Ekiša Boemo bja Jesu bja Kgopolo
1. Ke boemo bofe bja kgopolo bjo Jesu a ilego a bo bontšha?
1 Le ge re se ra ka ra bona Morwa wa Modimo, ka baka la pego e ngwadilwego ya bophelo bja Jesu le bodiredi bja gagwe, re mo rata e le ka kgonthe. (1 Pet. 1:8) Ka go dumelelana le thato ya Tatagwe, o ile a tlogela boemo bja gagwe bjo bo phagamego legodimong gomme a tla lefaseng. Bjalo ka motho, o ile a hlankela ba bangwe ka ntle le boithati gomme ka morago a gafa bophelo bja gagwe bakeng sa batho. (Mat. 20:28) Lentšu la Modimo le re kgothatša ka gore: “Kxopolô ye e swanetšexo xo ba mo xo lena, ké yeo e bexo e le xo Kriste Jesu.” Re ka ekiša bjang moya wa gagwe wa boikgafo?—Ba-Fil. 2:5-8.
2. Ke tlhohlo efe yeo Bakriste ba bantši ba lebanago le yona, gomme ke eng seo se ka ba thušago go e fenya?
2 Ge re Ikwa re Lapile: Gaešita le ge Jesu a be a phethagetše, le yena o be a lapa. Lebakeng le lengwe ge a be “à lapile ka [baka la] leêtô,” o ile a nea bohlatse bjo bo tletšego go mosadi wa mo-Samaria. (Joh. 4:6) Bakriste ba bantši lehono ba lebana le tlhohlo e swanago. Ka morago ga beke ya mošomo o lapišago, go ka ba thata go hwetša matla bakeng sa gore o tšee karolo modirong wa go bolela. Lega go le bjalo, ge e ba re dira bjalo ka mehla, re tla hwetša gore bodiredi bja Bokriste bo re lapološa moyeng.—Joh. 4:32-34.
3. Re ka ekiša bjang go rata ga Jesu go ruta?
3 Lebakeng le lengwe, Jesu le barutiwa ba gagwe ba ile ba ya lefelong leo go se nago batho e le gore ba khutše go se nene. Lega go le bjalo, lešaba le legolo le ile la tseba taba yeo gomme la kitimela pele go ya go kopana le bona. Go e na le gore a tenege, Jesu o ile “a ba šôkêlwa” gomme a thoma “xo ba ruta ka ditaba tše ntši.” (Mar. 6:30-34) Go thoma le go swara dithuto tša Beibele go nyaka boemo bjo bo swanago bja kgopolo. Go nyaka boiteko bjo bo tšwelago pele le lerato la kgonthe bakeng sa batho. Ge e ba mo nakong ye o sa sware thuto ya Beibele, o se ke wa langwa ge o dutše o leka go e hwetša.
4. Go tsenela bobulamadibogo bja go thuša go ka re thuša bjang gore re ekiše boemo bja Kriste bja kgopolo?
4 Etiša Dikgahlego tša Moya Pele: Bobulamadibogo bja go thuša bo ka re thuša go lebiša tlhokomelo kudu medirong ya moya. Kgaetšedi yo mongwe wa mofsa o ngwadile gore: “Mmago yo mongwe wa bagwera ba-ka o ile a re kgothaletša ka bobedi go tsenela bobulamadibogo bja go thuša le yena lebaka la kgwedi. Ke thabišitšwe kudu ke gore re ile ra dira bjalo. Ke ile ka thabela go tseba bana babo rena le dikgaetšedi gakaone, gomme go se go ye kae e be šetše eka ke bešo. Ke ile ka thabela gape le go ba le dibaka tše dintši tša go bolela le ba bangwe ka Jehofa le go ba ruta ditherešo tše di kgahlišago tša Mmušo. Tše ka moka di dirile gore ke ikwe ke le kgaufsi le Jehofa le mokgatlo wa gagwe.”—Ps. 34:8.
5. Ke ka baka la’ng re swanetše go tšwela pele re dira boiteko bja go ekiša boemo bja Jesu bja kgopolo?
5 Ka moka ga rena re katana le go lwa ntwa magareng ga nama ya rena e sa phethagalago le kganyogo ya rena ya go nyaka go kgahliša Jehofa. (Ba-Roma 7:21-23) Re swanetše go ganetša moya wa lefase wa go se nyake go ikgafa. (Mat. 16:22, 23) Jehofa a ka re thuša go atlega go se ka go diriša moya wa gagwe o mokgethwa. (Ba-Gal. 5:16, 17) Ge re sa letile phološo ya rena ya go phologela lefaseng le lefsa la go loka la Modimo, anke re ekišeng boemo bja Jesu bja kgopolo ka go etiša dikgahlego tša Mmušo le dikgahlego tša ba bangwe pele ga tša rena.—Mat. 6:33; Ba-Roma 15:1-3.