “thlalla-badiidi a ka se kê a bá a hlôka.” Go rata ga rena go thuša go lefelela ditshenyagalelo tše tša go aga go feleletša ka ‘go tlatša mo go hlaelago’ ka dilo tše di bonagalago, go dira gore batho ka moka ba kgone go ba le lethabo leo le tlišwago ke go nea le lethabo leo le tlišwago ke go bona borapedi bja therešo bo oketšega lefaseng ka bophara.—2 Ba-Kor. 8:14, 15; Dit. 20:35.
[Seswantšho go letlakala 3]
Săcele, Romania
[Seswantšho go letlakala 3]
Maardu, Estonia
[Seswantšho go letlakala 3]
Sevnica, Slovenia
[Seswantšho go letlakala 3]
Tiszavasvári, Hungary
[Seswantšho go letlakala 4]
Jūrmala, Latvia
[Pictures on page 4]
Tallinn, Estonia
[Seswantšho go letlakala 4, 5]
Taurage, Lithuania
[Pictures on page 4, 5]
Belgrade, Yugoslavia
[Pictures on page 5]
Prievidza, Slovakia
[Seswantšho go letlakala 5]
Mátészalka, Hungary
[Pictures on page 6]
Vranov nad Topl’ou, Slovakia
[Seswantšho go letlakala 6]
Ruma, Yugoslavia
[Pictures on page 6]
Tornakalns, Latvia