Na o na le Tšhemo ya Motho ka Noši?
1. Tšhemo ya motho ka noši ke’ng?
1 Tšhemo ya motho ka noši ke tšhemo yeo o e abetšwego. E ka ba e le lefelong le le fihlelegago gabonolo moo o ka fihlago go yona kapejana gomme wa dira boboledi o nnoši goba o e na le mogoeledi yo mongwe. Gaešita le ge go le bohlokwa go thekga dithulaganyo tša phuthego tša go nea bohlatse re le sehlopha ge go kgonega, go ba le tšhemo ya motho ka noši yeo o kago go e šoma ka dinako tše dingwe, go ka thuša gore go newe bohlatse bjo bo tseneletšego, kudu-kudu diphuthegong tšeo di nago le tšhemo e kgolo.—Dit. 10:42.
2. Mehola e mengwe ya go ba le tšhemo ya motho ka noši ke efe?
2 Mehola: Ba bangwe ba hweditše mehola e oketšegilego ge ba dira boboledi ka dinako tša bona tša matena goba gatee-tee ka morago ga mošomo tšhemong ya motho ka noši, yeo e lego kgaufsi le moo ba šomago gona. Ba bangwe ba thabetše go šoma gotee bjalo ka lapa kgaufsi le moo ba dulago gona mo e ka bago iri goba go feta moo pele ga Thuto ya Puku ya Phuthego. Ka baka leo, maeto a go boela le dithuto tša Beibele tšeo ba di hwetšago di ba kgaufsi gomme se sa feleletša ka go ba fokoletša maiteko, nako, le ditshenyagalelo tšeo ba di dirišago. Ka ge go gontši go ka fihlelelwa ka nako e kopana, go ba le tšhemo ya motho ka noši go ka thuša ba bangwe go tsenela bobulamadibogo bja go thuša nako le nako goba gaešita le go ingwadiša bjalo ka babulamadibogo ba ka mehla. Go oketša moo, go šoma tšhemo ya motho ka noši le go tlwaelana le beng ba dintlo go ka dira gore ba re bote le go re thuša go dumelelanya dithero tša rena le dilo tšeo ba tshwenyegilego ka tšona, gomme gwa dira gore bodiredi bja rena e be bjo bo atlegago kudu.
3. Mmulamadibogo yo mongwe yo a ilego a hwetša tšhemo ya motho ka noši o bile le phihlelo efe?
3 Mmulamadibogo yo mongwe yo a ilego a kgothaletšwa ke molebeledi wa tikologo go ikhweletša tšhemo ya motho ka noši o a laodiša: “Ke ile ka amogela keletšo ye gomme go se go ye kae ka tlwaelana ga kaone le beng ba dintlo tšhemong ya-ka le go bontšha bogwera go bona. Ke ile ka beakanya dinako tša go etela ga-ka go ya ka maemo a bona. Ka baka leo, maeto a-ka a go boela a ile a oketšega go tloga go a 35 go ya go a ka godimo ga a 80 ka kgwedi, gomme ke na le dithuto tša magae tša Beibele tše šupago.”
4. O ka hwetša bjang le go šoma tšhemo ya motho ka noši?
4 Kamoo se se ka Dirwago ka Gona: Ge e ba o nyaka go kgopela tšhemo ya motho ka noši, boledišana le mohlanka wa tšhemo. Ikwe o lokologile go laletša mogoeledi yo mongwe go šoma gotee le wena gomme o boloke pego ya bao le sego la ba hwetša ka gae. O swanetše go leka go fetša tšhemo ka dikgwedi tše nne. Ge e ba o e na le bothata bja go dira bjalo, o ka kgopela molebeledi wa Thuto ya Puku ya Phuthego goba ba bangwe bakeng sa thušo. Mafelelong a dikgwedi tše nne, o ka bušetša kabelo ya tšhemo e feditšwego goba wa kgopela go e šoma gape. Lega go le bjalo, ga se wa swanela go boloka kabelo ya tšhemo e swanago go ya go ile eupša o swanetše go e bušetša e le gore ba bangwe ba ka e kgopela. Ge e ba o le phuthegong yeo e nago le tšhemo e nyenyane gomme go sa kgonege gore o hwetše tšhemo ya motho ka noši, mohlomongwe o ka kgopela karolo ya tšhemo go molebeledi wa thuto ya puku.
5. Ke’ng seo se nyakegago e le gore re phethagatše thomo ya rena ya go dira boboledi?
5 Thomo ya rena ya go bolela “lefaseng ka moka le go agilwego go lona” ke kabelo e kgolo kudu. (Mat. 24:14) E nyaka thulaganyo e botse. Go tlaleletša go neeng bohlatse ka sehlopha, go dira boboledi tšhemong ya motho ka noši go ka re thuša go fihlelela batho ba bantši kamoo go ka kgonegago ka ditaba tše dibotse.