‘Go Bulele Sebaka’
1 Nakong e nngwe ge Jesu a be a bolela le barutiwa ba gagwe ka lenyalo o ile a bolela ka go se be lenyalong e le “mpho.” Ke moka o itše: “E a ka kgonago a a bo bulele sebaka.” (Mat. 19:10-12, NW) Nywaga ka morago, moapostola Paulo o ile a ngwala ka mehola ya go se be lenyalong gomme a kgothaletša ba bangwe go latela mohlala wa gagwe wa go dula a sa nyala. (1 Ba-Kor. 7:7, 38) Ba bantši lehono ba ‘butše sebaka’ sa go dula ba se lenyalong gomme ba thabela mehola ya seo. E mengwe ya yona ke efe?
2 Go Hlankela “le sa Šitišwe”: Paulo o be a kwešiša gore go se be lenyalong go mo neile sebaka sa go hlankela Jehofa ‘a sa šitišwe.’ Ka mo go swanago lehono, ngwanabo rena yo a sa nyalago a ka katanela go ya Sekolong sa Tlwaetšo ya Bodiredi, le gona motho yo a sego lenyalong o lokologile go tsenela modiro wa bobulamadibogo, go ithuta leleme le lengwe, go hudugela moo go nyakegago thušo e kgolo, go hlankela Bethele goba go ba yo a hwetšagalago bakeng sa ditokelo tše dingwe tše di kgethegilego tša tirelo. A ka ba le nako e oketšegilego le dibaka tša go dira thuto e tseneletšego ya motho ka noši le go naganišiša gotee le go boledišana le Jehofa ka thapelo e tšwago pelong. Motho yo a sego lenyalong gantši o na le nako e oketšegilego ya go ithapela go thuša ba bangwe. Mediro e bjalo ka moka ke ‘ya go ikhola.’—1 Ba-Kor. 7:32-35, PK; Dit. 20:35.
3 Tirelo e bjalo e sa šitišwego e direlwago Modimo e tliša meputso e humilego. Ka morago ga go fetša nywaga e 27 kua Kenya, kgaetšedi yo a sa nyalwago o ngwadile gore: “Go be go na le bagwera ba bantši kudu le modiro o mogolo kudu! Re be re dira dilo re le gotee [le] go etelana. . . . Ke be ke kgona go diriša tokologo e oketšegilego le go sepela gabonolo moo go se nyalwe go nago le gona go dira gore ke swarege bodireding, gomme se se ntlišeditše lethabo le legolo.” O okeditše ka gore: “Tswalano ya-ka le Jehofa e ile ya gola go theoša le nywaga.”
4 Go Diriše ka mo go Swanetšego: Jesu o boletše gore morero wa go hlagolela mpho ya go se be lenyalong e swanetše go ba “ka ’baka la mmušô wa maxodimo.” (Mat. 19:12) Go swana le mpho le ge e le efe, go se be lenyalong go swanetše go dirišwa ka mo go swanetšego bakeng sa go tliša lethabo le mehola. Ka go diriša ka mo go swanetšego dibaka tšeo go se be lenyalong go di tlišago le ka go ithekga ka bohlale le matla a Jehofa, batho ba bantši bao ba sego lenyalong ba ile ba kwešiša bohlokwa bja go bulela mpho ye sebaka.