Mekgwa e Mebotse—Seka sa Batho ba ba Boifago Modimo
1 Mekgwa e mebotse e a hlokwa lehono. Ke ka baka la’ng go le bjalo? Batho ba lepotla-potleng leo go lona e lego ka sewelo ba ka naganago ka dipolelo tša motheo tša botho tše bjalo ka gore, “Hle,” “Ke a leboga,” goba “Tshwarelo.” Lentšu la Modimo le boletše e sa le pele ka go senyega o šoro ga mekgwa mehleng ya bofelo ge le bolela gore batho e tlo ba ba ‘go ithata, ba lenyatšo, baikgogomoši, ba go se leboge, ba-hlala-lerato, ba ba sa tsebego go itshwara, manaba a tše bolo le baipuši.’ (2 Tim. 3:1-4) Dika tše bjalo ka moka di tšweletša mekgwa e mebe. Bjalo ka batho ba boifago Modimo, Bakriste ba swanetše go hlokomela gore ba se ke ba tšea go hloka tlhompho mo ga lefase bakeng sa batho ba bangwe.
2 Mekgwa ke Eng? Mekgwa e mebotse e ka hlaloswa e le go lemoga ka kelohloko maikwelo a batho ba bangwe, bokgoni bja go phedišana le ba bangwe ka khutšo. Dibopego tša mekgwa e mebotse ke go naganela, go hlompha le go ba botho. Dika tše di tšwa leratong la motho la go rata Modimo le moagišani. (Luka 10:27) Ga di bitše selo, eupša ke tša bohlokwa kudu bakeng sa go godiša kgokagano ya rena le ba bangwe.
3 Jesu Kriste o beile mohlala o phethagetšego. Ka mehla o be a diriša Molao wa Gauta o rego: “Batho Le ba dirê tše Le rataxo xore ba Le dirê tšôna.” (Luka 6:31) Na ga re makatšwe ke go naganela ga Jesu le mokgwa wa gagwe o lerato ge a be a dirišana le barutiwa ba gagwe? (Mat. 11:28-30) Mekgwa ya Gagwe e mebotse e be e sa tšwe melaong yeo e ngwadilwego ka dipukung tša boitshwaro. E be e e-tšwa pelong e botegago le ya go fa kudu. Re swanetše go leka go ekiša mohlala wa gagwe o mobotse.
4 Ke neng moo Bakriste ba nyakago mekgwa e mebotse? Na ke feela ditiragalong tše kgethegilego, ge ba tshwenyegile ka go tšweletša dikgopolo tše dibotse? Na e nyakega feela ge go lekwa go tutuetša ba bangwe? Aowa! Re swanetše go bonagatša mekgwa e mebotse ka dinako tšohle. Ke ka tsela efe gape moo re swanetšego go tshwenyega ka se ditlwaelanong tša rena le ba bangwe ka phuthegong?
5 Holong ya Mmušo: Holo ya Mmušo ke lefelo la rena la borapedi. Re ba moo ka baka la go laletšwa ke Jehofa Modimo. Ka baka leo, re baeng. (Ps. 15:1) Na re baeng bao ba beago mohlala ge re e-tla Holong ya Mmušo? Na re šetša ka mo go lekanego moaparo wa rena le go itokiša? Ka kgonthe re swanetše go phema moaparo wa go se šetše goba o feteletšego. Go sa šetšwe gore ba dikopanong tše dikgolo goba dibokeng tša rena tša beke le beke tša phuthego, batho ba Jehofa ba lemogwa ka ponagalo ya bona ya mekgwa yeo e swanelago bao ba ipitšago ba ba godišago Modimo. (1 Tim. 2:9, 10) Ka go rialo re bontšha go naganela mo go swanetšego le tlhompho go bobedi Moamogedi wa baeng wa rena wa legodimong le baeng ba bangwe bao ba laleditšwego.
6 Tsela e nngwe yeo re bontšhago ka yona mekgwa e mebotse mabapi le diboka ke go fihla ka nako. Go ba gona, se ga se ka mehla se lego bonolo. Ba bangwe ba ka ba ba dula kgole goba ba na le malapa a magolo gore ba a lokišetše e sa le pele. Ka diphuthegong tše dingwe go lemogilwe gore bagoeledi ba sego kae ba tlwaetše go fihla ka morago ga kopelo ya go bula le thapelo. Ye ke taba e kgolo. Re swanetše go gopola gore mekgwa e swanetše go dirišana le go naganela maikwelo a batho ba bangwe. Jehofa e lego Moamogedi wa baeng wa rena yo a gaugelago, o lokišeditše monyanya wo wa moya bakeng sa go re hola. Re bontšha tebogo ya rena le go tshwenyega ga rena ka maikwelo a gagwe ka go boloka nako. Go oketša moo, go fihla dibokeng ka morago ga nako go a šitiša e bile ke go bontšha go se hlomphe bao ba šetšego ba le gona.
7 Ge re kopane, na re ela hloko ba bafsa bao ba lego gona? Go ba amogela ke karolo ya go ba le mekgwa. (Mat. 5:47; Ba-Roma 15:7) Tumedišo e botho, go dumedišana ka diatla go borutho, go myemyela go botho—ka moka ga tšona ke dilo tše nyenyane eupša di tlaleletša go seo se re hlaolago re le Bakriste ba therešo. (Joh. 13:35) Monna yo a ilego a tla Holong ya Mmušo ka lekga la pele o ile a bolela ka morago gore: “Ka letšatši le tee ke ile ka kopana le batho bao ba nago le lerato e le ka kgonthe, batho bao ke sa ba tsebego le gatee, go feta bao ke ilego ka kopana le bona kerekeng yeo ke godišeditšwego go yona. Go be go le molaleng gore ke hweditše therešo.” Ka baka leo, o ile a fetola tsela ya gagwe ya bophelo gomme dikgwedi tše šupa ka morago o ile a kolobetšwa. Ee, mekgwa e mebotse e ka ba le ditla-morago tše tseneletšego!
8 Ge e ba re bontšha go ba le mekgwa go baeng bao re kopanago le bona, na ga se ra swanela go e bontšha “xa-xolo . . . batho ba-bô-rena ba tumêlô”? (Ba-Gal. 6:10) Re swanetše go diriša molao wo wa motheo: “Sefahlogô sa mokxalabyê [goba mokgekolo] O se hlomphê.” (Lef. 19:32) Le ka mohla ga se ra swanela go tshediša batho ba bjalo mahlo dipokanong tša rena.
9 Go Theetša ka Kelohloko: Nakong ya diboka tša phuthego, badiredi ba Bakriste ba Modimo ba bolela e le gore ba nee mpho ya moya bakeng sa go re aga. (Ba-Roma 1:11) Ruri go tla bonagatša mekgwa e fokolago kudu ka lehlakoreng la rena ge e ba re tla thoma go otsela, go sohla mmotu bošaedi, go sebelana leboelela le yo re dutšego kgaufsi le yena, go ya ka mo go sa nyakegego ka ntlwaneng ya ka thoko, go bala kgatišo e fapanego goba go dira dilo tše dingwe nakong ya seboka. Bagolo e swanetše go ba mehlala tabeng ye. Mekgwa e mebotse ya Bokriste e tla re tutueletša go bontšha tlhompho e swanetšego go seboledi le molaetša o theilwego Beibeleng ka go se nea tlhokomelo ya rena e feletšego.
10 Go oketša moo, ka baka la go naganela bobedi seboledi le batheetši, re swanetše go hlokomela gore di-pager tša rena tša elektroniki le megala ya cellular di se ke tša šitišana le diboka tša rena.
11 Mekgwa le Bana: Batswadi ka mehla ba swanetše go phafogela boitshwaro bja bana ba bona. Ge e ba ngwana a thoma go lla goba a thoma go se iketle nakong ya diboka gomme se se šitiša ba bangwe, e ka ba gabotse go ntšhetša ngwana ka ntle ga holo kapejana ka mo go ka kgonegago ka gona bakeng sa go mo homotša. Se se ka ba thata ka dinako tše dingwe, eupša gopola, se se bontšha gore o naganela maikwelo a ba bangwe. Batswadi bao ba nago le bana ba banyenyane bao mohlomongwe ba sa iketlego, gantši ba kgetha go dula madulong a morago a holo e le gore ba se šitiše ba bangwe ge go nyakega gore ba tšwele ka ntle nakong ya diboka. Ka gona, bohle bao ba lego gona ba ka bontšha go naganela malapa ka go tlogela methaladi ya morago ya madulo e bulegile bakeng sa go dirišwa ke bona ge e ba go nyakega.
12 Batswadi gape ba swanetše go šetša boitshwaro bja bana ba bona pele le ka morago ga diboka. Bana ga se ba swanela go kitima ka gare ga moago ka ge se se ka baka dikotsi. Go kitima go dikologa Holo ya Mmušo ka ntle le gona go ka ba kotsi, kudu-kudu mantšiboa ge motho a sa hlwe a kgona go bona kgole. Go bolela ka go hlaba mašata ka ntle go ka šitiša baagišani gomme gwa nea pono e fošagetšego ka borapedi bja rena. Batswadi bao ba dirago maiteko a kgonthe a go hlokomela bana ba bona bobedi ka gare le ka ntle ga Holo ya Mmušo ba swanetše go retwa ka gobane se se tlaleletša botseng bja rena bja go dula gotee ka go kwana.—Ps. 133:1.
13 Thutong ya Puku: Re leboga moya wa go amogela baeng wa banababo rena bao ba bulago magae a bona bakeng sa diboka tša phuthego. Ge re kopane moo, re swanetše go bontšha tlhompho le go naganela thoto ya bona. Re swanetše go phumola dieta tša rena ka tlhokomelo pele re tsena e le gore re pheme go šilafatša mabato goba mebete. Batswadi ba swanetše go hlokomela bana ba bona, ba kgonthišetše gore ba dula lefelong la legae leo le kgethetšwego bakeng sa thuto ya puku. Le ge sehlopha e ka ba se senyenyane gomme ka tsela e itšego boemo e le bjo sa tlwaelegago, ga se ra swanela go itebala ka magaeng a ba bangwe. Motswadi wa ngwana yo monyenyane o swanetše go mo felegetša ge a yo diriša ntlwana ya ka thoko. Go oketša moo, ka ge thuto ya puku e le seboka sa phuthego, re swanetše go apara go swana le ge re e-ya Holong ya Mmušo.
14 Mekgwa e Mebotse e Bohlokwa: Go diriša mekgwa ya Bokriste ga go emele gabotse bodireding bja rena feela, eupša gape go godiša ditswalano tše dibotse le ba bangwe. (2 Ba-Kor. 6:3, 4, 6) Bjalo ka barapedi ba Modimo yo a thabilego, re swanetše go hwetša go le bonolo go myemyela, go kgahlegelana gaešita le go dira dilo tše nyenyane tša botho tšeo di tlišetšago ba bangwe lethabo. Dika tše tša mekgwa di tla kgabiša maphelo a rena bjalo ka batho ba boifago Modimo.