Diriša Dibidio Tšeo di Rutago
1. Jehofa o ile a diriša bjang dithušo tša go bontšha taba ge a ruta bahlanka ba gagwe ba bogologolo, gomme ka mafelelo afe?
1 Ka dinako tše dingwe Jehofa o be a diriša dipono le ditoro e le gore a fetišetše tsebišo ya bohlokwa go bahlanka ba gagwe ba bogologolo. Nagana ka pono ya Hesekiele ya koloi ya Jehofa ya legodimong. (Hesek. 1:1-28) Akanya kamoo Daniele a ilego a ikwa ka gona ka morago ga go bontšhwa pono ya boporofeta ya go ema le go wa ga mebušo ya lefase. (Dan. 7:1-15, 28) Go thwe’ng ka pono e thabišago yeo e ilego ya bontšhwa Johane ka “dipontšho” yeo e lego mabapi le dilo tšeo di bego di tla direga “letšatšing la Morena”? (Kut. 1:1, 10) Jehofa o ba rutile a diriša ditiragalo tša kgonthe tšeo di nago le mebala ya kgonthe gomme di ile tša dula megopolong ya bona.
2. Ke dithušo dife tša go bontšha taba tšeo re ka di dirišago go ruta ba bangwe ditherešo tša Beibele?
2 Le rena re ka diriša dibidio ge re ruta ge e ba re nyaka go hlalosetša ba bangwe ditherešo tša Beibele ka tsela e atlegago le yeo e ka se kego ya lebalega gabonolo. Dibidio tša rena di bolela ka ditaba tše di fapa-fapanego e bile di dira gore motho a bote Beibele, mokgatlo wa Jehofa le melao ya motheo yeo e kgothaletšago mokgwa wa bophelo wa Bokriste. Ela hloko ditsela tše sego kae tšeo re ka dirišago dibidio tša rena ka tšona ge re ruta. Ditšhišinyo tše latelago ke mehlala ya dibidio tšeo re ka di dirišago.
3. O ka diriša’ng go lebiša morutwana wa Beibele mokgatlong?
3 Bodireding: Na o kile wa botša morutwana wa Beibele ka borwarre bja rena bja Bokriste bja lefase ka bophara? Mmontšhe bjona ka go diriša bidio ya Our Whole Association of Brothers. O ka mo adima yona gore a e bogele pele le bala nakong e tlago goba le ka e bogela gotee ka nako ya thuto. Ke moka le boeletše dipotšišo tšeo di lego ka go Tirelo ya Rena ya Mmušo ya October 2002.
4. Ke didirišwa dife tša go ruta tšeo mofsa a ka di dirišago ge a ruta sekolong?
4 Bafsa, le ka botšiša barutiši ba lena ge e ba go ka kgonagala gore le bontšhe barutwana-gotee le lena bidio ya Jehovah’s Witnesses Stand Firm Against Nazi Assault goba Faithful Under Trials—Jehovah’s Witnesses in the Soviet Union. Ithapele go ngwala dipotšišo o diriša dipotšišo tšeo di lego ka go Tirelo ya Rena ya Mmušo ya February 2003, gomme o di beakanye gore di swanele poledišano ya ka klaseng.
5. Batswadi ba ka diriša’ng nakong ya thuto ya lapa?
5 Ge re E-na le ba Lapa le Bagwera: Batswadi, bana ba lena ba feleleditše neng go bogela bidio ya Young People Ask—How Can I Make Real Friends? E ka ba gabotse ge le ka e bogela gape nakong e tlago ge le swara thuto ya lapa. Tirelo ya Rena ya Mmušo ya April 2002 e-na le dipotšišo tšeo le ka di dirišago bakeng sa poledišano e kgahlišago le e tšwago pelong.
6. O ka lokišetša bjang nako e thabišago gotee le bagwera?
6 Na ka phuthegong le na le bagwera bao le bego le dutše le nyaka gore ba le etele? Go bogela le bona bidio ya Respect Jehovah’s Authority go ka dira gore le be le nako e thabišago ya mantšiboa, kudu-kudu ge e ba ka morago ga moo le boeletša dipotšišo tšeo di lokeleditšwego ka go Tirelo ya Rena ya Mmušo ya September 2004.
7. O ka nagana ka dibaka dife tšeo go ka kgonegago gore o diriše dibidio tša rena go tšona?
7 Dibaka tše Dingwe: Ke ka ditsela dife tše dingwe o ka dirišago dibidio tša rena tše 20 tše fapa-fapanego? Na go bapalela motho yoo o mo etelago ka mehla e tee goba tše pedi tša tšona go ka mo thuša gore a tšwele pele moyeng? Na o ka ithapela go bapala dibidio tše bookelong goba legaeng la batšofadi la lefelong la geno? Na dibidio tše di ka fetoša dikgopolo tša ba leloko bao e sego Dihlatse, baagišani goba bašomi-gotee le wena? Dibidio tša rena di a kgahliša, di a ruta e bile ke dithušo tše atlegago tša go bontšha taba. Di diriše ge o ruta.