Na o ka Itira yo a Hwetšagalago?

¹ Go ile gwa direga tiragalo e kgolo ngwageng wa 778 B.C.E. Ponong moporofeta Jesaya o bona “Morêna a dutše sedulong se rotobetšexo se phaxamilexo.” Ka morago Jesaya o kwa baserafi ba lebiša tlhokomelo letagong la Jehofa ba re: “Mokxêthwa, Mokxêthwa, Mokxêthwa, ké Morêna wa mašaba.” Seo e swanetše go ba e be e le se se makatšago gakaakang! Boemong bjoo, Jehofa o ile a rotoša potšišo e hlohlago: “Ke tlo roma mang? Ké mang a tl’o xo re êla?” Ga go tlhaloso yeo e ilego ya newa ge e le ka mohuta wa kabelo yeo goba ge e ba motho yo a ithapago a be a tla holwa ke yona. Lega go le bjalo, Jesaya o ile a araba ka ntle le tika-tiko gore: “Ke nna e, nthomê!”—Jes. 6:1, 3, 8.

² Moya wo wa go rata go dira se sengwe le se sengwe seo Jehofa a se laelago, o hlaola batho ba gagwe. (Ps. 110:3) Mo nakong ye, taletšo e kgethegilego e fetišetšwa go bao ba ka itirago ba ba hwetšagalago. Na o itokišeditše go arabela ka moya wa go rata, wa go swana le wa Jesaya?

³ Go nyakega banababo rena bakeng sa go hlankela Bethele. Go nyakega gore ba be le kganyogo e tseneletšego ya go etiša dikgahlego tša Mmušo pele le go rata go dira se sengwe le se sengwe seo se nyakegago bakeng sa go thekga modiro wa lefase ka bophara wa boboledi. (Mat. 6:33) Ge e le gabotse, go hlankela o le setho sa lapa la Bethele go nea motho sebaka se se kgethegilego sa go hlankela Jehofa ka moya ka moka. Go bjalo bjang?

⁴ Mošomo wo o Dirwago Bethele: Nagana ka seo se phethwago ka mehla Bethele ya Afrika Borwa. Banababo rena le dikgaetšedi ba 580 bao ba dirago lapa la Bethele, ba na le tokelo ya go ba bao ba akaretšwago kgaufsi go thekgeng sehlopha sa molaki yo a botegago yo bohlale le Sehlopha sa sona se se Bušago go tšweletšeng Dibeibele le dipuku tša Beibele bakeng sa go dirišwa ka borwa bja Afrika le thutong ya motho ka noši. (Mat. 24:45) Ka mohlala, ngwageng wo o fetilego wa tirelo, go ile gwa tšweletšwa le go romelwa dipukwana le diporoutšha tše 5 029 280, dimakasine tše 22 745 923 le dikopi tše 5 194 484 tša Tirelo ya Rena ya Mmušo ka boiteko bjo bo kopanetšwego bja lapa la Bethele la Afrika Borwa. Phetogo thulaganyong ya kabo e nolofaditšwego ya dipuku e okeditše kudu go tšweletšwa ga dimakasine le dipuku. Ka mohlala, mo nakong ye go gatišwa mo e nyakilego go ba dimakasine tše dimilione tše 3,5 kgwedi e nngwe le e nngwe. Lefapha la Thomelo ya Dipuku ga bjale le romela dipuku tše dimilione tše fetago tše tharo kgwedi e nngwe le e nngwe diphuthegong tša Afrika Borwa le tšeo di lego Malawi, Mozambique, Zambia le Zimbabwe, tšeo re di bolokelago dipuku. Ditšhupetšo ka moka di bontšha gore mošomo o tla tšwela pele o oketšega nakong e tlago. Gape go newa tlhahlo bakeng sa diphuthego tše fetago 1 500 tšeo di lego ka tlase ga lekala la rena. Gape go newa thušo makaleng a Afrika ao a swaregilego ka tša boentšineare le go agwa ga magae a oketšegilego a Bethele le Diholo tša Kopano, gomme mo nakong ye go nyakega mo e nyakilego go ba Diholo tša Mmušo tše 8 000 dinageng tša Afrika tšeo di hlokago. Go nyakega makgolo a baithapi bao ba ratago bakeng sa go hlokomela go gatišwa le go romelwa ga dipuku, go hlwekiša, go lokiša, go lokišetša dijo, go reka dilo, tlhokomelo ya tša maphelo le mafapha a mangwe a mantši a Bethele.

⁵ Go phetha mošomo wo ka moka go nyaka matla eupša ke mošomo o kgotsofatšago wa moya. Go tseba gore matla a rena ka moka a dirišitšwe bakeng sa go thekga modiro wa boboledi le wa go ruta, go feleletša ka lethabo le legolo. Tirelo ya Bethele e re thuša go tseba mokgatlo wa Jehofa ka botlalo bja wona. Re gopotšwa gore mopsalme o ile a kgothaletša ba-Isiraele go tseba gabotse-botse lefelo la lefaseng la taolo ya pušo ya Modimo mehleng ya bona.—Ps. 48:12, 13.

⁶ Ditšhegofatšo tša Tirelo ya Bethele: Bao ba hlankelago Bethele ba ikwa bjang ka ditokelo tša bona tša tirelo? Ela hloko ditlhaloso tše di latelago go tšwa go ditho tša bafsa le tše di godilego tša lapa la Bethele. Setho se sengwe sa lapa la Bethele seo se thabetšego tirelo ya Bethele ka nywaga e meraro se hlalosa gore: “Go ba Bethele go matlafaditše tswalano ya-ka le Jehofa. Ge ke dutše ke hlankela mo ka nako e telele le ge ke ithuta kamoo Bethele e šomago ka gona, e nthuta ka semelo sa Jehofa. Gape tirelo ya Bethele e ile ya bula mahlo a-ka gore ke bone gore Jehofa o diriša batho—batho ba mehuta ka moka. Le gona ga go nyakege gore o be yo a phethagetšego gore a go amogele.”

⁷ Ngwanabo rena yo mongwe yo mofsa o bolela gore: “Ke gopola ke nagana ke nnoši gore, ‘E tla ba mo gobotse gakaakang go tsena lefaseng le lefsa gomme ke botša banna ba tumelo ba bogologolo bao ba tsošitšwego gore ke hlanketše Bethele ka nywaga e mentši, go e-na le go leka go huma lefaseng.’”

⁸ Ngwanabo rena yo mofsa o nagana ka tlwaetšo yeo a ilego a e amogela: “Go ithuta ka nna le seo ke swanetšego go šomela go sona le go hlagolela dika tšeo, e bile tšhegofatšo e kgolo. Ke nagana gore ga bjale ke kgona gakaone go hlankela Jehofa. Ke hwetša gore ke kgona go se fele pelo ka mo go oketšegilego go se nene, ke na le boitshwaro ka tekanyo e oketšegilego go feta pele gomme ke kgona go bontšha lerato ka tekanyo e kgolo.”

⁹ Kgaetšedi yo mongwe o nagana ka ditšhegofatšo tša gagwe go ba go fihla mo nakong ye: “Mananeo a moya mo a nthutile mo gontši ka Jehofa le kamoo nka mo ekišago kaone ka gona ka kgopolo, maikwelo le ka ditiro. Le gona, ka ge tlwaetšo e tšwela pele, le tšhegofatšo e tšwela pele.”

¹⁰ Ngwanabo rena yo a gafilego palomoka ya nywaga e 59 bodireding bja nako e tletšego le nywaga e fetago 43 ya nywaga yeo a le Bethele, o boletše gore: “Bethele ga e swane le lefelo la bodula-noši bjalo ka ge ba bangwe ba nagana. Re phetha mo gontši kudu ka baka la tsela ya rena yeo e rulagantšwego ya bophelo. . . . Ga se gwa ka gwa ba le letšatši leo ke ilego ka tla go šoma gomme ka se thabele seo ke se dirilego. Ka baka la’ng? Ka gobane ge re ineela go Jehofa ka moya ka moka, re ba le kgotsofalo ya go tseba gore ‘re dirile tšeo re bego re swanetše go di dira.’”—Luka 17:10.

¹¹ Ngwanabo rena yo mongwe yo a hlanketšego Bethele ka nywaga e 62 o itše: “Ke dumela ka mo go tiilego gore Bethele ke lefelo le lebotse lefaseng pele ga lefase leo le tlago la Paradeise. Ga se ka ka ka itshola le ka mohla ka baka la go dira tirelo ya nako e tletšego mošomo wa-ka wa bophelo ka moka. E bile lethabo le lekaakang go bona le go ba le karolo kgolong e kgolo ya mokgatlo wa Jehofa wa lefaseng! Ke ikemišeditše gore ka thušo ya Jehofa ke tšwele pele go dira Bethele legae la-ka le go katana ka moya ka moka go tšwetša pele dikgahlego tša Mmušo.”

¹² Ditho tše tša lapa la Bethele di bontšhitše feela tše sego kae tša ditšhegofatšo tše dintši tšeo o ka di thabelago ge e ba o ka itira yo a hwetšagalago bakeng sa tirelo ya Bethele. Eupša bjalo ka ge e le therešo ka go amogela tokelo le ge e le efe ya tirelo, sa pele o swanetše go fihlelela ditshwanelego. Tše dingwe tša dinyakwa tša gore o hlankela o le setho sa lapa la Bethele ke dife?

¹³ Dinyakwa Bakeng sa Tirelo ya Bethele: Dinyakwa tša motheo bakeng sa bao ba dirago kgopelo ya tirelo ya Bethele di bontšhitšwe ka lepokising leo le sepedišanago le sehlogo se. Go oketša moo, ke ga bohlokwa gore ba ikemišetše go šoma ka thata, e sego go ba ‘barati ba maipshino.’ (2 Tim. 3:4, NW; 1 Ba-Kor. 13:11) Ditho tša lapa la Bethele e swanetše go ba banna le basadi ba moya bao ba nago le mekgwa e mebotse ya thuto ya motho ka noši gomme ba tlwaeditše matla a bona a go nagana bakeng sa go “kxetholoxanya botse le bobe.” (Ba-Heb. 5:14) Kgolo ya bona ya Bokriste e swanetše go ba e šetše e bontšhitšwe dibopegong ka moka tša bophelo, go akaretša moaparo wa bona, go itokiša, le kgetho ya mmino le boithabišo. Ditho tša Bethele tšeo di nago le dipelo tša go rata di hlankela kae le kae moo di nyakegago. Ditho tše tšeo e sa lego tše difsa ka nywaga gantši di newa dikabelo tšeo di nyakago matla a mmele, go akaretša go gatiša, go lokišetša le go romela dipuku, go lokiša, go hlokomela diphapoši, go hlwekiša, go hlatswa le go lokišetša dijo. (Die. 20:29) Lega go le bjalo, ka go se swane le modiro wa lefase, kabelo e nngwe le e nngwe e tliša kgotsofalo e kgolo ka gobane ke tirelo e kgethwa yeo e tlišago tumišo go Jehofa.—Ba-Kol. 3:23.

¹⁴ Bao ba laletšwago tirelong ya Bethele go nyakega gore bonyenyane ba dule ngwaga o tee. Se se dira gore ba kgone go tlwaeletšwa gore e be bašomi bao ba nago le tšweletšo. Kholofelo ke gore ba tla kgona go dira Bethele legae la bona. Ke lerato la go rata Jehofa leo le tutueletšago ditho tša lapa la Bethele go etiša modiro wa Mmušo pele ga dikgahlego tša bona ka noši e lego seo se thabišago Jehofa.—Mat. 16:24.

¹⁵ Tšeo di Nyakegago mo Nakong ye: Ka baka la mohuta wa mošomo wo o dirwago Bethele, seo re se nyakago kudu mo nakong ye ke banababo rena bao ba sa nyalago. Gaešita le ge se e se senyakwa, kgetho ya pele e newa bao e lego babulamadibogo ba ka mehla ka ge ba šetše ba le modirong wa nako e tletšego. Ge nako e dutše e e-ya go ka ba le sebaka bakeng sa dikgaetšedi tšeo di sego lenyalong le banyalani bao ba nago le nywaga ya magareng ga e 19 go ya go 35 bao ba ka bago ba na le bokgoni bjo bo itšego bjo bo nyakegago Bethele. Go oketša moo, banababo rena le dikgaetšedi tše dingwe bao ba ka bago ba le ka godingwana ga nywaga e 35 bao ba nago le bokgoni bjo bo kgethegilego bjo bo ka dirišwago Bethele ba kgothaletšwa go dira kgopelo. Ka mohlala, ba ba akaretša dingaka tša meno, bo-mmalamatlotlo bao ba nago le mangwalo, bathadi ba dipolane, baentšeneare, baoki bao ba nago le mangwalo, balokiši ba dikoloi tše di dirišago peterolo le tše di dirišago tisele, goba ditsebi tša tša dielektroniki, ge re bolela tše sego kae. Lega go le bjalo, ga re kgothaletše batho gore ba hwetše thuto e kgethegilego goba tlwaetšo ka kgopolo ya gore se se tla kaonefatša dibaka tša bona tša gore ba biletšwe Bethele. Bao ba šetšego ba hweditše tlwaetšo e itšego, mohlomongwe pele ba hwetša ditherešo, ba ka ngwala pego e kopana ya ditshwanelego tša bona tša mošomo gomme ba e sepediše le kgopelo ya Bethele.

¹⁶ Ge e ba o dirile kgopelo gomme o sa laletšwe go tlo hlankela Bethele, o se ke wa nyama. O ka naganišiša ka go tsošološa kgopelo ya gago gatee ngwaga o mongwe le o mongwe. Banababo rena ba bangwe bao ba nago le bokgoni bjo bo itšego bjo bo ka nyakegago Bethele ba itirile bao ba hwetšagalago bakeng sa tirelo ya boithapi ya lebakanyana. Ba ka dira kgopelo ya go hlankela Bethele ka lebakanyana lebaka la beke, tše pedi, tše tharo goba tše nne goba go ba go fihla go dikgwedi tše tharo. Ge e ba o kgahlegela tokišetšo ye, hle ngwalela ofisi ya lekala.

¹⁷ Go hlankela Jehofa ka go bapelana kgaufsi le Bakriste-gotee ke tokelo e kgahlišago bakeng sa bao ba šomago Bethele. Sehlopha se Bušago se leboga moya wa boikgafo wa bao ba itirilego bao ba hwetšagalago bakeng sa go hlankela dinyakwa tša borwarre bja lefase ka bophara.—Ba-Fil. 2:20-22; 2 Tim. 4:11.

¹⁸ Bafsa—Itokišetšeng Gona Bjale Bakeng sa Tirelo ya Bethele: Go itokišetša tirelo ya Bethele go thoma nako e telele pele go fihlelelwa senyakwa sa tekanyo ya nywaga e 19. Ke eng seo bafsa ba ka se dirago bakeng sa go itokišetša tirelo ya Bethele? Jesu o itše: “Ké mang mo xo lena, yo e rexo xe a rata xo axa morakô o motelele, a se thôme a dula a bala thšêlête ya xaxwe?” (Luka 14:28) Ka ge tokišetšo le go beakanya go le bohlokwa bakeng sa katlego modirong o mongwe le o mongwe wa go aga, ke ga bohlokwa gakaakang gore bafsa ba hlokomele ka šedi kamoo ba agago ka gona bakeng sa bokamoso bja bona tirelong ya Jehofa! Motheo o tiilego o swanetše go thewa e sa le kapejana bophelong e le gore ba fihlelele dipakane tša moya. Bjalo ka mofsa, o thea motheo wa gago gabotse gakaaka’ng? Ge e ba o tla rata go hlankela Bethele, o tla holwa kudu ke go hlahloba ka kelohloko dilo tše di latelago.

¹⁹ ‘Bula Sebaka’ Bakeng sa Tokelo ye e Kgethegilego ya Tirelo: Bjalo ka ge go begilwe go Mateo 19:12, (NW), Jesu o ile a kgothaletša barutiwa ba gagwe go ‘bula sebaka’ sa go se be lenyalong. Ka baka la’ng? Ga se a re ba dire bjalo ka baka la mabaka a motho ka noši, eupša “ka ’baka la mmušô wa maxodimo.” Paulo ka mo go swanago o kgothaleditše tsela e bjalo ya go ‘tiiša go direla Morena ka ntle le tšhitišo.’ (1 Ba-Kor. 7:32-35, PK) Ka manyami, ba bantši ba lahlegetšwe ke tokelo ya go hlankela e le banna bao ba sego lenyalong Bethele ka baka la go phegelela lenyalo e sa le ba bafsa. Re rata go kgothaletša banababo rena ba bafsa go diriša matla a bona go phegeleleng bodiredi bja nako e tletšego ge ba sa dutše ba lokologile boikarabelong bja lapa. Ka gona, ge ka morago ga nako e itšego ba kgetha go nyala, e tla ba banna ba kaone ka ge ba tla be ba hweditše phihlelo e ntši bophelong le bodireding bja Bokriste. Ka morago ga go hlankela Bethele ka nywaga e mentši, ba bangwe ba ile ba nyala gomme ba kgona go tšwela pele ba hlankela moo e le banyalani. Ge e ba ka morago ba e-ba le ditokelo tše dingwe, tše bjalo ka modiro wa bosepedi goba tirelo ya boromiwa, ka kgonthe ga ba itshole ka nako yeo ba e beetšego ka thoko bakeng sa go bula sebaka bakeng sa tirelo ya Bethele.

²⁰ O se ke wa Šitišwa ke go Phegelela Dilo tše di Bonagalago: Mofsa yo mongwe le yo mongwe o tla dira gabotse go ipotšiša gore: ‘Na pakane ya-ka ka morago ga go aloga sekolong se se phagamego ke go phegelela mošomo wa nako e tletšego wa lefase goba ke go hlankela Jehofa ka nako e tletšego?’ Go ba gona, go tšea mošomo wo go boletšwego ka wona mafelelong go tla nyaka boikgafo. Eupša go tla ba bjalo le ka go phegelela mošomo wa lefase! Mafelelong, ke mošomo ofe woo ka kgonthe o tlago go ba le mafelelo a sa ruri le a holago? Jesu o neile karabo e kwagalago. Go ya ka Mateo 6:19-21, o itše: “Le se kê la ikxobêlêla mahumô lefaseng, mo xo senyaxo thswêlê le diji, mo xo phulaxo mahodu a utswa. Mahumô ikxobeleng lexodimong, mo xo sa senyexo thswêlê le diji, mo xo sa phulexo mahodu a utswa. Xobane mo xo lexo lehumô la xaxo, ké mo xo lexo pelo ya xaxo.” Anke dipelo tša rena le ka mohla di se re hlohleletše go phegelela mošomo wa lefase goba dilo tše di bonagalago go e-na le tirelo ya moya ka moka go Jehofa. Ka moka ga rena re swanetše go lemoga gore mahumo feela ao a swanelwago ke go phegelelwa, ke tswalano e botse le Jehofa e le gore re thabiše pelo ya gagwe. (Die. 27:11) Ka go etiša Jehofa pele bophelong ge re sa dutše re le ba bafsa, re bontšha moo mahumo a rena a lego gona le kamoo Mmušo e lego wa bohlokwa ka gona go rena. Gopola, “tšhegofatšo ya Jehofa e a humiša, gomme ga e ekeletšwe ka bohloko.” (Die. 10:22, PK) Bafsa ba na le sebaka se sebotse sa go bontšha moo dipelo tša bona di lego gona ka go bušetša Jehofa selo se sengwe se sebotse bakeng sa sohle seo a ba filego sona. Tirelo ya Bethele, e nea sebaka se se bjalo se thabišago bakeng sa bao ba fihlelelago ditshwanelego.

²¹ Bao ba Hlankelago Bethele ba Swanetše go Hlweka Boitshwarong: Mopsalme o ile a botšiša gore: “Lesoxana le ka thakxa bya’ng thsepelô ya lôna?” O arabile ka gore: “Ké xe le lôta Lentšu la [Jehofa].” (Ps. 119:9) Seo se tla akaretša go phema selo le ge e le sefe seo se tswalanago le kgobogo ya boitshwaro ya tshepedišo ya Sathane ya dilo. Diswantšho tšeo di kgothaletšago bootswa tša Internet, boitshwaro bjo bo sa swanelago le motho wa bong bjo bo fapanego, mmino o gobogilego, boithabišo bjo bo gobošago le go dirišwa ga dino-tagi ka go se lekanyetše, e fo ba e mengwe ya melaba yeo Sathane a e dirišago bakeng sa go thibela bafsa ba rena go fihlelela dipakane tša moya. Go nyakega boikemišetšo bjo matla bakeng sa go ganetša maano a. Bjalo ka mofsa, ge e ba o ikhwetša o akareditšwe go e nngwe ya dilo tše, boledišana le bagolo ka phuthegong ya geno gomme le lokiše ditaba tše pele o dira kgopelo ya tirelo ya Bethele. Go ba le letswalo le le hlwekilego go bohlokwa bakeng sa go hlankela Jehofa ka mo go tletšego.—1 Tim. 1:5.

²² Ithute go Phedišana le ba Bangwe: Senyakwa se bohlokwa bakeng sa go atlega tirelong ya Bethele ke go ithuta go phedišana le ba bangwe. Lapa la Bethele la Afrika Borwa le dirilwe ke banababo rena le dikgaetšedi ba 580 bao ba tšwago maemong ka moka a bophelo. Le ge go se swane mo ga dimelo go tlaleletša botseng bja Bethele, ka dinako tše dingwe go ka tšweletša ditlhohlo. Ge e ba o nagana ka tirelo ya Bethele o tla dira gabotse go ipotšiša gore: ‘Na ke kgopišega gabonolo ge ba bangwe ba sa dumelelane le nna ka dikgopolo? Na ba bangwe ba hwetša go le bonolo go phedišana le nna?’ Ge e ba o nyaka go kaonefatša dibopegong tšeo, thoma go šomela tabeng yeo gona bjale. Go dira bjalo go tla go thuša go dira ditokišo gabonolo bakeng sa go phela le go šoma le ditho tša lapa la Bethele.

²³ Šoma ka thata gore o be motho wa moya ka go katanela tswalano ya kgaufsi le Jehofa. E-ba le lenaneo le lebotse la thuto ya motho ka noši leo le tlago go akaretša go bala Beibele ka mehla. E-ba mafolofolo go abelaneng ditaba tše dibotse le ba bangwe. Ka go diriša dilo tše, o tla dira gore tšwelopele ya gago ya moya e bonale. (1 Tim. 4:15) A ditebelelo tše di kgahlišago gakaakang tšeo di letetšego bao ba itokišetšago gona bjale bakeng sa mošomo wa tirelo ya nako e tletšego!

²⁴ Batswadi, Tlwaetšang Bana ba Lena: Ke eng seo batswadi ba ka se dirago bakeng sa go kgothaletša bafsa ba bona go phegelela bodiredi bja nako e tletšego? Jesu o itše: “Mang le mang ó tlo rutêxa a etša moruti wa xaxwe.” (Luka 6:40) Morutwana yo a tlwaeditšwego ka mo go tseneletšego ka ntle le pelaelo o tla bontšha dika tše dibotse tša morutiši wa gagwe yo a ineetšego. Molao wo wa motheo o swanetše go naganišišwa ke batswadi ba Bakriste ge ba dutše ba šoma ka thata go tlwaetšeng bana ba bona ka go ‘itlwaetša borapedi.’ (1 Tim. 4:7) Ka ge bana ba sekametše go bontšheng boemo bja kgopolo bja batswadi ba bona malebana le dilo tša moya, batswadi ba dira gabotse ge ba ipotšiša gore: ‘Na rena ka noši re tšeela godimo modiro wo o dirwago Bethele bakeng sa go tšwetša pele dikgahlego tša borapedi bja Jehofa bja therešo? Na re lemoga tšhegofatšo ya Jehofa thulaganyong ya Bethele? Na re dumela gore bophelo tirelong ya Jehofa ke kgetho e botse ya mošomo yeo bana ba rena ba ka e dirago?’ Tebogo ya rena ka noši e tšwago pelong ya go leboga tirelo ya Bethele le mošomo wo o dirwago moo, e tla re thuša go bjala tebogo e swanago baneng ba rena.

²⁵ Elikana le Hanna ba be ba na le tebogo e tseneletšego bakeng sa borapedi bja therešo. Ba beile mohlala o mobotse bakeng sa batswadi ba Bakriste lehono. Isiraeleng ya bogologolo, ke feela banna ba ba-Isiraele bao go bego go nyakega gore “ba bônalê pele xa Morêna” ka makga a mararo ka ngwaga tabarenakeleng. Lega go le bjalo, Elikana o be a sepela dikhilomithara tše ka bago tše 30, gantši ka maoto le lapa la gagwe ka moka “ka ngwaxa” bakeng sa go dira dihlabelo lefelong le la Jehofa la borapedi. (Ek. 23:17; 1 Sam. 1:3, 4, 9, 19; 2:19) Go molaleng gore hlogo ye ya lapa e be e nyaka gore lapa la yona ka moka le tshwenyege ka dilo tša moya bjalo ka yona.

²⁶ Hanna o ile a bontšha kgahlego e swanago le ya monna wa gagwe bakeng sa borapedi bja therešo. O ile a kwa a tlamega kudu go tsenya letsogo go thekgeng borapedi bja therešo tabarenakeleng. Hanna o ile a ikana gore ge Jehofa a ka mo nea morwa, o tla mo neela bakeng sa tirelo ya tabarenakele. (1 Sam. 1:11) Molao wa Moše o be o nea monna tshwanelo ya go fediša keno e sa swanelago ya mosadi wa gagwe. (Num. 30:6-8) Lega go le bjalo, Elikana mafelelong o ile a amogela keno ya Hanna, a bontšha gore le yena o be a thekga ponagatšo yeo ya borapedi bja therešo!—1 Sam. 1:22, 23.

²⁷ Na morwa wa bona Samuele o ile a kgongwa ka tsela e holago ke tebogo le moya o mobotse wo o bontšhitšwego ke batswadi ba gagwe? Ee, go bjalo e le ka kgonthe. Bjalo ka mošemane yo mofsa, Samuele ka go rata le ka potego o ile a hlokomela mediro ya gagwe yeo a bego a e abetšwe gomme o ile a tlwaeletšwa bakeng sa ditokelo tše dingwe tše bohlokwa tirelong ya Modimo. Kgahlego yeo Elikana le Hanna ba ilego ba e bontšha tirelong ya Samuele tabarenakeleng ga se ya fela ka morago ga ge a hweditše mediro ya gagwe moo. Ba ile ba tšwela pele ba mo etela ka mehla bakeng sa go mo nea kgothatšo le thekgo ge a dutše a phegeletše tirelong ya nako e tletšego.—1 Sam. 2:18, 19.

²⁸ A mohlala o kgahlišago gakaakang wo Elikana le Hanna ba o beetšego batswadi ba Bakriste lehono! Ge bana ba rena ba e-kwa polelo ya rena ya tebogo e tšwago pelong bakeng sa tokelo ya tirelo ya Bethele le go bona moya wa boikgafo wo re o bontšhago go tšwetšeng pele dikgahlego tša Mmušo, le bona ba tla hlagolela pelo yeo e sekametšego go hlankeleng ba bangwe. Batswadi ba bantši ba bjetše ka katlego tshekamelo ye yeo e rategago ka baneng ba bona. Ngwana yo mongwe wa nywaga e šupago o ngwadile gore: “Ge ke gola, ke nyaka go ba Bethele, gomme ke na le dilo tše mmalwa tšeo ke nyakago go di dira moo. (1) Go tlanya dimakasine tša Morokami le Phafoga!, (2) go šoma lefapheng la bokgabo, (3) go phutha diaparo. Mošomo le ge e le ofe wo o lego gona. Ga ke tshwenyege ka mohuta wa mošomo.” Ke mo go ruthetšago pelo gakaakang go bona moya o bjalo wa go rata o gola ka dipelong tša bana ba rena!

²⁹ Bafsa, gopolang gore “lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” (1 Joh. 2:17) Tšwelang pele go phegelela dipakane tša moya go akaretša le tokelo e kgethegilego ya tirelo ya Bethele. Batswadi, ekišang mohlala wa babotegi ba nakong e fetilego bao ba ilego ba kgothaletša bana ba bona go hlagolela boineelo go Modimo. (2 Pet. 3:11) Ka gona, eka ka moka ga rena re ka dira karolo ya rena go thušeng banababo rena le dikgaetšedi ba bafsa go hlankela Mmopi wa rena yo Mogolo ka mo go tletšego go fihla bokgoleng bjo bo kgonegago ka ge se se “na le kholofedišô ya bophelô byono le ya byo bo tl’o xo tla.”—1 Tim. 4:8; Mmo. 12:1.

[Lepokisi go letlakala 4]

Dinyakwa tša Motheo Bakeng sa Tirelo ya Bethele

● Go kolobetšwa bonyenyane ngwaga o tee

● Motho wa moya yo a nago le lerato le le tseneletšego la go rata Jehofa le mokgatlo wa gagwe

● Go ba boemong bjo bobotse bja moya, monagano, maikwelo le bophelo bjo bobotse bja mmele

● Modudi goba modudi yo a dumeletšwego ka molao wa sa ruri wa Afrika Borwa

● Go kgona go bala, go ngwala le go bolela Seisemane gabotse

● Nywaga e 19-35