Go Nea Bohlatse ka Ntlo le Ntlo
1. Ke potšišo efe yeo e rotogago mabapi le bodiredi bja ntlo le ntlo le gona ka baka la’ng?
1 “Bao ba nago le phihlelo ditseleng tše fapa-fapanego tša go phatlalatša Therešo ba tla dumela gore modiro wa go bolela ka ntlo le ntlo go dirišwa MILLENNIAL DAWN, mehleng ya lehono, ke modiro o atlegago kudu wa go goelela Therešo.” Mantšu a ao a tšwago ka tokollong ya July 1, 1893, ya Zion’s Watch Tower a gatelela bohlokwa bja bodiredi bja ntlo le ntlo. Batho lefaseng ka bophara ba o tšea e le leswao la Dihlatse tša Jehofa. Na mokgwa wo o sa atlega, ka ge go le thata kudu go hwetša batho ka gae mafelong a mangwe?
2. Go na le motheo ofe wa Mangwalo bakeng sa go nea bohlatse ka ntlo le ntlo?
2 Ke wa Mangwalo e Bile ke o Bohlokwa: Go nea bohlatse ka ntlo le ntlo ke modiro o theilwego mangwalong. Jesu o ile a laela barutiwa ba 70 go sepela ka babedi ka babedi ge ba e-ya nywakong ya batho. (Luka 10:5-7) Beibele e bolela mabapi le barutiwa ba Jesu gore kapejana ka morago ga lehu la gagwe: “Letšatši le lengwe le le lengwe ka tempeleng le ka ntlo le ntlo ba [ile ba] tšwela pele ba sa kgaotše ba ruta e bile ba tsebatša ditaba tše dibotse.” (Dit. 5:42) Moapostola Paulo le yena o be a ruta ka ntlo le ntlo ka mafolofolo.—Dit. 20:20.
3. Go nea bohlatse ka ntlo le ntlo go na le mehola efe e mengwe?
3 Go nea bohlatse ka ntlo le ntlo go tšwela pele e le mokgwa o bohlokwa wa go phatlalatša ditaba tše dibotse lehono. Go re kgontšha go ‘nyaka’ bao ba swanelegago ka lenaneo le ka thulaganyo. (Mat. 10:11) Batho ka kakaretšo ba a iketla ge ba le ka gae. Go boledišana le bona ka go lebanya—go kwa lentšu la bona, go bona ponagalo ya difahlego tša bona gotee le go bona moo ba dutšego—go re thuša go lemoga dinyakwa tša bona le dilo tšeo ba tshwenyegilego ka tšona. Gantši go re nea sebaka se sekaone kudu sa poledišano e teletšana.
4. Re ka dira bjang gore go nea bohlatse ka ntlo le ntlo e be mo go atlegago kudu?
4 Lokiša Maemo a Gago: Moapostola Paulo o be a ikemišeditše go lokiša maemo a gagwe “bakeng sa ditaba tše dibotse.” (1 Bakor. 9:23) Mohlomongwe re ka fetoša lenaneo la rena e le gore re ka dira boboledi ge batho ba bantši ba le gona ka gae, bjalo ka mathapama, mafelo-bekeng goba matšatšing a maikhutšo. Ngwala dinomoro tša dintlo tšeo di se nago batho gomme o leke go ya go tšona gape letšatšing le lengwe mo bekeng goba nakong e nngwe ka lona letšatši leo.
5. Bao ba nago le mathata a tša maphelo ba ka akaretšwa bjang modirong wa ntlo le ntlo?
5 Bao ba nago le mathata a tša maphelo le bona ba ka tšea karolo go boleleng ka ntlo le ntlo. Mohlomongwe re ka rulaganya go sepela le ba bjalo dintlong tšeo di fihlelelegago gabonolo, e le go ba thuša go šoma ka mokgwa wo ba kgonago ka gona. Kgaetšedi yo mongwe yoo a bego a na le bothata bja go hema o be a kgona go tsena ntlo e tee metsotsong e mengwe le e mengwe e 30. Lega go le bjalo, o ile a thaba a ba a kgotsofala e le ruri ka morago ga gore a bolele ka ntlo le ntlo le sehlopha!
6. Ke ka baka la’ng re swanetše go dira gore go nea bohlatse ka ntlo le ntlo e be sebopego sa ka mehla sa bodiredi bja rena?
6 Ba bantši bao ba swanago le dinku ba tšwela pele ba hwetšwa modirong wa ntlo le ntlo. Mogoeledi yo mongwe o ile a kokota mojako gomme a botšwa gore: “Ka gare. Ke a tseba gore ke wena mang. Ke be ke dutše ke rapela gore Modimo a nthomele motho yo a tlago go nthuša gomme ka kwa go kokotwa mojako. O nkwele gomme a go romela.” Mafelelo a se a nea bohlatse bja gore Jehofa o šegofatša mokgwa wo wa boboledi. (Mat. 11:19) Ikemišetše go dira gore go nea bohlatse ka ntlo le ntlo e be sebopego sa ka mehla sa bodiredi bja gago.